ខេត្តក្រចេះ ៖ សម្តេចពញាចក្រី ហេង សំរិន ប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា បានអញ្ជើញជាអធិបតីប្រារព្ធមិទ្ទីញមហាជនអបអរសាទរខួប៤០ឆ្នាំ នៃថ្ងៃកំណើតរណសិរ្សសាមគ្គីសង្គ្រោះជាតិ ដែលប្រារព្ធធ្វើឡើងនៅវិមានអនុស្សាវរីយ៍រណសិរ្ស២ធ្នូ ស្ថិតនៅក្នុងភូមិជើងម្លូ ឃុំ២ធ្នូ ស្រុកស្នួល ខេត្តក្រចេះ។
សម្តេចពញាចក្រីបានថ្លែងអំពាវនាវដល់យុវជនជំនាន់ក្រោយដែលនឹងត្រូវបន្តវេនដឹកនាំប្រទេសជាតិ ត្រូវតែចងចាំឲ្យបាននូវរណសិរ្សសាមគ្គីសង្គ្រោះជាតិ ឬមានឈ្មោះបច្ចុប្បន្នថា រណសិរ្សសាមគ្គីអភិវឌ្ឍន៍មាតុភូមិកម្ពុជា នោះហើយក៏បានអំពាវនាវផងដែរ ឲ្យអ្នកដឹកនាំជាតិជំនាន់ថ្មី ត្រូវតែប្រឹងប្រែងរក្សាឲ្យបាននូវមរតកសន្តិភាព ដែលអ្នកជំនាន់មុនបានប្រឹងប្រែងពលីកម្មសព្វបែបរកមកបានដោយលំបាកនេះ។
សម្តេចបានរំលឹកថា ២ធ្នូ ជាទិវាប្រវត្តិសាស្រ្ត នាំមកនូវជ័យជម្នះសម្រាប់ពលរដ្ឋខ្មែរឈានទៅរកការសង្រ្គោះអាយុជីវិតប្រជាជនដែលនៅសេសសល់ពីការកាប់សម្លាប់បានទាន់ពេលវេលា នាំមកជូនប្រជាជនវិញនូវសិទ្ធិសេរីភាពគ្រប់យ៉ាងដែលត្រូវបាត់បង់ទាំងស្រុងក្នុងរបបប៉ុលពត បានធ្វើឲ្យរាល់តម្លៃទាំងខាងស្មារតី និងសម្ភារៈរបស់ប្រជាជាតិខ្មែរ ដែលត្រូវបានកសាងពូនជ្រំនៅក្នុង ប្រវត្តិសាស្រ្តរាប់ពាន់ឆ្នាំមកហើយរបស់ខ្លួននោះ បានរស់រានមានជីវិតឡើងវិញ និងបានរួមវិភាគទានដ៏សកម្មដល់ការថែរក្សាសន្តិភាព និងសន្តិសុខក្នុងតំបន់។ ទាំងនេះគឺជាសច្ចធម៌ ប្រវត្តិសាស្ត្រដែលគ្មានកម្លាំងណា អាចបំភ្លៃ បំផ្លើស បំភ្លេច និងបំផ្លាញបានឡើយ។
សម្តេចបានគូសបញ្ជាក់ថា សុខសន្តិភាពដែលកំពុងពេញប្រៀបលើដីកម្ពុជានាពេលបច្ចុប្បន្នមិនអាចកាត់ថ្លៃបាននោះឡើយ។ ក្នុងន័យនេះសម្តេច ហេង សំរិន អំពាវនាវដល់យុវជនជំនាន់ថ្មី ជាពិសេសអ្នកដែលនឹងត្រូវបន្តវេនដឹកនាំនាវាកម្ពុជា ត្រូវតែចាំ «រណសិរ្សសាមគ្គីសង្គ្រោះជាតិ២ធ្នូ» ដែលជាថ្ងៃចាប់ផ្តើមនាំមកនូវសុខសន្តិភាព និងការរស់រៀនរបស់ពលរដ្ឋកម្ពុជា ហើយត្រូវតែថែរក្សាឲ្យបាននូវមរតកសុខសន្តិភាពនេះ។
សម្តេចបន្ថែមថា «ចូរយើងត្រូវចងចាំថា សន្តិភាព គឺជាកត្តាមូលដ្ឋានគ្រឹះ ដើម្បីធានាដល់ដំណើររីកចម្រើននៃលទ្ធិប្រជាធិបតេយ្យ និង សិទ្ធិមនុស្ស ធានាការអភិវឌ្ឍប្រកបដោយចីរភាព សមធម៌ និងធានានូវជីវភាពរស់នៅដ៏សុខសាន្ត ប្រកបដោយកិត្តិយសរបស់ប្រជាជនយើង។ បើយើងបាត់បង់សន្តិភាព នោះយើង នឹងត្រូវបាត់បង់អ្វីៗទាំងអស់។ ម្យ៉ាងទៀតទម្រាំប្រទេសជាតិមានសុខសន្តិភាព និងការអភិវឌ្ឍដែលកើតមានដូចពេលនេះ គឺយើងបានឆ្លងកាត់អស់រាប់សតវត្សនូវរឿងរ៉ាវមហាទុក្ខសោក វេទនាជាទីបំផុត។ ក្នុងន័យនេះ បើទោះបីត្រូវលះបង់ក្នុងតម្លៃណាក៏ដោយ គឺយើងមិនអាចទុកឱកាសឱ្យក្រុមប្រតិកិរិយា បំផ្លិចបំផ្លាញសមិទ្ធផលទាំងឡាយដែលរាជរដ្ឋាភិបាល ដឹកនាំដោយគណបក្សប្រជាជន សម្រេចបាននាពេលកន្លងមកបានឡើយ។ ហេតុនេះ ចូរយើងទាំងអស់គ្នាត្រូវរួមគ្នាការពារសន្តិភាពជាតិយើង»៕
