ខេត្តក្រចេះ ៖ ប្រភពពីប្រជាពលរដ្ឋបានរាយការណ៏ថា រៀងរាល់យប់កន្លងមក គេឃើញមានរថយន្តសាំយ៉ុងជាច្រើនគ្រឿង ដឹកឈើពេញប្រៀប ជាឈើឡាំងធំៗ ប្រភេទឈើសុក្រំភ្នំ ត្រូវបានចែ មុំ ដឹកឈើចេញពីស្រុកចិត្របុរី និងចេញពីអូរគ្រៀង ឆ្ពោះមកកាន់ស្រុកស្នួល ខេត្តក្រចេះ ឆ្លងទៅប្រទេសវៀតណាម គ្មានសមត្ថកិច្ចតាមដងផ្លូវ ឬសមត្ថកិច្ចជំនាញណា ហ៊ានប៉ះពាល់សោះឡើយ ដោយសារយាយមុំចេះសម្របសម្រួល ជាមួយមន្ត្រីអាជ្ញាធរខេត្ត-ស្រុក និងមេៗសមត្ថកិច្ចប្រដាប់អាវុធ និងមេសមត្ថកិច្ចជំនាញ ដែលលាបាតដៃទទួលប្រាក់ ពីមេឈ្មួញទុច្ចរឹតអស់ហើយ។ ម្យ៉ាងដោយសារមេឈ្មួញមានទំនាក់ទំនងជាមួយអ្នកអន្រ្ទើសនៅក្នុងខេត្ត ទើបមេឈ្មួញចែ មុំ រហ័សនាមចែមុំនោមឆេះ ដឹកជញ្ជូនឈើខុសច្បាប់ ចេញទៅវៀតណាមរាល់យប់-ថ្ងៃ ដោយរលូនមិនមានអ្នកណាហ៊ានក្អកសួរនាំនិងបង្ក្រាបនោះឡើយ។
សេចក្តីរាយការណ៏ឲ្យដឹងទៀតថា បន្ទាប់ពីជំនួញឈើខុសច្បាប់ស្ងប់ស្ងាត់មួយរយៈដោយសារតែសម្តេចគតិព្រិទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាអញ្ជើញទៅខេត្តក្រចេះ ហើយនៅពេលដែលសម្តេចត្រឡប់មកវីញ សកម្មភាពដឹកជញ្ជូនឈើចាប់ផ្តើមកក្រើកឡើងវិញភ្លាម នៅយប់ថ្ងៃទី១៧ ខែវិច្ឆិកានេះ ក្បួនឈើចែមុំនោមឆេះ ក្នុងនោះមានរថយន្តសាំយ៉ុង៥គ្រឿងដឹកឈើប្រណឹតចេញតាមច្រកស្នួលយ៉ាងគឃ្លើន ដោយពុំមានសមត្ថកិច្ចជំនាញណាមួយលេចមុខចេញបង្រ្កាបឡើយ។
គួររំលឹកថាចែ មុំ ដែលគេល្បីថាជាមេឈ្មួញឈើដ៏មានអំណាចក្នុងខេត្តក្រចេះ បានផ្អាកសកម្មភាពមួយរយៈផងដែរ មុនបោះឆ្នោតនិងក្រោយបោះឆ្នោត ហើយមេឈ្មួញរូបនេះចាប់ផ្តើមដំណើរការវិញ ក្នុងរយៈពេលប៉ុន្មានថ្ងៃកន្លងមកនេះ ជាប់ៗគ្នា បើទោះជាច្រកក្នុងស្រុកស្នួល ខេត្តក្រចេះ មិនអាចចេញឈើទៅវៀតណាម ក្នុងរយៈពេលប៉ុន្មានសប្តាហ៍មុន ប៉ុន្តែចែ មុំ បានដឹកជញ្ជូនឈើពីខេត្តក្រចេះ ឆ្លងទៅវៀតណាម តាមស្រុកស្នួល និងតាមស្រុកមេមត់ ខេត្តត្បូងឃ្មុំ បានយ៉ាងរលូន។
សេចក្តីរាយការណ៍ប្រាប់បន្តថា ចែ មុំ មានទីលំនៅក្នុងភូមិអណ្តែតដូន សង្កាត់ក្រគរ ក្រុងក្រចេះ ដែលជាឈ្មួញជើងខ្លាំងដុះស្លែ រកស៊ីឈើប្រណីតខុសច្បាប់ ដឹកតាមរថយន្តសាំយ៉ុងយ៉ាងល្បីរន្ទឺក្នុងខេត្តក្រចេះ សម្រុកចូលមកស្រុកស្នួលទាំងយប់ទាំងថ្ងៃ គ្មានសមត្ថកិច្ចជំនាញរដ្ឋបាលព្រៃឈើ និងសមត្ថកិច្ចពាក់ព័ន្ធដទៃទៀត ហ៊ានបង្ក្រាបទេ ។
ករណីមេឈ្មួញចែ មុំ ដឹកជញ្ជូនឈើខុសច្បាប់ចេញទៅវៀតណាមរាល់ថ្ងៃ យប់ំ គេមិនឃើញសមត្ថលិច្ចជំនាញខេត្តក្រចេះ បញ្ជាកម្លាំងបង្ក្រាបនិងទប់ស្កាត់សោះឡើយ ដែលបណ្តាលឲ្យប្រជាពលរដ្ឋឆ្ងល់ថា តើសមត្ថកិច្ច អាចបិទភ្នែកអោយមេឈ្មួញជួញឈើខុសច្បាប់តាមតែអំពើចិត្ត ជាថ្នូរទទួលផលប្រយោជន៍ឬយ៉ាងណា? ។
មជ្ឈដ្ឋាននានាបានកត់សម្គាល់ថា បទល្មើសដឹកជញ្ជូនឈើចេញទៅស្រុកយួន តាមច្រករបៀងនិងច្រកព្រំដែនជាច្រើនកន្លែងក្នុងស្រុកស្នួល ខេត្តក្រចេះ ពុំមានការថយចុះនោះទេ ព្រោះមន្ត្រីរដ្ឋបាលព្រៃឈើ សមត្ថកិច្ចពាក់ព័ន្ធនិងសមត្ថកិច្ចតាមច្រកព្រំដែន គិតតែពីរឿងប្រមូលលុយតាមរបៀបពុករលួយដាក់ហោប៉ៅដើម្បីចែកគ្នាធ្វើមានធ្វើបានយ៉ាងគឃ្លើន។
គេហទំពរ័ សម្លេងសច្ចៈ ពុំអាចសុំការបំភ្លឺពីភាគីពាក់ពន្ធ័បានឡើយ តែនិងព្យាយាមសុំការបំភ្លឺនៅលេខក្រោយ៕
