ខេត្តកំពង់ធំ ៖ ពាក់ព័ន្ធនិងស្រូវប្រាំងរបស់ប្រជាពលរដ្នចំនួន១០០ហិចតា ស្ថិតនៅតំបន់ខាងត្បូងអតីតក្រុមង៉ិនវុធ ក្នុងភូមិសាស្រ្តភូមិ ចតុលោក ឃុំបារាយណ៍ ស្រុកបារាយណ៍ ខេត្តកំពង់ធំ ដែលកំពុងប្រឈមជួបការខ្វះខាតទឹកបញ្ចូលស្រែប្រាំងនោះ ត្រូវបាន លោក ហាក់ ម៉ុងហួត អភិបាលស្រុកបារាយណ៍ បានផ្ដល់បទសម្ភាសជាមួយអ្នកសារព័ត៍មាន កាលពីរសៀលថ្ងៃទី១៤ ខែកុម្ភះ ឆ្នាំ២០១៩ នេះ ដោយលោកបានអះអាងថា ក្រុមការងារស្រុកបារាយណ៍ចុះទៅដល់កន្លែងស្រូវប្រាំងនោះហើយ និងកំពុងធ្វើសកម្មភាពដាក់គ្រឿងចក្រដើម្បីស្ដារប្រឡាយរំដោះទឹកចែកជូនពលរដ្ន ព្រោះការងារនេះមានឯកឧត្តម ថោង ខុន និង ឯកឧត្តម សុខ លូ បានផ្ដល់អនុសាសន៍និងសម្របសម្រួលការងារនេះ ហើយខាងស្រុកយើងក៏កំពុងតែធ្វើការងារនេះដែរ ។
កន្លងមកប្រជាពលរដ្ឋ មេភូមិ រួមអ្នកតំណាងឲ្យប្រជាពលរដ្ឋដែលខ្វះខាតទឹកទាំង ១៥គ្រួសារធ្លាប់បានស្នើរសុំគ្រឿងចក្រដើម្បីស្ដារប្រឡាយសង្រ្គោះស្រូវដែលកំពុងតែខ្វះខាតទឹកស្រោចស្របលើផ្ទៃដីបង្កបង្កើនផលចំនួន១០០ហិចតា គឺលោក ម៉េត រ៉ាមី និងលោក សឿន សុខុម ពួកគាត់ធ្លាប់បាននាំគ្នាទៅប្រាប់មេឃុំឲ្យជួយពួកគាត់ ព្រមទាំងបានធ្វើលិខិតស្នើរសុំស្ដារប្រឡាយទឹក ដោយសារប្រឡាយចាស់រាក់ ទឹកមិនអាចហូរទៅដល់ តែក្រោយមកចេះតែស្ងាត់ឈឹង មិនមានដំណោះស្រាយនោះទេ ៕
