ភ្នំពេញ ៖ ខណៈដែលលោកស្រី រ៉ូណា ស្មីត តំណាងពិសេសឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សមកបំពេញបេសកកម្មនៅកម្ពុជា ពលរដ្ឋមួយចំនួនដែលមានជម្លោះដីធ្លីរ៉ាំរ៉ៃនៅតំបន់បឹងកក់និងបុរីកីឡា បានយកញត្តិទៅដាក់នៅការិយាល័យឧត្តមស្នងការអង្គការសហប្រជាជាតិ ហើយបើតាមខ្លឹមសារនៃញត្តិនោះ ពួកគាត់ស្នើសុំឲ្យលោកស្រី រ៉ូណា ស្មីត ជួយជំរុញរដ្ឋាភិបាលកម្ពុជាដោះស្រាយបញ្ហាទំនាស់មួយនេះឲ្យបានចប់សព្វគ្រប់តាមលក្ខខ័ណ្ឌគោរពសិទ្ធិមនុស្សនិងសិទ្ធិដីធ្លី ។
អ្នកស្រី ស៊ា រ៉េត តំណាងពលរដ្ឋរងគ្រោះបានប្រាប់អ្នកសារព័ត៌មានថា ពួកគាត់ចង់ឲ្យលោកស្រី រ៉ូណា ស្មីត ជំរុញទៅរដ្ឋាភិបាលឲ្យដោះស្រាយបញ្ហា និងជួយពិនិត្យមើលចំពោះការអនុវត្តច្បាប់នៅកម្ពុជា ដោយថាបច្ចុប្បន្ននេះ អ្នកមានអំណាចមួយចំនួនបានប្រើតុលាការមកគំរាមកំហែងពួកគាត់មិនឲ្យធ្វើការតវ៉ាទាមទាររកដំណោះស្រាយបញ្ហាដីធ្លីឡើយ ៕
