ខេត្តសៀមរាប ៖ ហេតុការណ៍គ្រោះថ្នាក់ចរាចរណ៍គួរឲ្យរន្ធត់នេះ បានកើតឡើងកាលពីវេលាម៉ោង២២ យប់ថ្ងៃទី២៩ ខែតុលា ស្ថិតនៅចំនុចខាងកើតសាលាបឋមសិក្សាជ័យ លើផ្លូវជាតិលេខ៦ក្នុងភូមិជ័យ សង្កាត់ទឹកវិល ក្រុងសៀមរាប។
យុវជន២នាក់បានជិះម៉ូតូក្នុងល្បឿនលឿន មកពីពួកតាមបណ្តោយផ្លូវជាតិលេខ ៦ ចាប់ហ្វ្រាំងមិនទាន់ ជ្រុលទៅចូលគូថរថយន្តដឹកស៊ីម៉ង់តិ៍ បណ្តាលឲ្យស្លាប់១ភ្លាមៗនៅនឹងកន្លែងកើតហេតុ និងម្នាក់ជិះពិក្រោយរងរបួសធ្ងន់ ដឹកដល់ពេទ្យខេត្តស្រាប់តែដាច់ខ្យល់ បើកស្របទិសគ្នាពីលិចទៅកើត បណ្តាលឲ្យកកស្ទះចរាចរអស់មួយសន្ទុះធំ ទើបសមត្ថកិច្ចមកដល់ ។
សាក្សីនៅកន្លែងកើតហេតុបានប្រាប់ថា មុនពេលកើតហេតុពួកគេឃើញម៉ូតូសេ១២៥ ពណ៌ខ្មៅពាក់ស្លាកលេខសៀមរាប 1M 6395 ជិះគ្នា២នាក់មកពីលិចមកកើត ក្នុងល្បឿនលឿន ក៏ស្រាប់ឃើញម៉ូតូ ដូចជាទំនងចាប់ហ្វ្រាំងមិនទាន់ ក៏ទៅញ៉ុលគូថរថយន្តដឹកស៊ីម៉ង់តិ៍ បើកស្របទិសគ្នា រួចប្រកាច់ស្លាប់ភ្លាមៗ ១ នាក់ និងម្នាក់ទៀតរបួសធ្ងន់ ត្រូវរថយន្តសង្គ្រោះបន្ទាន់ដឹកយកទៅ ស្រាប់តែមួយសន្ទុះ ក៏ឮដំណឹងថា ស្លាប់បាត់ទៀតហើយ ដោយរថយន្តនោះ មិនបានដឹងថា មានម៉ូតូបុកទេក៏បើកទៅមុខជាធម្មតា ។ សាក្សីបន្តថា ក្រោយពេលកើតហេតុភ្លាម ពួកខ្ញុំឃើញសមត្ថកិច្ចចរាចរមកដល់ ហើយធ្វើការវាស់វែង យកសាកសពនិងម៉ូតូចេញ ដើម្បីធ្វើចរាចរកុំឲ្យកកស្ទះ ។
សមត្ថកិច្ចចរាចរណ៍ នៃការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាប បានប្រាប់ឲ្យ ដឹងថាថា មុនពេលកើតហេតុ ជនរងគ្រោះបានជិះម៉ូតូសង់C125ពណ៌ខ្មៅ២នាក់ អ្នកបើកម៉ូតូដែលស្លាប់នៅកន្លែង កើតហេតុឈ្មោះ ស៊ុន ប៉ូលីន ភេទប្រុសអាយុ២៥ឆ្នាំ បច្ចុប្បន្នស្នាក់នៅភូមិប្រិយថ្មី សង្កាត់ ទឹកវិល ក្រុងសៀមរាប និងម្នាក់ទៀតរងរបួសធ្ងន់ដឹកដល់ពេទ្យខេត្តស្លាប់ឈ្មោះ លុន លឿន ភេទប្រុស អាយុ២៣ឆ្នាំ ស្នាក់នៅភូមិឃុំជាមួយគ្នា ជិះម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខសៀមរាប1 M6395 មកពីលិចមកកើត ។ ចំណែកអ្នកបើករថយន្តពេលដឹងថា មានអ្នកជិះម៉ូតូបុកគូថឡាន ទើបតៃកុងជាន់ហ្គាបន្ថែមតាមផ្លូវក្រវ៉ាត់ក្រុង ពេលនោះ មកដល់ស្ពានកុងម៉ុច ស្រាប់តែប៉ូលីសហៅឲ្យឈប់ រួចចុះបើកទ្វាររត់បាត់ ។
សមត្ថកិច្ចចរាចរណ៍បានបន្តថា ក្រោយពេលធ្វើការឃាត់បានរថយន្តស៊ីម៉ង់តិ៍ ដែលដឹកមកពីប៉ោយប៉ែតនៃខេត្តបន្ទាយមានជ័យរួចមក កម្លាំងជំនាញបានយករថយន្ត ដែលមានម៉ាក FUSO ពណ៌ខៀវពាក់ស្លាកលេខស្វាយរៀង 3A0549 ។ បច្ចុប្បន្នសាក សព យុវជនទាំងពីរត្រុវបានសមត្ថកិច្ចធ្វើការប្រគល់ឲ្យ ក្រុមគ្រួសារយកទៅធ្វើបុណ្យតាមប្រពៃណី។ចំណែករថយន្តត្រូវបានកម្លាំងជំនាញយកទៅទុកនៅស្នងការផ្នែកចរាចរផ្លូវគោកដើម្បីដោះស្រាយតាមច្បាប់ រីឯម៉ូតូ សមត្ថកិច្ចបានប្រគល់ឲ្យក្រុមគ្រួសារសពវិញនៅកន្លែងកើតហេតុ៕
