ខេត្តកំពង់ឆ្នាំង ៖ ប្រជាពលរដ្ឋឃុំស្វាយជ្រុំ ជាច្រើនគ្រួសារធ្វើការតវ៉ាជាថ្មី ដោយសារមេការក្រុមហ៊ុនរបស់លោក ឧកញ៉ា សុខ ប៊ុន នៅតែបន្តធ្វើបាបប្រជាពលរដ្ឋឥតឈប់ឈរ រហូតដល់យកកំលាំងកងរាជអាវុធហត្ថខេត្ត មកចាប់ត្រាក់ទ័រពួកគាត់ដែលជួលគេយកមកធ្វើការភ្ជួររាស់ស្រែទៀតផង ។
នៅរសៀលថ្ងៃទី២៧ ខែមករា ឆ្នាំ២០១៩ នៅសាលាឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ប្រជាពលរដ្ឋជាច្រើនគ្រួសារដែលរស់នៅក្នុងឃុំស្វាយជ្រំ ស្រុករលាប្អៀរ ខេត្តកំពង់ឆ្នាំង បានលើកគ្នាសារជាថ្មីមកសាលាឃុំ ដើម្បីធ្វើការតវ៉ានឹងមេការក្រុមហ៊ុនរបស់លោកឧកញ៉ា សុខ ប៊ុន ដែលតែងតែបានធ្វើបាបប្រជាពលរដ្ឋអស់រយៈពេលរាប់ឆ្នាំមកហើយ ។
ការពិតប៉ុន្មានថ្ងៃមុននេះ មេការរបស់លោកឩកញ៉្ញាម្នាក់នោះ បានដឹកនាំនិងបញ្ជារអោយមន្ត្រីកងរាជអាវុធហត្ថខេត្ត ធ្វើការឃាត់ខ្លួនប្រជាពលរដ្ឋ២នាក់ រួមនិងត្រាក់ទ័រមួយគ្រឿង ដែលពួកគាត់បានជួលយកទៅឈូសឆាយលើដីស្រែរបស់គាត់ទៀតផង ។
រាល់ទង្វើបែបនេះ ត្រូវបានអាជ្ញាធរឃុំស្វាយជ្រុំ ចាត់ទុកជាអំពើសាហាវព្រៃផ្សៃលើប្រជាពលរដ្ឋស្លូតត្រង់ ក្នុងឃុំរបស់គាត់ដែលមានមុខរបរធ្វើស្រែ ។
ស្ត្រីម្នាក់ឈ្មោះ កែវ ផល្លា មានទីលំនៅឃុំស្វាយជ្រុំ ស្រុករលាប្អៀរ បាននិយាយអះអាងប្រាប់អ្នកសារព័តមានថា គាត់បានទិញដីនៅចំណុចអូររំដេញ ស្ថិតក្នុងភូមិស្វាយចេក ឃុំស្វាយជ្រុំ ស្រុករលាប្អៀរ តាំងពីឆ្នាំ 2008មកម្លេះ ក្រោយមកដោយការខ្វះខាតជីវភាពគាត់បានលក់ដីនេះបន្តទៅឲ្យស្ត្រីម្នាក់នៅរាជធានីភ្នំពេញ ក្រោយមកស្រ្តីជាម្ចាស់ដី បានអោយគាត់ជួលត្រាក់ទ័រទៅឈូសពង្រាបដីនោះដើម្បីធ្វើស្រែ ព្រោះមានក្រសួងអភិវឌ្ឍន៍ជនបទបានជីកប្រឡាយទឹកជិតដីរបស់ពួកគាត់ រួចនៅថ្ងៃទី ២៦ ខែមករា ឆ្នាំ២០១៩ ខណៈពេលត្រាក់ទ័រកំពុងឈូសពង្រាបដីស្រែ ស្រាប់តែឈ្មោះ លន់ ឡន ហៅឡុង បាននាំមន្ត្រីកងរាជអាវុធហត្ថ ទៅចាប់ទាំងមនុស្សនិងត្រាក់ទ័រ យកមកទីបញ្ជាការដ្ឋានកងរាជអាវុធហត្ថខេត្ត ដែលមកដល់ពេលនេះទើបតែត្រូវបានដោះលែងអ្នកបើកត្រាក់ទ័រ ពីរនាក់ ប៉ុន្តែត្រាក់ទ័រនៅមិនទាន់ដោះលែងអោយមកវិញនោះឡើយ។ ស្ត្រីខាងលើដដែលបានបញ្ជាក់ថា ប្រជាពលរដ្ឋអ្នកឃុំស្វាយជ្រុំមានក្តីវេទនាខ្លាំងណាស់ ដោយសារតែឈ្មោះឡុង ជាមេការក្រុមហ៊ុនរបស់ឧកញ៉ានៅរាជធានីភ្នំពេញ តែងតែដើរគំរាមនិងធ្វើបាបពួកគាត់រហូត ។
ប្រជាពលរដ្ឋដែលរងកាធ្វើបាបគំរាមកំហែងបាននិយាយអោយដឹងថា កន្លងមកឈ្មោះ លន់ឡន ហៅឡុងនេះដើរបំផុសប្រជាពលរដ្ឋអោយលក់ដីឲ្យក្រុមហ៊ុនទៅ ក្រុមហ៊ុននឹងបង្កើតរោងចក្រ សាលារៀន មន្ទីពេទ្យ នៅជិតផ្ទះ ដោយមិនបាច់អោយកូនទៅធ្វើការនៅក្រៅប្រទេសនិងទៅរៀននៅទីឆ្ងាយៗ ពិសេសមិនបាច់ទៅព្យាបាលឆ្ងាយនោះទេ ។ ប្រជាពលរដ្ឋក៏ព្រមលក់ទៅឱ្យគាត់ ខ្លះមួយហិចតាបាន 300 ដុល្លារ ខ្លះ400ដុល្លារជាដើម។ ក្នុងនាមគាត់តំណាងឲ្យប្រជាពលរដ្ឋរស់នៅក្នុងឃុំស្វាយជ្រុំ សូមអំពាវនាវដល់អាជ្ញាធរខេត្ត ពិសេសប្រមុខ រាជរដ្ឋាភិបាល សូមមេត្តាជួយប្រជាពលរដ្ឋរស់នៅក្នុងឃុំស្វាយជ្រុំ ដែលរងទុក្ខបុកម្នេញដោយសារបុគ្គលឈ្មោះ លន់ឡុង ហៅឡេង នេះផង។
នៅរសៀលថ្ងៃដដែលនេះដែរ លោក យីភួន មេឃុំស្វាយជ្រំ ស្រុករលាប្អៀរ បានអោយបណ្តាញព័តមានដឹងថា ប្រជាពលរដ្ឋបានយកត្រាក់ទ័រទៅភ្ជួរស្រែលើដីរបស់គាត់សោះ ហេតុអីឈ្មោះលន់ឡន ហៅឡុង បញ្ជាឲ្យកងរាជអាវុធហត្ថទៅចាប់គ្នាបែបនេះទៅវិញ ។ លោកបានបញ្ជាក់ថាឈ្មោះឡុងនេះជាមេការរបស់ឧកញ៉ា សុខ ប៊ុន ដែលបានទិញដីជាង១ពាន់ហិកតា នៅក្នុងឃុំស្វាយជ្រុំ ។ ក៏ប៉ុន្តែក៏មានប្រជាពលរដ្ឋជាច្រើនគ្រួសារដែលមិនទាន់បានលក់ទៅឱ្យឈ្មោះឡុងនេះដែរ ដែលមានផ្ទៃដីប្រមាណជាង ១៥០ហិកតា ផ្ទៃដីជាង១៥០ហិកតានេះ គឺនៅក្នុងរង្វង់គ្របដណ្តប់ពីលើរបស់ឈ្មោះឡុង ដែលជាមេការរបស់លោក ឧកញ៉ា ។ ប៉ុន្តែពេលប្រជាពលរដ្ឋទៅបង្កបង្កើនផលគឺមិនបានទេ សូម្បីតែការលក់ដូរក៏មិនបានដែរ បើចង់លក់លុះត្រាតែលក់អោយក្រុមហ៊ុន ។ កន្លងទៅឈ្មោះឡុង