ខេត្តស្ទឹងត្រែង ៖ សកម្មភាពនៃការជួញដូរលក់សាច់សត្វព្រៃនៅក្នុងផ្សារសាមគ្គី ខេត្តស្ទឹងត្រែង យ៉ាងមហាសេរី ដែលមហាជនមិនដែលឃើញមានការទប់ស្កាត់និងចាប់បង្ក្រាបពីសំណាក់អស់លោកអាជ្ញាធរមូលដ្ឋាន និងសមត្ថិច្ចមន្ត្រីជំនាញណាសោះ ហើយនិងនៅតែបន្តឲ្យមានការជួញដូរលក់សាច់សត្វព្រៃយ៉ាងអនាធិបតេយ្យជារៀងរាល់ថ្ងៃ ហើយសត្វព្រៃគ្រប់ប្រភេទនៅក្នុងខេត្តស្ទឹងត្រែងនិងត្រូវផុតពូជជាក់ជាមិនខាន។
ជាក់ស្ដែងជារៀងរាល់ថ្ងៃ គេតែងតែសង្កេតឃើញពួកអាជីវករមួយចំនួនបានដាក់តាំងលក់សាច់សត្វព្រៃ មានទាំងសាច់សត្វស្លាប់និងមានទាំងសត្វដែលនៅរស់គ្រប់ប្រភេទជាច្រើន លក់ដង្ហែនៅតាមបណ្ដោយដងផ្លូវខាងក្រោយផ្សារសាមគ្គី ខេត្តស្ទឹងត្រែង ហើយប្រជាពលរដ្ឋឆ្ងល់ថាតើលោក ម៉ុម សារឿន អភិបាលនៃគណៈអភិបាលខេត្តស្ទឹងត្រែង មានបានដឹងនិងបានជ្រាបជាព័ត៌មានខាងលើដែរឬទេ ? ហើយគួតែមានវិធានការណ៍បែបណាចំពោះរឿងនេះដើម្បីថែរក្សាសត្វព្រៃឲ្យបានគង់វង្ស។
ប្រជាពលរដ្ឋសូមអំពាវយ៉ាងទទូចទៅដល់ឯកឧត្ដម សាយ សំអាល រដ្ឋមន្ត្រីក្រសួងបរិស្ថាន និងឯកឧត្ដម វេង សាខុន រដ្ឋមន្ត្រីក្រសួងកសិកម្ម សូមមានចំណាត់ការណ៍ចំពោះមន្ត្រីជំនាញក្រោមឱវាទឲ្យធ្វើការចុះចាប់បង្ក្រាបអ្នកជួញដូរលក់សាច់សត្វព្រៃខុសច្បាប់យកទៅចាត់ការតាមនីតិវិធីច្បាប់ បើពុំដូច្នោះទេសត្វព្រៃគ្រប់ប្រភេទនៅក្នុងស្រុកខ្មែរច្បាស់ជារងនូវការរលាយផុតពូជខ្ទេចខ្ទីអស់ជាក់ជាមិនខានឡើយ៕
