ភ្នំពេញ ៖ ជនសង្ស័យម្នាក់ទៀតដែលជាបក្ខពួកក្រុមប៉ុនប៉ងបំផ្ទុះភេរវកម្មប្រឆាំងរាជរដ្ឋាភិបាលកម្ពុជា ត្រូវបានសមត្ថកិច្ចចម្រុះតាមចាប់ឃាត់ខ្លួនបាននៅថ្ងៃនេះ ។ ការចាប់ខ្លួននេះធ្វើឡើងដោយយោងតាមដីការបស់តុលាការ នៅចំណុចផ្ទះលេខ១៨៤A ផ្លូវលេខ៦៩R ក្នុងភូមិចំការឪឡឹក១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបញ្ជាក់ថា ជនសង្ស័យឈ្មោះ ប៉េង រ៉ា អាយុ៤៨ឆ្នាំ ជាអ្នកធ្វើការនិងចាំដីឱ្យគេនៅម្តុំពេជ្រនិល គឺជាបក្ខពួកក្រុមចង់បំផ្ទុះភេរវកម្មក្នុងចំណោមបក្ខពួកសរុបចំនួន៨នាក់។
បច្ចុប្បន្នជនសង្ស័យត្រូវបានបញ្ជូនទៅកាន់នាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន ដើម្បីចាត់ការតាមនីតិវិធី។
សូមរំលឹកថា កាលពីថ្ងៃទី២ ខែតុលា ឆ្នាំ២០១៨ កន្លងទៅនេះ កម្លាំងនគរបាលនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន បានតាមចាប់ខ្លួនមេក្លោងម្នាក់ពាក់ព័ន្ធទៅនឹងមនុស្សប្រុស-ស្រី៨នាក់ ដែលមានអតីតភិក្ខុសង្ឃ១អង្គផងនៅខេត្តព្រះវិហារ៕
ជនសង្ស័យរូបនោះមានឈ្មោះ ក្រូច ដែលការចាប់ខ្លួនឈ្មោះនេះ សមត្តកិច្ចបានដកហូតអាវុធមានវែងមានខ្លី និងមានគ្រឿងរំសេវជាឧបករណ៍ដាក់បំផ្ទុះទៀតផង។ការបង្ក្រាបពេលនោះ កម្លាំងនគរបាល បានដកហូតកាំភ្លើងចំនួន២៨ដើម ហើយក្រុមទាំងនេះ ត្រូវបានតុលាការចេញដីកាដាក់ពន្ធនាគារជាបណ្តោះអាសន្នរួចហើយ៕
