ខេត្តរតនគិរី ៖ តាមប្រភពពីប្រជាពលរដ្ឋបានឲ្យដឹងថា កាលពីយប់ថ្ងៃទី២១ ខែតុលា ឆ្នាំ២០១៨ រថយន្តយីឌុបប៉ុន្មានគ្រឿងដែលលួចលូនក្បាលចូលទៅស្ងាត់ៗចតចាំដាក់ឈើក្នុងក្រុមហ៊ុន SKឥណ្ឌា ក្រោយពេលឮសូរថាមានសមត្ថកិច្ចនិងចូលចាប់បង្ក្រាបកំណាត់ឈើក្បែរក្រុមហ៊ុនមួយនេះ រថយន្តយីឌុបទាំងនោះក៍បត់ក្បាលចេញពីក្រុមហ៊ុនវិញយ៉ាងប្រញ៉ាប់ប្រយ៉ាល់ព្រលឹងចុងសក់ ហាក់ដូចជាដឹងសភាពការណ៍មុន ពីព្រោះខ្លាចមានការពាក់ព័ន្ធយ៉ាងណានោះ?
។
ក្រុមហ៊ុន SKឥណ្ឌា បានទទួលសិទ្ធិវិនិយោគពីរាជរដ្ធាភិបាលដាំដំណាំកសិឧស្សាហកម្មដូចក្រុមហ៊ុនផ្សេងៗស្ថិតក្នុងឃុំត្រពាំងក្រហម ស្រុកកូនមុំ ខេត្តរតនគិរី ប៉ុន្តែមួយរយះកាលចុងក្រោយនេះ គេសង្កេតឃើញទិដ្ធភាពក្រុមហ៊ុន SK មួយនេះពុំឃើញមានសកម្មភាពដាំដុះដំណាំអ្វីជាដុំកំភួនទៅតាមលក្ខណ:បច្ចេកទេសនៃទីស្តីការគណ:រដ្ធមន្ត្រីដែលបានចេញអាជ្ញាប័ណ្ណឲ្យនោះឡើយ។
ច្បាប់វិនិយោគដីសម្បទានសេដ្ធកិច្ចរបស់រាជរដ្ឋាភិបាល គឺដីមានកុងត្រាត្រូវការឈូសឆាយដាំដុះតំបន់ណាៗក្នុងមួយឆ្នាំៗត្រូវឆ្លើយតបទៅរាជរដ្ឋាភិបាលថាបានដំណាំអ្វីខ្លះនិងបានប៉ុន្មានហិកតា? ហើយការឈូសឆាយនេះមានរយះពេលជាច្រើនឆ្នាំកន្លងមកហើយ រហូតមកទល់ពេលនេះពុំទាន់ឃើញដាំបានអ្វីសោះមើលទៅឃើញវាលរហោថាន តែបែរមកលេចធ្លោរករណីកន្ទេលធំបន្លំដេកពាក់ព័ន្ធជាមួយឈ្មួញឲ្យប្រើប្រាស់ក្រុមហ៊ុនដើម្បីលួចលាក់ឈើ ហើយរត់ទៅហែត PC ឃុបឃិតនិងថ្នាក់លើមួយចំនួន និងការកាប់ទន្ទ្រានបំផ្លិចបំផ្លាញធនធានធម្មជាតិយ៉ាងពេញបន្ទុកទៅវិញ។
ជាក់ស្តែងដើមឈើធំៗនៅក្នុងដីសង្គមកិច្ចរបស់រដ្ឋជាប់ព្រំប្រទល់ក្រុមហ៊ុននេះជាដើម បានរងនូវការបាត់បង់ស្ទើរតែទាំងស្រុង។ មិនតែប៉ុណ្ណោះគេសង្កេតឃើញថ្មីៗនេះមានរថយន្តយីឌុបកង់ដប់ប្រមាណបីបួនគ្រឿង និងរថយន្តស្ទូចមួយគ្រឿងចូលទៅក្នុងក្រុមហ៊ុន SKឥណ្ឌា ទំនងបម្រុងដឹកជញ្ជូនឈើចាស់ដែលនៅសេសសល់ក្នុងក្រុមហ៊ុនមួយនេះចេញ ដោយឮថាមានឈើនៅបន្សល់ឈើរាប់ពាន់ម៉ែត្រគូបឯណោះត្រូវនាំចេញជាបន្តបន្ទាប់នៅក្នុងអំឡុងពេលដាច់ទឹកភ្លៀងដ៍ខ្លីខាងមុខនេះ។
