ភ្នំពេញ ៖ ក្នុងអាណត្តិទី៦នៃរាជរដ្ឋាភិបាលតាមសំណើររបស់សម្តេចតេជោ ហ៊ុន សែន ជានាយករដ្ឋមន្ត្រី ព្រះមហាក្សត្រនៃព្រះរាជាណាចក្រកម្ពុជា បានឡាយព្រះហស្ថលេខាលើព្រះរាជក្រឹត្យមួយចុះថ្ងៃទី១០ ខែវិច្ឆិកា ឆ្នាំ២០១៨ ត្រាស់បង្គាប់តែងតាំងរដ្ឋលេខាធិការចំនួន០៧រូប និងអនុរដ្ឋលេខាធិការចំនួន០៦រូបនៃក្រសួងពាណិជ្ជកម្ម។ ក្នុងព្រះរាជក្រឹត្យនោះ គេឃើញមានឈ្មោះលោក កឹម សុខុន ជាប្អូនប្រុសបង្កើតរបស់លោក កឹម សុខា ត្រូវបានតែងតាំងជារដ្ឋលេខាធិការនៃក្រសួងពាណិជ្ជកម្មផងដែរ។
សូមបញ្ជាក់ថា លោក កឹម សុខុន ត្រូវបានតែងតាំងជាអនុរដ្ឋលេខាធិការក្រសួងពាណិជ្ជកម្មតាំងពីឆ្នាំ២០១៣។ ក្រោយរដ្ឋាភិបាលថ្មីក្នុងអាណត្តិទី៦ត្រូវបានបង្កើតឡើង លោក កឹម សុខុន ក៏ទទួលបានការតែងតាំងឲ្យបន្តតំណែងជាអនុរដ្ឋលេខាដដែលដែរ កាលពីដើមខែកញ្ញា ឆ្នាំ២0១៨ ហើយបច្ចុប្បន្នក៏ត្រូវបានតែងតាំងជារដ្ឋលេខាធិការ។
ចំណែក លោក កឹម សុខា ប្រធានអតីតគណបក្សសង្គ្រោះជាតិ កំពុងត្រូវបានតុលាការវាស់ដីឲ្យដើរក្នុងគេហដ្ឋាននៅក្នុងខណ្ឌទួលគោក រាជធានីភ្នំពេញ ៕
