ខេត្តមណ្ឌលគិរី ៖ តាមពត័មានឲ្យដឹងថា សមត្ថកិច្ចខេត្តមណ្ឌលគីរីបានឃាត់ខ្លួនជនសង្ស័យ៥នាក់ ដែលពាក់ព័ន្ធនឹងករណីបើករថយន្តប្រដេញរថយន្តដឹកឈើ បណ្តាលឲ្យកើតមានគ្រោះថ្នាក់ចរាចរណ៍ ហើយបណ្តាលឲ្យមានមនុស្សស្លាប់ និងរងបួស កាលពីថ្ងៃទី២៧ ខែធ្នូ ឆ្នាំ២០១៨ នៅស្រុកកែវសីមា ដើម្បីយកមកសួរនាំ ។
ប្រតិបត្តិការឃាត់ខ្លួនជនសង្ស័យនេះដឹកនាំដោយលោកឧត្ដមសេនីយ៍ត្រី សូ សុវណ្ណ ស្នងការរងទទួលព្រហ្មទណ្ឌនៅវេលាម៉ោង២២:៤១នាទីថ្ងៃ២៨ធ្នូ២០១៨ ដោយ កម្លាំងនគរបាលបាលខេត្ត បានបញ្ជូនខ្លួនអ្នកពាក់ព័ន្ធទៅកាន់ស្នងការដ្ឋាននគរបាលខេត្តមណ្ឌលគិរី ដើម្បីបន្តនិតិវិធីទៅតាមផ្លូវច្បាប់។
ចំណែកជនសង្ស័យទាំង៥នាក់នោះរួមមាន ៖ ០១.លោក វរសេនីយ៍ទោ យូ រ៉ាវុធ ប្រធានស្នាក់ការ ការិយាល័យទី២កងទ័ពជើងគោក (2B)ប្រចាំខេត្តមណ្ឌលគិរី / ០២.លោក សៀង ចំរ៉ុង នគរបាល អត្តសញ្ញាណកម្ម / ០៣.លោក វ៉ាន់ រួន នគរបាលសេដ្ឋកិច្ចក្រសួងមហាផ្ទៃ / ០៤.លោក ស្រ៊ុន ឈួន នាយសង្កាត់រដ្ឋបាលព្រៃឈើ ០៥ វ,ត្រី ប៉ង់ កានួត នាយរងការិយាល័យយោធាខេត្តមណ្ឌលគិរី។ ចំណែកឈ្មោះសៅ សំណាង ctv online និងម្នាក់ទៀតឈ្មោះនី ត្រូវរត់គេចខ្លួនបាត់ស្រមោល ។
បើយោងតាមការបញ្ជាក់របស់អធិការរងស្រុកកែវសីមាលោកបានឲ្យដឹងថា ដោយឡែកលោកសឿង ចំរ៉ុង មិនមានពាក់ព័ន្ធក្នុងរឿងប្រដេញរថយន្តទេ គឺលោកអ្នកបញ្ជាឲ្យទៅមើលកន្លែងកើតហេតុ ព្រោះមានពលរដ្ឋបានរាយការណ៍ថាមានរថយន្ដប្រដេញគ្នាក្រឡាប់បង្កឲ្យមនុស្សស្លាប់ ដូចនេះទើបលោកបញ្ជាឲ្យទៅ ក្នុងនាមអាជ្ជាធរមូលដ្ឋានហើយរាយការណ៍មកលោកដើម្បីសង្គ្រោះមនុស្សបើហេតុការណ៏ធ្ងន់ធ្ងរ៕
