ខេត្តស្ទឹងត្រែង ៖ រថយន្តប្រភេទទេសចរ១គ្រឿងនិងឈើប្រណិតរាប់សិបសន្លឹក ដែលគេដឹងថា មានតម្លៃច្រើនពាន់ដុល្លារ ត្រូវបានកម្លាំងកងរាជអាវុធហត្ថសហការណ៍ជាមន្ត្រីព្រៃឈើខេត្តស្ទឹងត្រែង ចុះបង្ក្រាប និងស្ទាក់ចាប់បាននៅវេលាទៀបភ្លឺ ថ្ងៃទី១៤ ខែវិច្ឆិកា ឆ្នាំ២០១៨ នៅផ្លូវលំក្រាលគ្រួសក្រហម១ខ្សែ បំបែកចេញពីផ្លូវជាតិលេខ៧ ចូលទៅស្តៅស្ថិតនៅក្នុងភូមិគីឡូម៉ែត្រលេខ៨ សង្កាត់សាមគ្គី ក្រុងស្ទឹងត្រែង។
មន្ត្រីកងរាជអាវុធហត្ថខេត្តបានបង្ហើបឲ្យដឹងថា នៅមុនពេលចុះស្ទាក់ចាប់រថយន្តដឹកឈើ១គ្រឿងនេះបានមន្ត្រីអាវុធហត្ថទទួលបានដំណឹងមកថា មានរថយន្តប្រភេទទេសចរ១គ្រឿងបានផ្ទុកឈើប្រណិតពេញប្រៀប បានចាកចេញពីភូមិសាស្ត្រស្រុកសៀមប៉ាង ក្នុងបំណងនាំចេញយកទៅលក់នៅក្រៅរង្វង់ដែនដីខេត្ត ដោយឆ្លងកាត់ក្រុងស្ទឹងត្រែង។ នៅគ្រានោះ កម្លាំងកងរាជអាវុធហត្ថ បានសុំគោលការណ៍ពីថ្នាក់លើ ធ្វើការសហការណ៍ជាមួយមន្ត្រីរដ្ឋបាលព្រៃឈើខេត្ត ចុះស្ទាក់ចាប់ភ្លាមៗផងដែរ។
នៅពេលសមត្ថកិច្ចកំពុងប្រដេញស្ទាក់ចាប់រថយន្តដឹកឈើនោះ តៃកុងបានបើកទ្វាររថយន្តរត់គេចទាំងយប់ងងឹតនោះបាត់ទៅ ដោយបានបន្សល់ទុកនូវវត្ថុតាងបទល្មើស មានរថយន្ត១ គ្រឿងនិងឈើប្រណិតរាប់សិបសន្លឹក ដែលផ្ទុកនៅក្នុងនោះ។ ក្រោយការបង្ក្រាបនោះភ្លាម រថយន្តដឹកឈើនោះ ត្រូវបាននាំយកមកកាន់ផ្ទះខណ្ឌរដ្ឋបាលព្រៃឈើខេត្តស្ទឹងត្រែង។
មន្ត្រីព្រៃឈើខេត្តស្ទឹងត្រែងបានប្រាប់ឲ្យដឹងថា រថយន្តដឹកឈើ១គ្រឿងដែលរងការបង្ក្រាបស្ទាក់ចាប់បាននេះ ជាប្រភេទរថយន្តសាំយ៉ុង កែច្នៃបាតនិងដំបូល ពាក់ស្លាកលេខ ភ្នំពេញ 2C-4106 ពណ៌ស តែស្លាកលេខត្រូវបានគេដោះចេញ និងមានផ្ទុកឈើពេញ ដឹកចេញពីស្រុកសៀមប៉ាង ពេលចូលមកដល់ដីក្រុងស្ទឹងត្រែង ក៏ត្រូវបានបង្ក្រាបតែម្តង។ ឈើនៅក្នុងរថយន្តនេះ មានជាច្រើនប្រភេទចម្រុះគ្នា តែភាគច្រើនគឺជាឈើធ្នុង រហូមកដល់រសៀលថ្ងៃនេះ នៅមិនទាន់ដឹងពីចំនួនពិតប្រាកដនោះទេ ព្រោះមន្ត្រីជំនាញមិនទាន់បានធ្វើការវាស់វែងនៅឡើយ៕
