ខេត្តកំពង់ធំ ៖ ពលរដ្ឋបានរាយការណ៍ថា បច្ចុប្បន្ននេះទូកអូសលៀសបំពាក់ដោយប្រើម៉ាស៊ីនធំៗជាច្រើនគ្រឿង កំពុងតែបំផ្លាញធនធានជលផល មានប្រព័ន្ធអេកូឡូស៊ី និងជីវចម្រុះជាដើម នោតំបន់កោះតាបរ ឃុំផាត់សណ្តាយ ស្រុកកំពុងស្វាយ ខេត្តកំពង់ធំ ដែលល្មើសនិងច្បាប់ជលផល ហើយបើយោងតាមច្បាប់ស្តីពីជលផលគឺបានអនុញ្ញាតឲ្យអូសលៀសជាលក្ខណៈគ្រួសារធ្វើឡើងដោយដៃតែប៉ុណ្ណោះ ។
ប្រជានេសាទជាលក្ខណៈគ្រួសារបានថ្លែងអះអាងប្រាប់បញ្តាញសារព័ត៌មានថា ការអូសលៀសជាលក្ខណៈគ្រួសារក្នុងបឹងទន្លេសាប នៅចំណុចកោះតាបរ គឺអ្នកប្រកបមុខរបរអូសលៀសជាលក្ខណៈគ្រួសារធ្វើឡើងដោយដៃនោះគ្មានទៀតទេ។ ដោយហេតុថា ក្នុង១ថ្ងៃៗពួកគាត់អាចអូសលៀសបានពី ១០០ ទៅ ១៥០គីឡូ ស្មើនឹង៣ការុងប៉ុណ្ណោះ ហើយមុខរបរនេះរកបានតែ ក្នុងរដូវទឹកស្រកប៉ុណ្ណោះ ព្រោះក្នុងរដូវវស្សាខែទឹកឡើង ទឹកជ្រៅ និងទឹកហូរមិនអាចរកបានឡើយ។
ប្រជានេសាទអូសលៀសជាលក្ខណៈគ្រួសារ ទាំងនោះបានសំណូមពរដល់សមត្ថកិច្ចជលផលមេត្តា ជួយទប់ស្កាត់ និងបង្ក្រាបអ្នកអូសលៀសខុសច្បាប់ដោយម៉ាស៊ីនធំៗ ជាច្រើនគ្រឿងផងដែរ នៅក្នុងភូមិសាស្ត្រកោះតាបរ ដែលក្នុង១ថ្ងៃៗពួកគេអាចអូសលៀសបានរាប់សិបតោនដឹកយកមកលក់អោយឈ្មួញ ដែលធ្វើអោយមានការប៉ះពាល់យ៉ាងធ្ងន់ធ្ងរដល់ធនធានជលផល និងប៉ះពាល់ដល់មុខរបរស្របច្បាប់របស់ប្រជាពលរដ្ឋនៅតំបន់នោះ ។
ពាក់ព័ន្ធករណីនេះលោក យ៉ាន់ វីសាក់ ហៅសែ នាយផ្នែកជលផលផាត់សណ្តាយ បានឲ្យបញ្តាញពត័មានដឹងថា អ្នកអូសលៀសភាគច្រើនមកពីឆ្នុកទ្រូ សមត្ថកិច្ចពិតជាជួបការលំបាកក្នុងការទប់ស្កាត់ និងបង្ក្រាបខ្លាំងណាស់ ព្រោះបទល្មើសជលផលត្រូវតែបង្ក្រាបក្នុងពេលប្រព្រឹត្តជាក់ស្តែង ប៉ុន្តែកំលាំងជលផលយើងមានគ្នាតិច ពួកអ្នកប្រព្រឹត្តបទល្មើសមានគ្នាច្រើន ឥលូវនេះ យើងកំពុងតែស្នើកម្លាំងចម្រុះ ចុះបង្រ្កាប ចាប់ផាកវិន័យ តាមច្បាប់ជលផល ។
តាមការលើកឡើងរបស់នាយផ្នែកជលផលខាងលើត្រូវបានប្រជាពលរដ្ឋមិនយល់ស្របតាមនោះឡើយ ព្រោះថា ពុំមានអ្វីលំបាកសម្រាប់ការបង្ក្រាបនោះទេ ប្រសិនបើសមត្ថកិច្ចមានឆន្ទៈពិតប្រាកដនឹងបង្ក្រាបនោះ ប៉ុន្តែខ្លាចតែមានការសម្របសម្រួលឲ្យក្រុមជនល្មើសពីភាគីសមត្ថកិច្ចនោះទេ ទើបអាចនិយាយថា វាលំបាកបង្រ្កាបខ្លាំងណាស់នោះ៕
