ខេត្តព្រះសីហនុ ៖ កាលពីវេលាម៉ោងប្រមាណជិត៧យប់ ថ្ងៃទី១៦ ខែមករា ឆ្នាំ ២០១៩ ក្រុមចោរប្រដាប់អាវុធ២នាក់បាន ចូលទៅធ្វើសកម្មភាពប្លន់ក្នុងផ្ទះប្រជាពលរដ្ឋមួយកន្លែង ស្ថិតនៅត្រង់ចំណុចក្បែរឱសថស្ថានកំពង់សោមថ្មីឈុត នៅក្នុងភូមិ៣ សង្កាត់លេខ៤ ក្រុងព្រះសីហនុ ខេត្តព្រះសីហនុ នេះបើតាមពត័មានដែលទទួលបាន។
តាមការរៀបរាប់របស់ជនរងគ្រោះ បានឱ្យដឹងថា ក្រុមចោរបានធ្វើសកម្មភាពដោយប្រើប្រាស់អាវុធ បណ្តាលបុរសម្នាក់ជាម្ចាស់ផ្ទះរងរបួសត្រង់ក្បាលពោះដោយនៅវេលាកើតហេតុរូបគាត់កំពុងចូលក្នុងបន្ទប់ទឹក ក៏ស្រាប់តែមានជនសង្ស័យចំនួន២នាក់បានស្ទុះចូលមកក្នុងបន្ទប់ទឹករបស់គាត់ ហើយបម្រុងយកកាំបិតចាក់ ។ ចំណែកចោរម្នាក់ទៀតបានទាញកាំភ្លើងមកភ្ជង់កូនស្រីរបស់គាត់ ប៉ុន្តែគាត់ធ្វើការប្រតាយប្រតប់រហូតរងរបួស ដោយសារក្រុមចោរចាក់ចំក្បាលពោះនឹងកាំបិតមុននឹងរត់គេចខ្លួន ចំណែកសមត្ថកិច្ចកំពុងស៊ើបអង្កេត៕
