ខេត្តកំពង់ធំ ៖ កាលពីថ្ងៃទី២៩ ខែមករា គ.ស ២០១៩ វេលាម៉ោង១៥: ៣០នាទី មានករណីអគ្គិភ័យ០១លើកឆេះចំការក្រញូងរបស់រដ្ឋបាលព្រៃឈើខេត្តកំពង់ធំ អស់៣០ហិចតាលើផ្ទៃចំកាទំហំ៦០០ហិចតា ដែលគេដាក់ការសង្ស័យថាមានជនខិលខូចលួចដុត។
បើតាមការបញ្ជាក់របស់លោក តិប ញ្ញាតា ជានាយរងអធិការដ្ឋានរដ្ឋបាលព្រៃឈើខាងជើងបឹងទន្លេសាប និង ជាប្រធានស្ថានីយ៏ស្រាវជ្រាវនិងស្តារព្រៃឈើក្នុងខេត្តកំពង់ធំបានបញ្ជាក់ថា ករណីឆេះព្រៃក្រញូងរបស់រដ្ឋនៅចំណុច អូរបឹងរ៉ុង ភូមិថ្មសំលៀង ឃុំក្រយា ស្រុកសន្ទុក គឺមូលហេតុដោយសារមានជនខិលខូចលួចដុត ទំនងប្រហែលជាខឹង និងក្រុមសមត្ថកិច្ចល្បាតព្រៃ ដែលនៅការពារតែងតែហាមឃាតមិនឲ្យមានការឆ្លងកាត់តំបន់នេះ។ ហើយនៅថ្ងៃភ្លើងឆេះនោះ គឺពួកគាត់បានឃើញម៉ូតូមួយជិះដោយគ្នាពីរនាក់ បន្តិចក្រោយមកស្រាប់តែឃើញភ្លើងឆេះតែម្តង។ ក្រោយពីពេលឃើញដូច្នេះ ក៏បានធ្វើអត្តរាគមន៍កម្លាំងរថយន្តអគ្គិភ័យបានចេញប្រតិបត្តិការអន្តរាគមន៍ ក្រោមការចាត់បញ្ជារផ្ទាល់ពីលោក អ៊ុក កុសល ស្នងការនគរបាលខេត្តកំពង់ធំ ធ្វើការពន្លត់អគ្គិភ័យនិងសង្រ្គោះដោយប្រើប្រាស់រថយន្តអគ្គិភ័យសរុបចំនួន ០២គ្រឿង ក្នុងនោះ រថយន្ត០១គ្រឿងរបស់អធិការដ្ឋាននគរបាលស្រុកសន្ទុក និងរថយន្ត០១គ្រឿងទៀតរបស់អធិការដ្ឋាននគរបាលស្រុកបារាយណ៍។ លោកបន្ថែមថា នារដូវនេះក្រញូងលាស់ស្លឹកថ្មីរួមនិងឈើក្រញូងនៅតំបន់នោះមានដើមធំផង មិនបណ្តាលឲ្យខូចខាតទាំងស្រុងនោះទេ ។
បើធ្វើការវាយតម្លៃផលខូចខាតទៅតាមលក្ខណៈប្រពៃណីប្រហែល៥០ភាគរយ ប៉ុន្តែតាមលក្ខខណៈបច្ចេកទេស នឹងធ្វើការវាយតម្លៃរបស់ក្រុមអ្នកជំនាញនៅពេលក្រោយ ៕ ដោយ តេច ឆេង
