ខេត្តកំពង់ធំ ៖ នៅព្រលប់ថ្ងៃទី៨ ខែធ្នូ ឆ្នាំ២០១៨ នៅរមណីយដ្ឋានបឹងសំរិទ្ធ ស្រុកបារាយណ៍ ខេត្តកំពង់ធំ បានរៀបចំ ពិធីបិទបញ្ចប់ការបោះជំរុំកាយរឹទ្ធិថ្នាក់ជាតិលើកទី៣ក្នុងខេត្តកំពង់ធំក្រោមប្រធានបទសន្តិភាពនិងការអភិវឌ្ឍន៍ ក្រោមអធិបតីភាពឯកឧត្តម តូច ជឿន អគ្គនាយកនៃអគ្គនាយកដ្ឋានក្រសួងអប់រំ យុវជន និងកីឡា អមដោយឯកឧត្តម ហួន វ៉ាននិត អភិបាលរងខេត្តកំពង់ធំ និងលោក យ៉ូវ សេងគុណ នាយករដ្ឋបាលសាលាខេត្តកំពង់ធំ និងអាជ្ញាធរស្រុកបារាយណ៍ព្រមទាំងអ្នកមុខអ្នកការចូលរួមជាច្រើននាក់ទៀត ។
លោក គង់ សុវណ្ណរ៉ា ប្រធាននាយកដ្ឋានសហប្រតិបត្តិការកាយរឹទ្ធិ នៃក្រសួងអប់រំ យុវជន និងកីឡា បាន មានប្រសាសន៍ថា ការបោះជុំកាយរឹទ្ធិនេះ មានការចូលរួមកាយរឹទ្ធិស្ម័គ្រចិត្ត កាយរឹទ្ធិសហគមន៏ កាយរឹទ្ធិជាតិកម្ពុជា រាជធានីនៅភ្នំពេញ កាយរឹទ្ធិជាតិកម្ពុជា ទាំង២៥ខេត្តចូលរួមផងដែរ ក្នុងគោលបំណងអប់រំកាយរឹទ្ធិ លើផ្នែកទាំង៥មាន អប់រំផ្លូវកាយ បញ្ញា ស្មារតី ផ្លូវសង្គម និងផ្លូវអាវេគ និងឲ្យពួកគេរៀនរស់ដោយខ្លួនឯង ជួយខ្លួនឯងបាន រស់នៅជាមួយធម្មជាតិ ការបង្កើតវឌ្ឍនភាពចេះស្រឡាញ់គ្នា ពីក្រុមតូចទៅក្រុមធំ ពីខេត្តមួយទៅខេត្តមួយ ពីប្រទេសមួយ ទៅប្រទេសមួយ ដើម្បីបង្កីនចំណងមិត្តភាព សាមគ្គីភាព ដ៏យូរអង្វែង ដើម្បីឲ្យពួកគេមានសមត្ថភាពពេញលេញទទួលខុសត្រូវ ប្រែក្លាយជាសសរទ្រូង ដ៏រ៉ឹងមាំរបស់ប្រទេសជាតិ។
ឯកឧត្តម តូច ជឿន បានថ្លែងអំណរគុណឯកឧត្តម សុខ លូ អភិបាលខេត្តកំពង់ធំ ដែលបានជួយសម្រួលទីកន្លែងសម្រាប់ការបោះជំរុំថ្នាក់ជាតិលើកទី៣ ក្នុងខេត្តកំពង់ធំនេះ និងបានមានប្រសាសន៍ថា ឆ្នាំ២០១៨ គឺជាទំព័រស.គ និងប្រវត្តិសាស្រ្តថ្មី សម្រាប់កាយរឹទ្ធិកជាតិកម្ពុជា ចូលរួម២៥ខេត្តក្រុងសរុប៤៥០នាក់ ការបោះជំរុំបានប្រព្រឹត្តទៅអស់រយះពេល៥ថ្ងៃ ចាប់ពីថ្ងៃទី៣ដល់ថ្ងៃទី៩ ខែធ្នូ ឆ្នាំ ២០១៨ ក្នុងនោះក្មួយៗ និងមានការយល់ដឹងពីតំលៃនៃសន្តិភាព ក្នុងការចូលរួមអភិវឌ្ឍន៍សង្គម និងប្រទេសជាតិ និងបានយល់ដឹងពីភក្តីភាព ស្មោះត្រង់ជាមួយរាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ។
ឯកឧត្តម តូច ជឿន បានកោតសរសើរនិងវាយតំលៃខ្ពស់ ចំពោះលោកគ្រូ អ្នកគ្រូ ដែលជាសមាជិកគណម្មាធិការ រៀបចំបោះជំរុំ ដែលបានលះបង់កំលាំងកាយចិត្ត យកចិត្តទុកដាក់លើការងារ ដោយទទួលខុសត្រូវ ខ្ពស់ ដែលទទួលបានលទ្ធផលជោគជ័យនាពេលនេះ និងសូមគោរពជូនពរដល់ប្រតិភូកាយរឹទ្ធិជាតិកម្ពុជា ខេត្តក្រុងទាំងអស់ ទទួលបានសុខភាពល្អ និងធ្វើដំណើរត្រឡប់ទៅវិញប្រកបដោយសុវត្តិភាពរៀងៗខ្លួន៕ (ដោយ តេច ឆេង )
