ខេត្តសៀមរាប ៖ កម្លាំងសង្កាត់រដ្ឋបាលព្រៃឈើបាគង សហការជាមួយផ្នែករដ្ឋបាលព្រឈើបន្ទាយស្រី ចាប់បានរថយន្តហាយឡែនដឺដឹកសត្វព្រៃមួយគ្រឿង កំពុងសណ្ដោងគ្នាតាមផ្លូវ។ ហេតុការណ៍បង្ក្រាបនេះធ្វើឡើងនៅវេលាម៉ោង១៥និង៣០នាទី ថ្ងៃទី២៤ ខែធ្នូ ឆ្នាំ២០១៨ នៅតាមផ្លូវខាងក្រោយសណ្ឋាគារអង្គរអេរ៉ា ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប។
ក្រោយពេលឃាត់រថយន្ដបាន ពិនិត្យឃើញសត្វប្រភេទអណ្តើកនិងអន្សង ត្រូវបានសមត្ថកិច្ចជំនាញអូសយកមករក្សាទុកផ្នែករដ្ឋបាលព្រៃឈើដើម្បីថ្លឹងគឺឡូ។ មន្ត្រីផ្នែករដ្ឋបាលព្រៃឈើបន្ទាយស្រីលោក លី សុផា បានឲ្យដឹងថា ដោយមានបណ្តាញរាយការណ៍មកពីព្រំដែនមកថា មានរថយន្តដឹកសត្វព្រៃ ខាងលោកបានចាំល្បាតអស់ជាច្រើនថ្ងៃ ទើបតែប្រទះឃើញរថយន្តនេះកំពុងសណ្តោងគ្នា រួចខាងលោកក៏ធ្វើការស្ទាក់ចាប់បានភ្លាមៗតែម្តងុ។ លោកបន្តថា ម្ចាស់រថយន្ត មិនស្គាល់អត្តសញ្ញាណទេ បន្ទាប់ពីសមត្ថកិច្ចឃាត់រថយន្តរួច ក៏នាំគ្នាបើករថយន្តមួយគ្រឿងទៀតគេចខ្លួនបាត់អស់។
លោកបានអោយដឹងថា សត្វអណ្តើកចំនួន៤៧៨គីឡូក្រាមស្មើនិង៧៨ក្បាល សត្វអន្សងចំនួន២១៩គីឡូក្រាមស្មើនិង៥៣ក្បាល។
បន្ទាប់ពីរឹបអូសយកមកផ្នែករដ្ឋបាលព្រៃឈើបន្ទាយស្រីរួចមកកម្លាំង សមត្ថកិច្ចជំនាញបានដកហូតយករថយន្តល្មើសច្បាប់យកមករក្សាទុក រីឯសត្វព្រៃនិងត្រូវយកទៅព្រលែងនៅបឹងទន្លេសាប៕