នេះក៏ធ្លាប់គំរាមកំហែងមិនឲ្យរូបលោក ចុះហត្ថលេខាលើការទិញលក់ដីរបស់ប្រជាពលរដ្ឋឡើយ ដែលធ្វើឲ្យប្រជាពលរដ្ឋមានការយល់ច្រឡំមកលើគាត់ ដែលជាអាជ្ញាធរដែនដីទៅវិញ ។ លោកមេឃុំស្វាយជ្រុំបានបញ្ជាក់ទៀតថាឈ្មោះឡុងនេះ កាលពីរដូវទឹកឡើង ប្រជាពលរដ្ឋមកតវ៉ា បានសន្យាចំពោះមុខប្រជាពលរដ្ឋ និងអ្នកសារព័ត៌មានថា នៅពេលទឹកស្រក បងប្អូនប្រជាពលរដ្ឋ មានដីនៅចំណុចណា សូមទៅធ្វើស្រែជាធម្មតាចុះ ហើយរឿងដីចង់លក់អោយអ្នកណាក៍បាន ក្រុមហ៊ុនមិនបង្ខំនោះទេ ។ តែធាតុពិត ពេលបងប្អូនទៅធ្វើស្រែ បែជាហៅកងរាជអាវុធហត្ថទៅចាប់គ្នាទៅវិញ ពិតជាសាហាវព្រៃផ្សៃពេកហើយធ្វើមកលើប្រជាពលរដ្ឋ ។ កន្លងទៅលោកចេះតែសម្របសម្រួលប្រើភាពអត់ធ្មត់ជាមួយនឹងឈ្មោះឡុង ដែលជាមេការក្រុមហ៊ុនរបស់លោកឧកញ៉ា សុខ ប៊ុន នេះច្រើនហើយ ។ ប៉ុន្តែពេលនេះលោកទ្រាំលែងបានហើយ ដោយសារតែការធ្វើបាបប្រជាពលរដ្ឋខ្លាំងពេកនិងមានការគំរាមមកលើលោកញយដងពេកហើយ ។ ហេតុនេះហើយក្នុងនាមលោកជាអាជ្ញាធរឃុំស្វាយជ្រុំ សូមសំណូមពរដល់អាជ្ញាធរខេត្ត ពិសេសប្រមុខរាជ រដ្ឋាភិបាល សូមមេត្តាជួយដោះស្រាយលើបញ្ហានេះផង។
ពាក់ពន្ធ័និងករណីខាងលើនេះ លោក លន់ ឡន ហៅឡុង ដែលជាមេការក្រុមហ៊ុន ដែលរងការចោទប្រកាន់ខាងលើបាននិយាយដោយខ្លីថា លោកមិនបានចាប់គ្រឿងចក្រនោះទេ គឺមន្រ្តីជំនាញនោះទេជាអ្នកចាប់ ហើយពេលនេះគេដោះលែងវិញអស់ហើយ ប៉ុន្តែម្ចាស់គ្រឿងចក្រមិនមកយក ព្រោះបានបា្រប់ថាកំពុងកោសខ្យល់ ។
ដោយឡែកលោក ងិន ហ៊ុន ប្រធានមន្ទីរកសិកម្មរុក្ខាប្រមាញ់និងនេសាទខេត្តវិញបានប្រាប់ថា លោកមិនបានបញ្ជាឲ្យចាប់គ្រឿងចក្រនោះទេ ព្រោះពេលអោយមន្ត្រីជំនាញចុះទៅពិនិត្យឃើញថា ដីនោះជាដីស្រែរបស់ប្រជាពលរដ្ឋ ធ្វើស្រែរាល់ឆ្នាំ មិនមែនជាដីព្រៃលិចទឹកទេ ហើយលោកក៏បានឲ្យដោះលែងមនុស្សនិងត្រាក់ទ័រទៅវិញ ប៉ុន្តែដល់ម៉ោងនេះបើគេមិនដោះលែងជារឿងរបស់គេ ។
ចំណែកឧកញ៉ាសុខប៊ុនពុំអាចសុំការបំភ្លឺបានទេព្រោះពុំមានលេខទូរសព្ទ័៕
