ភ្នំពេញ ៖ លោកស្រី រ៉ូណាស្មីត អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា មិនត្រូវបានរាជរដ្ឋាភិបាលអនុញ្ញាតិឲ្យជួបលោកកឹម សុខា អតីតប្រធានគណបក្សសង្រ្គោះជាតិនោះទេ ។ នេះបើយោងតាមការផ្តល់ព័ត៌មានរបស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ហើយត្រូវបានសារព័ត៌មានក្នុងស្រុកដកស្រង់យកមកចុះផ្សាយ ។
ប៉ុន្តែអ្នកនាំពាក្យរាជរដ្ឋាភិបាលបានពន្យល់ថា មូលហេតុនៃការមិនអនុញ្ញាតិឲ្យលោកស្រី រ៉ូណាស្មីត ជួបលោក កឹម សុខា នោះក៏ព្រោះតែលោក កឹម សុខា កំពុងស្ថិតក្រោមអាណត្តិរបស់ តុលាការ ។ ដូច្នេះលោកស្រី រ៉ូណាស្មីត គួរតែមានសមត្ថភាពយល់ដឹងអំពីបញ្ហានេះ ។
សូមជម្រាបថា អំឡុងពេលទស្សនកិច្ចនៅកម្ពុជា លោកស្រី រ៉ូណាស្មីត បានស្នើសុំជួបមន្ត្រី រាជរដ្ឋាភិបាល តាមបណ្តាក្រសួងពាក់ព័ន្ធនានា ហើយខណនេះកំពុងរង់ចាំការសម្រេចជាចុង ក្រោយ ។ ក្រៅពីនេះលោកស្រីក៏គ្រោងជួបបណ្តាអង្គទូតនិងអង្គការសង្គមស៊ីវិលផងដែរ ៕