មួយវិញទៀត តាមប្រភពពីប្រជាពលរដ្ឋបានឲ្យដឹងថា កាលពីថ្ងៃទី១៨ ខែតុលា ឆ្នាំ២០១៨ កន្លងទៅថ្មីៗនេះ ពួកគេប្រទះឃើញឈើជាច្រើនគំនរ សុទ្ធតែប្រភេទឈើប្រណិត សុក្រំ កកោះនិងធ្នង់ អាឃ្លុំសម្រេចប្រវែង(0.50m)(0.60m)(0.80m) (1.00m)ទៅ(1.20m)និងមានមុខកាត់ចម្រុះ(20,30,40ក្លុំ)។ល។
ឈើដ៍ច្រើនសន្ធឹកសន្ធាប់ រាប់ពាន់កំណាត់ដែលប្រមាណមិនក្រោមរាប់រយម៉ែត្រគូបនោះឡើយ ដែលក្រុមឈ្មួញយកមកស្តុកលាក់ទុកយ៉ាងស្ងៀមស្ងាត់និងរលូន នៅត្រង់ចំណុចដីសង្គមកិច្ចឃ្លាតឆ្ងាយពីដីក្រុមហ៊ុន SKឥណ្ឌា ខាងលើនេះចម្ងាយប្រមាណជាងមួយរយម៉ែត្រប៉ុណ្ណោះ។
ប្រភពដដែលបន្តថា ឈើទាំងនោះគេសង្ស័យថាក្រុមឈ្មួញបានទិញនិងដឹកជញ្ជូនចេញពីម្តុំព្រៃធម្មជាតិខាងជើងទំនប់វារីអគ្គីសនីសេសានក្រោម២ ក្នុងភូមិសាស្ត្រខេត្តស្ទឹងត្រែង កាលពីប៉ុន្មានខែមុននេះតាមគោយន្តកន្ត្រៃយ៍មកស្តុកទុកក្បែរដីក្រុមហ៊ុនរង់ចាំឱកាសល្អដាក់បន្លំនិងឈើក្រុមហ៊ុនចាស់ដែលបម្រុងនាំចេញបន្ទាប់ពីបានច្បាប់PCរួចហើយ។
ប៉ុន្តែក្រោយពីប្រទះឃើញគំនរឈើទាំងនោះហើយ ប្រជាពលរដ្ធក៍បានរាយការណ៍ជាបន្តបន្ទាប់ទៅសមត្ថកិច្ចមូលដ្ឋានដើម្បីចាត់វិធានការណ៍ទៅតាមផ្លូវច្បាប់ ។
រហូតមកដល់ថ្ងៃច័ន្ទទី២២ ខែតុលា ឆ្នាំ២០១៨ លោក រស់ វណ្ណា មេបញ្ជាការកងរាជអាវុធហត្ថស្រុកកូនមុំ បានដឹកនាំកងកម្លាំងចូលរឹបអូសយកឈើមិនស្របច្បាប់ទាំងនោះមករក្សាទុកបានចំនួនពីរកូនគោយន្តខ្នាតតូច ប្រមាណ30ទៅ40ដុំប៉ុណ្ណោះ នៅសល់ឈើមួយចំនួនធំមិនទាន់ឃើញសមត្ថកិច្ចចុះបង្ក្រាបបន្តនៅឡើយ ធ្វើឲ្យមជ្ឈដ្ធានទូទៅដាក់ការសង្ស័យថា សមត្ថកិច្ចបង្ក្រាបគ្រាន់តែបង្គ្រប់កិច្ច ហើយដកឃ្លាមកធ្វើការចចារ ទុកឈើទាំងនោះឲ្យឈ្មួញវិញម៉ាចំនួនធំ ពីព្រោះខណៈពេលនៃការចុះបង្ក្រាប គេឃើញអ្នករត់ការម្នាក់រត់ហែក PC នៅភ្នំពេញ ដើម្បីបំពេញលក្ខណៈស្របច្បាប់ធ្វើអាជីវកម្មយកឈើខុសច្បាប់ទាំងនេះនាំចេញដោយជ្រកក្រោមផ្លាកក្រុមហ៊ុន SKឥណ្ឌា ព្រមទាំងការស្តារបាតអាងទំនប់វារីសេសានក្រោមពីរជាដើម។
ប្រតិបត្តិការចុះបង្ក្រាបនាខណៈនោះផងដែរ លោកមេបញ្ជាការបានឲ្យអ្នកសារព័ត៌មានដឹងថា លោកនិងប្រមូលឈើខុសច្បាប់ទាំងនោះមិនឲ្យសល់សូម្បីមួយកំណាត់ ហើយឈើទាំងនេះ លោកនិងនាំទៅរក្សាទុកនៅទីបញ្ជាការស្រុកកូនមុំដើម្បីចាត់ការតាមនិតិវិធីច្បាប់ ។
