ខេត្តបន្ទាយមានជ័យ ៖ នៅថ្ងៃទី២៨ ខែមករា ឆ្នាំ២០១៩ វេលាម៉ោង១៥និង០០នាទី លោកវរសេនីយ៍ទោ សៅ សារឿន អធិការស្រុកថ្មពួក បានដឹកនាំកម្លាំងជំនាញនិងកម្លាំងប៉ុស្តិ៍គោករមៀត ចុះបង្ក្រាបទីតាំងជល់មាន់០១កន្លែង នៅចំណុចផ្ទះម្ចាស់ឈ្មោះ ព្រំ សាខន ភេទប្រុស អាយុ៦៣ឆ្នាំ រស់នៅភូមិបន្ទាយមានរឹទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យ ។
ក្នុងកិច្ចប្រតិបត្តិការបង្ក្រាបនេះ សមត្ថកិច្ចបានធ្វើការដកហូតសម្ភារ: វត្ថុតាងដូចខាងក្រោម ៖ ម៉ូតូចំនួន ១៨គ្រឿង មាន់ជល់ ចំនួន១៤ក្បាល អង្រុតក្រុងមាន់ចំនួន១៧ សៃវៀនចំនួន០១ឈុត ជញ្ជើងថ្លឹងមាន់ចំនួន០២ នាឡិកាចំនួន០១ កំណល់អង្គុយចំនួន១២ តុអង្គុយចំនួន០៧ ឧប្បករណ៍ស្អំចំនួន០១ឈុត ។
លោក សៅ សារឿន អធិការនគរបាលស្រុកថ្មពួក បានប្រាប់ឱ្យដឹងថា ៖ ក្នុងមូលដ្ឋានគ្មានល្បែងស៊ីសង ដ៏រាបណា ចូលរួមនិងសហការទាំងអស់គ្នា។ បច្ចុប្បន្នវត្ថុតាង និងសម្ភារ:ខាងលើ យកមកកាន់អធិការដ្ឋាននគរបាលស្រុកថ្មពួក ដើម្បីរៀបចំឯកសារ បញ្ជូនទៅការិយាល័យជំនាញនៃស្នងការដ្ឋាននគរបាលខេត្តបន្ទាយមានជ័យ ទៅតាមនីតិវិធីនៃច្បាប់។
ក្នុងការចុះប្រតិបត្តិការខាងលើនេះ គឺគោរពតាមបទបញ្ជាលោកឧត្តមសេនីយ៍ទោ អាត់ ខែម ស្នងការនគរបាលខេត្ត ដែលលោកតែងតែណែនាំដល់កងកម្លាំងទាំងអស់ ត្រូវបង្ក្រាបរាល់ល្បែងស៊ីសងក្នុងមូលដ្ឋាន ជាពិសេសកីឡាបក្សីនេះតែម្តង៕
