រតនគិរី ៖ កាលពីថ្ងៃព្រហស្បតិ៍ ខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៨ ខែវិច្ឆិកា ឆ្នាំ២០១៨ ក្នុងភូមិល្អើនក្រែន ឃុំអូរជុំ ស្រុកអូរជុំ ខេត្តរតនគីរី ប្រជាពលរដ្ឋប្រមាណចំនួន១៦០នាក់ បានក្អូតចង្អោនៅពេលដែលពួកគាត់បានពុលចំណីអាហារ ក្នុងពិធីបុណ្យសពមួយនៅក្នុងភូមិ ។
តាមការបញ្ជាក់ពីលោកវេជ្ជ បណ្ឌិត អ៊ុង រតនា ប្រធានមន្ទីរសុខាភិបាលខេត្តរតគិរីបានឲ្យ សារព័ត៌មានដឹងតាមទូរស័ព្ទ នៅរសៀលថ្ងៃដដែលនេះថា បន្ទាប់ពីទទួលបាន ព័ត៌មានខាងលើនេះភ្លាម លោកបានបញ្ជូនក្រុមគ្រូពេទ្យចុះទៅទីតាំងកើតហេតុភ្លាមដើម្បី ជួយសង្គ្រោះប្រជាពលរដ្ឋ ។
លោកបន្តថា មូលហេតុក្អូតចង្អោនេះគឺបណ្តាលមកពីពួកគាត់បរិភោគចំណីអាហារមិនមានអនាម័យល្អ តែទោះជាយ៉ាងណា ករណីនេះមិនមានប្រជាពលរដ្ឋណាម្នាក់មានគ្រោះថ្នាក់ដល់អាយុជីវិតនោះឡើយ ។
លោកថា គិតមកដល់ម៉ោង៤ល្ងាចនេះគឺស្ថានភាពរបស់ពួកគាត់ទាំង១៦០នាក់នេះ បានធូស្រាលវិញហើយ ដោយក្រុមគ្រូពេទ្យប្រចាំការនៅទីនោះពិនិត្យព្យាបាល និងធ្វើការតាមដានសុខភាពជូនពួគគាត់រហូតដល់ពួកគាត់បានជាសះស្បើយឡើងវិញផងដែរ ៕
