ខេត្តព្រះសីហនុ ៖ ប្រជាពលរដ្ឋរាប់រយនាក់ ប្រដាប់ដោយកង់ឡាន និងកញ្ចុះរ៉ឺម៉ក បានព្យាយាមបិទផ្លូវនិងរារាំងដោយការដុតកង់ឡាន ផ្សែងខ្មួលខ្មាញ់ ខណៈដែលក្រុមការងារគណៈបញ្ជាការខេត្តព្រះសីហនុ ដឹកនាំដោយលោក ផៃ ប៊ុនវណ្ណ: អភិបាលរងខេត្ត សហការជាមួយកម្លាំងប៉ូលិស ចុះដើម្បីធ្វើការវាស់វែងដីមួយកន្លែងទៅឲ្យលោកជំទាវ ហុង ស៊ួនស្ថិតនៅខាងត្បូងវត្តអូរត្រេះ ភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ កាលពីព្រឹកថ្ងៃទី១៧ ខែមករា ឆ្នាំ ២០១៩។
គណៈបញ្ជាការខេត្តព្រះសីហនុ ដឹកនាំដោយលោក ផៃ ប៊ុនវណ្ណ: អភិបាលរងខេត្តបានថ្លែងទៅកាន់ពលរដ្ឋថា វត្តមានរបស់លោកដែលចុះមកនេះ ដើម្បីវាស់វែងដីចំណុចនេះជូនលោកជំទាវ ហុង ស៊ួន (ភរិយាឧកញ៉ា ស៊ីវ គង់ទ្រីវ) ហើយបើបងប្អូនមានដីប៉ុន្មាន ទំហំប៉ុន្មាន គាត់ដោះស្រាយជូនបងប្អូន។ ប៉ុន្តែប្រជាពលរដ្ឋចោទថា អាជ្ញាធរកំពុងចង់បណ្ដេញពួកគាត់និងវាស់វែងដីគម្របព្រៃឈើ អនុក្រឹត្យរបស់រដ្ឋ ដែលពលរដ្ឋកំពុងរស់នៅជាក់ស្ដែងជាច្រើនឆ្នាំមកនេះ ឲ្យទៅបុគ្គលអ្នកមានលុយនិងមានអំណាចមហាសាលម្នាក់នៅខេត្តព្រះសីហនុ គឺលោកជំទាវ ហុង ស៊ួន និងឧកញ៉ា ស៊ីវ គង់ទ្រីវ ។
ប្រជាពលរដ្ឋងឿងឆ្ងល់ថា ហេតុអ្វីគាត់រស់នៅលើដីរដ្ឋនេះយូរឆ្នាំមកហើយ បែរជាដល់ពេលដីឡើងថ្លៃ គណ:បញ្ជាការខេត្ត លោក ផៃ ប៊ុនវណ្ណ: នាំកម្លាំងប៉ូលិសមកវាស់វែងដីរបស់ពួកគាត់នេះទៅឲ្យបុគ្គលម្នាក់គឺ ជំទាវ ហុងស៊ួន? ខណៈដីទាំងនេះជាដីអនុក្រឹត្យ និងគម្របព្រៃឈើ ឆ្នាំ២០០២ បាននិរាករណ៍អស់ទៅហើយ ដូច្នេះមានតែរដ្ឋបាលខេត្តព្រះសីហនុ យកប័ណ្ណកម្មសិទ្ធដែលងាប់តាំងពីឆ្នាំ២០០២ទៅហើយនេះព្យាយាមឲ្យរស់ឡើងវិញ ដើម្បីយកដីឲ្យជំទាវតែម្នាក់ ធ្វើឲ្យប្រជាពលរដ្ឋរាប់រយនាក់ ស្រែកយំរងភាពអយុត្តិធម៌បែបនេះ..??។ ពួកគាត់បានអំពាវនាវទៅដល់ថ្នាក់ដឹកនាំ សម្ដេច តេជោ ហ៊ុន សែន នាយករដ្ឋមន្រ្តី មេត្តាជួយដល់ពួកគាត់ផង ៕
