ខេត្តកំពង់ចាម ៖ សមត្ថកិច្ចខេត្តកំពង់ចាមបានឃាត់ខ្លួនឧកញ៉ា វ័ន ប៊ុនថៃ ហៅ ថៃ ដែលជាឈ្មួញឈើដ៏ល្បីល្បាញម្នាក់យកទៅសួរនាំភ្លាមៗ ពាក់ព័ន្ធករណីបង្កអំពើហិង្សាក្នុងខារ៉ាអូខេវីឡាកាលពីថ្ងៃទី ០៥ ខែមករា ឆ្នាំ២០១៩ នៅខេត្តកំពង់ចាម ហើយត្រូវបានដោះលែងវិញដូចចិត្ត បន្ទាប់ពីឧកញ៉ាជើងខ្លាំងរូបនេះរត់ការដល់សមត្ថកិច្ច និងស្ថាប័នពាក់ព័ន្ធផ្សេងៗទៀត ។
នៅមុនពេលកើតហេតុ ឧកញ៉ា វ័ន ប៊ុនថៃ និងបក្សពួកបានបបួលគ្នាទៅចូលផឹកស៊ី នៅក្នុងហាងខារ៉ាអូខេវីឡា ក្នុងបន្ទប់ 6666 លុះពេលផឹកស្រវឹងជោគជាំ ក៏បានបៀតបៀននារីដែលអង្គុយក្បែខ្លាំងៗ ធ្វើឲ្យនាងខ្មាស់និងទ្រាំមិនបាន ក៏ដើរចេញពីបន្ទប់នោះបាត់ទៅ ។ ក្រោយមក ឧកញ៉ាជើងខ្លាំងបានស្រែកឡូឡាអោយអ្នកបម្រើការក្នុងបន្ទប់រកនារីអោយទៀត តែគ្មានអ្នកណាហ៊ានចូលមកអង្គុយទេ ធ្វើអោយឧកញ៉ាខឹងក៏ប្រើអំពើហិង្សាវាយក្បាលចាប់បោចសក់នារីអ្នកបម្រើក្នុងបន្ទប់ទាញទៅក្រោយ ក្លាយជាជម្លោះពាក្យសម្តីនិងមានហិង្សាកើតឡើង ផ្អើលហាងខារ៉ាអូខេវីឡាតែម្តង ខាងលើនេះជាប្រភពពត័មានដែលទទួលបាន។
ប្រភពបានបញ្ជាក់ថា លោក គួច ចំរើន អភិបាលខេត្តកំពង់ចាម បានបញ្ជាកម្លាំងនគរបាលព្រហ្មទណ្ឌ និងកងរាជអាវុធហត្ថខេត្តឲ្យចុះទៅនាំខ្លួនឧកញ៉ា វ័ន ប៊ុនថៃ មកសួនាំពាក់ពន្ធ័ប្រើអំពើហិង្សាក្នុងហាង KTV វីឡា នាម៉ោង៨យប់ថ្ងៃទី០៥ ខែមករា ក្រោយពីទទួលបានពត័មានអំពើហិង្សាកើតឡើង ។
លោក គួច ចំរើន អភិបាលខេត្តកំពង់ចាម បានប្រាប់បញ្តាញសារព័ត៌មានឲ្យដឹងនៅព្រឹកថ្ងៃទី០៦ ខែមករានេះថា សមត្ថកិច្ចពិតជាបានឃាត់ខ្លួនឧកញ៉ា វ័ន ប៊ុនថៃ ពិតប្រាដកមែន ដែលពាក់ព័ន្ធករណីប្រើប្រាស់អំពើហិង្សាក្នុងខារ៉ាអូខេវីឡា ។
ក្រោយទទួលព័ត៌មានពាក់ព័ន្ធករណីអំពើហិង្សានេះ លោកបានបញ្ជាកម្លាំងនគរបាល និងអាវុធហត្ថចុះធ្វើការស្រាវជ្រាវ និងឃាត់ខ្លួនតែម្ដង ។
តាមព័ត៌មានក្រៅផ្លូវការបានឲ្យដឹងថា ខណៈដែលមានការសម្របសម្រួលជាមួយម្ចាស់ខារ៉ាអូខេ វីឡា ក្រោយឃាត់ខ្លួនមិនបានប៉ុន្មានផង ឧកញ៉ា វ័ន ប៊ុនថៃ ត្រូវបានគេដោះលែងវិញហើយ ៕
