ក្រុមជនល្មើសរកស៊ីដឹកជញ្ជូនឈើខុសច្បាប់១ក្រុម ដែលគេស្គាល់មានឈ្មោះ អាត សំអុល ហៅហ៊ីង ជាមេខ្លោង ឈ្មោះ តុង ឡេង និង ថៃ រស់នៅភូមិតាឡែក ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ត្រូវជាបងប្អូនបង្កើត ហើយជាម្ចាស់ឈើ និង គោយន្ត រ៉ឺម៉កទាំងនោះ បានប្រមូលបក្សពួកជាច្រើននាក់ទៀត លើកគ្នាមកកាងឈើដឹកឆ្លងកាត់កុងត្រូល ឬ ស្នាក់ការរបស់សមត្ថកិច្ចច្រើនអង្គភាព ដែលឈរជើងលើផ្លូវជាតិលេខ៦២ ជាច្រើនកន្លែងក្នុងខេត្តព្រះវិហារ និងខេត្តកំពង់ធំ ពីចំណុចអូរពោធិឃុំ រមណីយ៍ ស្រុករវៀង ខេត្តព្រះវិហារ រហូតដល់ថ្នល់បែក ស្រុកកំពង់ស្វាយ ខេត្តកំពង់ធំ ។
ប្រជាពលរដ្ឋរាយការណ៏ថា នៅលើដងផ្លូវ៦២ គេសង្កតឃើញមានស្នាក់ការកុងត្រូលបរិស្ថាន ប៉េអឹម ប៉ូលីស ទាហាន មេព្រៃសង្កាត់សាលាវិស័យ និងស្នាក់ការមេព្រៃផ្នែកស្ទោងច្រើនស្អេកស្កះ ដែលត្រូវបានពលរដ្ឋធ្វើដំណើរឆ្លងកាត់តាមផ្លូវនេះ រិះគន់យ៉ាងខ្លាំង ទៅលើកម្លាំងសមត្ថកិច្ចទាំងនោះថា បានបង្កើតស្នាក់ការនិងដាក់បារ៉ាស់ជាច្រើនកន្លែងឈរជើង ចាប់ពីស្រុករវៀង ខេត្តព្រះវិហារ រហូតដល់ស្រុកប្រាសាទបល្ល័ង្ក និងស្រុកកំពង់ស្វាយ ខេត្តកំពង់ធំ ដើម្បីបង្ក្រាបបទល្មើសផ្សេងៗ ជាពិសេសបទល្មើសដឹកឈើខុសច្បាប់ តែសមត្ថកិច្ចទាំងនោះកំពុងប្រែក្លាយស្នាក់ការទៅជាកុងត្រូលជជុះ ចាំឈរយកលុយពីអ្នករកស៊ីបទល្មើសព្រៃឈើ ដាក់ហោប៉ៅដោយឥតអៀនខ្មាស់ ជាថ្នូរនិងការមិនបង្ក្រាប ព្រោះគេកម្រឃើញវត្តមានអស់លោកសមត្ថកិច្ច និង ជំនាញរដ្ឋបាលព្រៃឈើទាំងនោះចេញមុខបង្រ្កាបណាស់ ។ តែដោយឡែក គេឃើញតែក្រុមអ្នករកស៊ីបទល្មើសដឹកឈើទាំងនោះនៅតែដឹកជញ្ជូនឈើជារៀងរាល់យប់ថ្ងៃ ។
ប្រភពដដែលបានបន្ថែមថា បើដាក់បារ៉ាស់តាមផ្លូវ ហើយមិនបង្រ្កាបរាល់បទល្មើសខុសច្បាប់នោះទេតើបង្កើតកុងត្រូលស្នាក់ការមកដើម្បីអ្វី ? ឬក៏បង្កើតដើម្បីដើរប្រមូលលាភសក្ការៈចែកគ្នាតាមរបៀបអំពើពុករលួយ ? ។ សូមបញ្ជាក់ថា កន្លងមកឯកឧត្តមអភិបាលខេត្តទាំងពីរ ធ្លាប់បានប្រាប់អំពីគោលបំណង នៃការបង្កើតក្រុមចម្រុះដាក់កុងត្រូល ដើម្បីទប់ស្កាត់រាល់បទល្មើសនានា ដែលកើតមាននៅលើដងផ្លូវ ជាពិសេសបទល្មើសដឹកឈើខុសច្បាប់ ។ តែផ្ទុយទៅវិញមន្ត្រីស៊ីប្រាក់ខែរដ្ឋ ដែលត្រូវបានចាត់តាំងអោយដឹកនាំអនុវត្តការងារខាងលើ បែរជាអនុវត្តផ្ទុយពីគោលការណ៍របស់ខេត្តទៅវិញ ។
ចំណុចនេះហើយ ដែលពលរដ្ឋតែងតែហៅមន្ត្រីទាំងនោះថា ជាមន្ត្រីគ្រាប់ល្ពៅប្រភទទី១ ដែលសម្តេចតេជោ ហ៊ុន សែន ធ្លាប់បានថ្លែងថា ប្រភេទមន្រ្តីទី១ គឺជាមន្រ្តីដ៏គ្រោះថ្នាក់បំផុត មិនអាចទុកប្រភេទមន្រ្តីនេះធ្វើការនោះទេ ព្រោះមិនត្រឹមតែ មិនស្មោះត្រង់នោះទេ ថែមទាំងទម្លាក់កំហុសនាំគ្រោះថ្នាក់ដល់អ្នកដទៃថែមទៀត ។ សម្រាប់ប្រភេទទី២ ក៏មិនត្រូវទុកនោះដែរ ព្រោះជាមន្រ្តីភូតកុហក់ មិនអាចប្រើបាននោះទេ ៕