ភ្នំពេញ ៖ ក្រុមថ្នាក់ដឹកនាំអតីតគណបក្សសង្គ្រោះជាតិដែលមាននិន្នាការគាំទ្រលោក សម រង្ស៊ី បានរៀបចំសន្និសីទបក្សនៅក្រៅប្រទេសជាលើកដំបូងកាលពីថ្ងៃទី១ និងទី២ ខែធ្នូ ឆ្នាំ២០១៨ នៅទីក្រុងអាត្លង់តា រ (Atlanta) រដ្ឋ Georgia សហរដ្ឋអាមេរិក ហើយទីបំផុតលោក សម រង្ស៊ី ត្រូវបានថ្នាក់ដឹកនាំអតីតគណបក្សសង្គ្រោះជាតិមួយក្រុមនៅក្រៅប្រទេស សម្រេចតែងតាំងជាប្រធានបណ្តោះអាសន្នគណបក្សនេះឡើងវិញ អំឡុងពេលលោក កឹម សុខា ស្ថិតនៅក្នុងការឃុំខ្លួនប៉ុណ្ណោះ ។
សន្និបាតនោះបានសម្រេចដោយស្នើលោក សម រង្ស៊ី ដែលជាសហស្ថាបនិកនិងជាអតីតប្រធានគណបក្សសង្គ្រោះជាតិ ដើម្បីដឹកនាំគណបក្សនេះ ក្នុងរយៈពេលដែលលោក កឹម សុខា ប្រធានអតីតគណបក្សសង្គ្រោះជាតិមិនអាចដឹកនាំគណបក្សបាន ។ ប៉ុន្តែការសម្រេចនោះត្រូវបានមន្ត្រីរួមទាំងអ្នកគាំទ្រលោក កឹម សុខា ចោទថាជាការឆក់ឱកាសប្លន់យកអំណាចពីលោក កឹម សុខា ផ្ទុយពីលក្ខន្តិកៈរបស់បក្ស ។
សូមជម្រាបថា សមាជិកអតីតគណបក្សសង្គ្រោះជាតិដែលជាក្រុមគាំទ្រលោក កឹម សុខា មិនបានចូលរួមសន្និសីទនេះទេ ហើយក៏ប្រកាសប្រឆាំងនិងមិនទទួលស្គាល់ការសម្រេចនោះផងដែរ ។
លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា តាមរយៈបណ្ដាញសង្គមតេឡេក្រាមនៅថ្ងៃទី២ ធ្នូ ឆ្នាំ២០១៨ បានលើកថាឧបាយកលរបស់ទណ្ឌិត សម រង្ស៊ី បានរៀបចំគម្រោងធ្វើរបស់ដែលហៅថាសន្និសីទពិភពលោកក្នុងចំណោមអ្នកគាំទ្រខ្លួននៅទីក្រុងអាតាត្លង់តា រដ្ឋអូហៃយូ សហរដ្ឋអាមេរិកក្នុងឧបាយកលទុច្ចរិត ចង់ដណ្តើមតួនាទីដឹកនាំអតីតបក្សប្រឆាំងដែលបានងាប់ទៅហើយនោះ បានបង្ហាញពីការបែកបាក់។
លោក សុខ ឥសាន្ត បញ្ជាក់៣ចំណុចច្បាស់ៗថា៖ ១- ពាក្យដែលទណ្ឌិត សម រង្ស៊ី ថាសម រង្ស៊ីនិង កឹម សុខា ជាមនុស្សតែមួយគឺមិនពិតទាល់តែសោះ។ ២- ឧបាយកលចង់ដណ្ដើមអំណាចរបស់ទណ្ឌិត សម រង្ស៊ី ត្រូវបរាជ៍យ។ ៣-ផ្ទៃក្នុងអតីតបក្សប្រឆាំងរួមទាំងរបស់ដែលហៅថា ចលនាសង្គ្រោះជាតិ បែកបាក់គ្មានទីបញ្ចប់។ នេះជាលទ្ធផលនៃនយោបាយបាយឡុកបាយឡ របស់ទណ្ឌិត សម រង្ស៊ី ដែលត្រូវទទួលបរាជ័យជារៀងរហូត ។
ចំណែកក្រុមសហមេធាវីការពារក្ដីលោក កឹម សុខា ចេញសេចក្ដីថ្លែងការណ៍ច្រានចោល គឺមិនទទួលដឹងឮនិងមិនគាំទ្រ នូវការរៀបចំនិងការសម្រេចណាមួយនៃសន្និសីទកាលពីថ្ងៃទី១ និង ថ្ងៃទី២ ខែធ្នូ ឆ្នាំ២០១៨ នៅទីក្រុងអាតាឡង់តា សហរដ្ឋអាមេរិក របស់ក្រុមអ្នកគាំទ្រលោក សម រង្ស៊ី ប្រធានចលនាសង្គ្រោះជាតិនោះទេ ។
សហមេធាវីការពារសិទ្ធិលោក កឹម សុខា បានឲ្យដឹងនៅថ្ងៃទី២ ខែធ្នូ នេះថា ការបញ្ចេញទស្សនៈរបស់លោក កឹម សុខា ខាងលើនេះ មិនស្ថិតនៅក្រោមការបង្ខិតបង្ខំរបស់បុគ្គលណាមួយឡើយ។“យើងខ្ញុំជាសហមេធាវី សូមបញ្ជាក់ថា ទោះបីជាឯកឧត្តម កឹម សុខា ស្ថិតក្រោមការត្រួតពិនិត្យតាមផ្លូវតុលាការក៏ដោយ ក៏ឯកឧត្តម កឹម សុខា នៅតែមានសិទ្ធិក្នុងការតវ៉ា ការពារ ទាមទារ និងបដិសេធ នូវអ្វីដែលប៉ះពាល់ដល់សិទ្ធិគាត់៕
