អន្តរជាតិ ៖ តាមការចេញផ្សាយដោយសារព័ត៌មាន BBC នៅថ្ងៃព្រហស្បតិ៍ ទី០១ ខែវិច្ឆិកា ឆ្នាំ២០១៨ ឲ្យដឹងថា មេដឹកនាំគណបក្សប្រឆាំងលោកស្រី Keiko Fujimori ត្រូវបានចៅក្រមនៅប្រទេសប៉េរូ លោក Richard Concepción បានបញ្ជាឱ្យឃុំខ្លួននៅពន្ធនាគាររយៈពេល៣ឆ្នាំ ខណៈលោកស្រីកំពុងរង់ចាំការជំនុំជម្រះក្នុងសំណុំរឿងពុករលួយ ដោយអះអាងថា ខ្លាចលោកស្រីរត់គេចចេញពីប្រទេសប៉េរូ។
លោកស្រី Fujimori ត្រូវបានគេចោទប្រកាន់ថា បានទទួលសំណូក ១.២លានដុល្លារ ពីក្រុមហ៊ុនសំណង់ដ៏ធំមួយនៅក្នុងប្រទេសប្រេស៊ីលឈ្មោះ Odebrecht កាលពីឆ្នាំ២០១១។ ក៏ប៉ុន្តែ លោកស្រីបានច្រានចោលការចោទប្រកាន់នេះ ដោយអះអាងថាវាគឺជាចេតនានយោបាយ។
លោកចៅក្រម Concepcion បាននិយាយថា មានការសង្ស័យយ៉ាងខ្លាំងដែលថាលោកស្រី Fujimori កំពុងគ្រប់គ្រងអង្គការឧក្រិដ្ឋកម្មជាក់ស្ដែងមួយដែលត្រូវបានចាត់បញ្ចូលក្នុង “គណបក្សនយោបាយប្រជាធិបតេយ្យ” របស់លោកស្រី Fujimori ។
សូមជម្រាបថា កាលពីដើមឆ្នាំនេះអតីតប្រធានាធិបតី Pedro Pablo Kuczynski ក៏បានលាលែងពីតំណែងក្នុងរឿងអាស្រូវទាក់ទងនឹងពុករលួយមានជាប់ពាក់ព័ន្ធនឹងក្រុមហ៊ុនមួយនេះ៕
