ខេត្តមណ្ឌលគិរី ៖ ក្រសួងបរិស្ថានជាអ្នករៀបចំដំណើរទស្សនកិច្ច ក្រោមការដឹកនាំរបស់លោក សាយ សំអាល់ រដ្ឋមន្ត្រីក្រសួងបរិស្ថាន នាំឯកអគ្គរដ្ឋទូតមកពី៥ប្រទេសរួមមាន សិង្ហបុរី ម៉ាឡេស៊ី ឡាវ ហ្វីលីពីន និងគុយបា ប្រចាំកម្ពុជា ទៅបំពេញទស្សកិច្ចជាលក្ខណៈឯកជន ចាប់ពីថ្ងៃទី០៣ ដល់ថ្ងៃទី០៥ ខែវិច្ឆិកា ឆ្នាំ២០១៨ នៅខេត្តមណ្ឌលគិរី ។
តាមព័ត៌មានទទួលបានឯកអគ្គរដ្ឋទូតទាំង៥ប្រទេសនោះ បានអញ្ជើញពិនិត្យនៅទីស្នាក់ការដែនជម្រកសត្វព្រៃកែវសីមា ដែនជម្រកសត្វព្រៃណាំលៀ ទស្សនារមណីយដ្ឋានទឹកជ្រោះប៊ូស្រា ទស្សនាសួនសត្វម៉ាយូរ៉ា នៅច្រកព្រំដែនដាក់ដាំ (កម្ពុជា វៀតណាម) ទស្សនាភ្នំដោះក្រមុំ និងនៅទីស្នាក់ការឧទ្យានុរក្សអូររាំង សហគមន៍អណ្តូងក្រឡឹង (អេកូទេសចរណ៍ កម្មវិធីទឹកស្អាត)។
លោក សាយ សំអាល់ បានថ្លែងថា ដំណើរទស្សនកិច្ចនេះ គឺផ្តើមពីកត្តាសន្តិភាព ស្ថេរភាព សន្តិសុខ ទើបមានតំណាងប្រទេសទាំង៥ មានវត្តមាននៅប្រទសកម្ពុជាយើង ហើយក៏បានធ្វើដំណើរកំសាន្ដនៅតំបន់ទេសចរណ៍សំខាន់ៗក្នុងព្រះរាជាណាចក្រកម្ពុជា ជាពិសេសទឹកដីនៃខេត្តមណ្ឌលគិរី ដែលជាតំបន់ទេសចរណ៍ដ៏ស្រស់ស្អាត ភ្ជាប់និងហេដ្ឋារេចនាសម្ព័ន្ដខ្វាត់ខ្វែង ពីតំបន់មួយទៅតំបន់មួយ គឹបានមកពីការខិតខំប្រឹងប្រែងរបស់រដ្ឋាភិបាល ដែលមានសម្ដេចតេជោ ជាថ្នាក់ដឹកនាំ៕
