ខេត្តព្រះសីហនុ ៖ បញ្ហាដ៏រ៉ាំរ៉ៃទំនាស់ដីធ្លីនៅខេត្តព្រះសីហនុ កំពុងមានបញ្ហាក្តៅគគុករវាងអ្នកមានលុយ មានអំណាច និងប្រជាពលរដ្ឋ ដោយមិនទាន់មានដំណោះស្រាយនៅឡើយនោះ ទើបឯកឧត្តម ប៉ុល សារឿន ទេសរដ្ឋមន្ត្រី និងជាប្រធានក្រុមការងារថ្នាក់ជាតិ ចុះមូលដ្ឋានខេត្តព្រះសីហនុ បានបញ្ជាឲ្យអាជ្ញាធរខេត្ត ពិនិត្យរាល់ពាក្យបណ្តឹងឲ្យបានច្បាស់លាស់ ជាពិសេសពិនិត្យមើលបណ្ដឹងណាដែលមិនពិត មានលក្ខណៈញុះញង់ អនុញ្ញាតឲ្យខេត្តប្តឹងបកវិញ។
ថ្លែងនៅក្នុងកិច្ចប្រជុំ ឆ្លងសេចក្តីព្រាងរបាយការណ៍បូកសរុបលទ្ធផលការងារ របស់ក្រុមការងារថ្នាក់ជាតិចុះមូលដ្ឋានខេត្តព្រះសីហនុ ដើម្បីត្រួតពិនិត្យនិងគាំទ្រការអនុវត្តកម្មវិធីនយោបាយ យុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាលកម្ពុជា ឆ្នាំ២០១៨ និងទិសដៅអនុវត្តន៍បន្តឆ្នាំ២០១៩ កាលពីថ្ងៃទី១១ ខែកុម្ភៈ ឆ្នាំ២០១៩ ឯកឧត្តម នាយឧត្តមសេនីយ៍ ប៉ុល សារឿន បានលើកឡើងថា «យើងទាំងអស់គ្នាក្នុងនាម ជាអាជ្ញាធរត្រូវរៀបចំទទួលពាក្យបណ្តឹងពីប្រជាពលរដ្ឋឲ្យបានគ្រប់ៗ គ្នា ជាពិសេសទៅទៀតត្រូវពិនិត្យមើលបណ្តឹងណាដែលមិនពិតមានលក្ខណៈញុះញង់អនុញ្ញាតឲ្យខេត្តប្តឹងបកវិញ។យើងទាំងអស់គ្នា ត្រូវបន្តយកចិត្តទុកដាក់ពង្រឹងការិយាល័យទទួលពាក្យបណ្តឹងពីប្រជាពលរដ្ឋ ដើម្បីមានវិធានការដោះ ស្រាយ ឱ្យបានទាន់ពេលវេលាឆ្លើយតប តាមសំណូមពររបស់ប្រជាពលរដ្ឋ និងចាត់វិធានការឱ្យបានទាន់ ពេលវេលា ក្នុងការផ្គត់ផ្គង់ទឹក ស្អាតជូនប្រជាពលរដ្ឋនារដូវប្រាំង ដែលអាចខ្វះស្អាតប្រើប្រាស់»ជាដើម។
ជាមួយគ្នានោះដែរ ឯកឧត្តម ក៏បានប្រាប់ដល់អាជ្ញាធរខេត្តព្រះសីហនុ ត្រូវសហការការពារសន្តិសុខ សណ្តាប់ធ្នាប់ ក្នុងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ ដែលនឹងប្រព្រឹត្តទៅ នៅថ្ងៃទី២៦ ខែឧសភា ឆ្នាំ២០១៩ ខាងមុខនេះ ហើយត្រូវអនុវត្តន៍ឱ្យបានស៊ីជម្រៅនូវបាវចនាពីរគឺ កែទម្រង់ខាងក្នុង បង្កើនមិត្តខាងក្រៅ ឈរលើស្មារតី ឯករាជ្យ ស្មើសិទ្ធិ និងអភិក្រមទាំង៥ គឺ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ដើម្បីធានាប្រសិទ្ធភាពស្ថាប័ន។
ជំរុញការថែរក្សាសន្តិសុខ សណ្តាប់ធ្នាប់ការវិនិយោគការគ្រប់គ្រងជនបរទេស និងការផ្តល់សេវាកាន់តែប្រសើរជូនប្រជាពលរដ្ឋ ក៏ដូចជាវិស័យឯកជន។ ត្រូវរួមសហការគ្នាដើម្បីដោះស្រាយបញ្ហាប្រឈមនានា ជូនប្រជាពលរដ្ឋ ដូចជា សុវត្ថិភាពម្ហូបអាហារ(បន្លែ ផ្លែឈើ) បរិស្ថាន ទំនាស់ដីធ្លី បញ្ហាប្រព័ន្ធលូ ចរាចរណ៍ និងសេវាសាធារណៈជាដើម៕
