ខេត្តកំពង់ធំ ៖ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាននិងក្រុមការងារ បានអញ្ជើញចុះសួរសុខទុក្ខអ្នកជំងឺ និងពិនិត្យការងាររបស់ក្រុមគ្រូពេទ្យស្ម័គ្រចិត្ត សមាគមសុខាភិបាលខ្មែរ នៅអាមេរិក ដែលបានមកជួយ ពិនិត្យព្យាបាលជំងឺជូនពលរដ្ឋ នៅមន្ទីរពេទ្យបង្អែក ស្រុក បារាយណ៍-សន្ទុក ខេត្តកំពង់ធំ នៅរសៀលថ្ងៃទី ១១ ខែ កុម្ភៈ ឆ្នាំ២០១៩ ។
តាមការបញ្ជាក់របស់ប្រធានក្រុមការងារ សមាគមសុខាភិបាលខ្មែរ នៅអាមេរិក គិតមកដល់ឆ្នាំ២០១៩នេះ គឺជាឆ្នាំទី៩ហើយ ដែលក្រុមគ្រូពេទ្យស្ម័គ្រចិត្តនៃសមាគមនេះ បានចុះមកពិនិត្យ និងព្យាបាលជំងឺជូនប្រជាពលរដ្ឋកម្ពុជា ដោយចល័ត តាមបណ្តារាជធានី-ខេត្តផ្សេងៗគ្នា ដែលក្នុងមួយឆ្នាំៗ គឺបានពិនិត្យព្យាបាលជំងឺជូនប្រជាជនកម្ពុជា បានប្រមាណ ៤-៥ពាន់់នាក់់។ ដូច្នេះ សរុបទាំង៩ឆ្នាំ គឺបានពិនិត្យព្យាបាលជំងឺ ជូនប្រជាជនកម្ពុជា បានសរុប ប្រមាណជាង ៤ ម៉ឺននាក់ ។
ការពិនិត្យព្យាបាលជំងឺ ជូនប្រជាពលរដ្ឋលើកទី៩នេះ ធ្វើឡើងនៅមន្ទីរពេទ្យបង្អែកស្រុកបារាយណ៍-សន្ទុក ខេត្តកំពង់ធំ ចាប់់ពីថ្ងៃទី១១ដល់១៦ ខែកុម្ភៈ ឆ្នាំ២០១៩ ដែលមានក្រុមគ្រពេទ្យស្ម័គ្រចិត្ត មកពីសហរដ្ឋអាមេរិកចំនួន ៣៥ នាក់ សរុបទាំងគ្រួពេទ្យស្ម័គ្រចិត្តកម្ពុជាផងដែរ ប្រមាណជាង ៩០ នាក់ ហើយក៏មានការចូលរួមសហការពីសំណាក់ក្រុមគ្រូពេទ្យ នៅមន្ទីរពេទ្យបង្អែក ស្រុក បារាយណ៍-សន្ទុក ផងដែរ ។
លោក ញ៉ែម ពីញ ប្រធានការិយាល័យប្រតិបត្តិស្រុកបារាយណ៍បានឲ្យដឹងថា ក្នុងរយៈពេលនៃការព្យាបាលគឺ 5 ថ្ងៃ ដោយក្នុងមួយថ្ងៃទទួលអ្នកជំងឺ ៨០០ នាក់ មកព្យាបាលគឺផ្ដោតសំខាន់់ទៅលើមនុស្សចាស់់មកពិនិត្យដូចជាជំងឺឆ្អឹង ជំងឺសន្លាក់់ ជំងឺលើសឈាមជាដើម ។
ក្នុងការចុះសួរសុខទុក្ខ ឯកឧត្តមរដ្ឋមន្រ្តី ក៏បានផ្តាំផ្ញើដល់បងប្អូនប្រជាពលរដ្ឋ ត្រូវយកចិត្តទុកដាក់អំពីការព្យាបាលក៏ដូចជាគិតពីបញ្ហាសុខភាព ជាពិសេសត្រូវមានអនាម័យ ហើយទៅធ្វើយ៉ាងណា ត្រូវមកដល់មន្ទីរពេទ្យដើម្បីឱ្យគ្រូពេទ្យមានការព្យាបាលឲ្យបានទាន់់ពេលវេលា ។ក្នុងនោះ ឯកឧត្តមរដ្ឋមន្រ្តី ក៏បានថ្លែងអំណរគុណដល់ក្រុមគ្រូពេទ្យស្ម័គ្រចិត្តដែលបានលះបង់ថវិកាសម្ភារៈផ្ទាល់ខ្លួន មកជួយប្រជាពលរដ្ឋនៅក្នុងខេត្តកំពង់ធំ ក៏ដូចជាប្រជាពលរដ្ឋទូទាំងប្រទេសក្នុងព្រះរាជាណាចក្រកម្ពុជា៕ (ដោយ តេច ឆេង)
