ខេត្តកំពង់ឆ្នាំង ៖ ប្រជានេសាទរិះគន់ថាលោក គីម ឡុង នាយផ្នែករដ្ឋបាលជលផលកំពង់ប្រសាទ ខេត្តកំពង់ឆ្នាំង មិនគួរបណ្ដោយឲ្យកើតមានបទល្មើសនេសាទ ដាក់របាំងកាត់ព្រែកនោះទេ ព្រោះបច្ចុប្បន្ននេះគេសង្កេតឃើញ មានបទល្មើសដាក់របាំងក្រឡាញឹកកាត់ព្រែកកើតឡើងយ៉ាងគគ្រឹកគគ្រេង នៅឃុំគោកបន្ទាយនិងឃុំស្វាយជ្រុំ ស្រុករលា ប្អៀរ ខេត្តកំពង់ឆ្នាំង តែលោក គឹម ឡុង សម្ងំស្ងៀម។
ប្រជានេសាទប្រកបរបរលក្ខណៈគ្រួសារជាច្រើនបានរិះគន់ទៅលើទង្វើដែលលោក ឌុល គឹមឌី និងលោក គីម ឡុង ឃុបឃឹតអោយឈ្មួញដាក់បទល្មើសរបាំងក្រឡាញឹកកាត់ព្រែក ដើម្បីតែប្រយោជន៍បក្សពួកខ្លួន បំផ្លាញមច្ឆាជាតិ ទាំងតូចទាំងធំផ្គើនទៅនិងបទបញ្ជារបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដាក់បទបញ្ជាឲ្យលុបបំបាត់ការដាក់របាំងស្បៃមុងនិងរបាំងក្រឡាញឹក វែងរាប់រយម៉ែត្រ និងហាមដាក់សម្រាស់កាត់បឹងព្រែកជាដើម។
ជាក់ស្ដែងសកម្មភាពបទល្មើសនេសាទបានកើតឡើងពេញផ្ទៃទឹកក្នុងបឹងព្រែក មានទាំងសម្រាស់និងរុញស៊ីបក្នុង តំបន់អភិរក្ស ព្រមទាំងការដាក់របាំងលបក្រឡាញឹកកាត់បឹងកាត់ព្រែកកាត់អូរ តែពុំត្រូវបានលោក នាយសង្កាត់ និងនាយផ្នែកធ្វើការបង្ក្រាបនិងទប់ស្កាត់នោះទេ គឺធ្វើព្រងើយកន្តើយហាក់មើលមិនឃើញមិនដឹងអ្វីសោះ ព្រោះជាប់ពាក់ព័ន្ធនិងការទទួលយកលាភសក្ការៈពីក្រុមជនរកស៊ីជលផលល្មើសច្បាប់។
ប្រជាពលរដ្ឋដែលរស់នៅទីនោះបានបន្ដថា ការដាក់របាំងលបក្រឡាញឹកកាត់ព្រែកដែលបង្កឲ្យរាំងស្ទះដំណើរចរាចរណ៏ត្រីនោះ គឺមានបុគ្គលមួយចំនួនមានដូចជាបុគ្គលខ្សែស្រឡាយលោកនាយផ្នែកកំពង់ប្រសាទ និងជាច្រើនអ្នកទៀតជាអ្នកដាក់របាំងក្នុងរដូវបិទ និងបើកនេសាទធ្វើឫកពារដូចទិញបឹង ទិញព្រែកផ្ដាច់មុខតែឯងអញ្ចឹង ចំពោះការចេញមុខកាងបែបនេះ ត្រូវបានប្រជានេសាទដាក់ការសង្ស័យលើលោក ឌុល គឹមឌី នាយសង្កាត់រដ្ឋបាលជលផលស្រុករលាប្អៀរ និងលោកនាយផ្នែកកំពង់ប្រសាទ ជាអ្នកបើកភ្លើងខៀវ។
ពាក់ព័ន្ធនិងការរឹះគន់របស់ពលរដ្ន យើងពុំអាចសុំការបំភ្លឺពីលោក ឌុល គឹមឌី និងលោក គីម ឡុង បានទេ ព្រោះពុំមានលេខទូរសព្ទ័ តែនឹងព្យាយាមនៅពេលក្រោយ៕
