រាជធានីភ្នំពេញ ៖ តាមសេចក្តីរាយការណ៏បានឲ្យដឹងថា បុរសវ័យចំណាស់អាយុ៧១ឆ្នាំម្នាក់បានស្លាប់កាលពីនៅវេលាម៉ោង៤និង៣០នាទីព្រឹកថ្ងៃទី២៤ ខែតុលា ឆ្នាំ២០១៨ នៅផ្ទះសំណាក់ភ.ម ស្ថិតនៅសង្កាត់ភ្លើងឆេះរទេះ ខណ្ឌពោធិ៍សែនជ័យ។
លោកតាជនរងគ្រោះឈ្មោះ ខ .ឃ ភេទប្រុសអាយុ៧១ឆ្នាំ សព្វថ្ងៃស្នាក់នៅភូមិព.ប ស្រុកអង្គស្នួល ខេត្តកណ្ដាល។
សមត្ថកិច្ចបានឲ្យដឹងថា នៅវេលាម៉ោងប្រហែលជា៥ល្ងាចម្សិលមិញ ជនរងគ្រោះបានតេរកស្រីស្នេហ៍ឈ្មោះនាង ព. ស អាយុ៣២ឆ្នាំ ភេទស្រីដែលជាចុងភៅក្នុងហាងនៅផ្សារថ្នល់ទទឹង ដោយណាត់គ្នាទៅជួបគ្នានៅផ្ទះសំណាក់ដូចរាល់ដង ។
សមត្ថកិច្ចបញ្ជាក់ថា លុះដល់ម៉ោងប្រហែលជា៧និង៣០នាទីយប់ គាត់ក៏មកដល់ផ្ទះសំណាក់ទាំងពីរនាក់ដោយដេកជាមួយគ្នារហូតដល់ម៉ោងប្រហែលជា ៤ទៀបភ្លឺ ទើបជនរងគ្រោះបាននិយាយប្រាប់ដៃគូថា មិនសូវស្រួលខ្លួននិងឲ្យនារីកំណាន់កោសខ្យល់ឲ្យ រួចហើយនាងក៏ចូលងូតទឹកទៅ ស្រាប់តែពេលចេញមកឃើញជនរងគ្រោះដេកហាមាត់ទៅហើយ ក៏ហៅនិងអង្រួនតែជនរងគ្រោះមិនមានការឆ្លើយតប ក៏រត់មកហៅម្ចាស់ផ្ទះសំណាក់ ។ ប៉ុន្តែជនរងគ្រោះបានស្លាប់បាត់ទៅហើយ ទើបបង្កឲ្យមានការភ្ញាក់ផ្អើល រួចក៏បានរាយការណ៍ទៅសមត្ថកិច្ចមូលដ្ឋាន ដើម្បីចុះពិនិត្យជាក់ស្តែងនៅហ្នឹងកន្លែងកើតហេតុ។
ក្រោយពិនិត្យ និងធ្វើកោសល្យវិច្ឆ័យរួចសមត្ថកិច្ចបានឲ្យដឹងថា ជនរងគ្រោះបានស្លាប់ដោយសារជំងឺគាំងបេះដូង បច្ចុប្បន្នសព ត្រូវបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណីនៅស្រុកកំណើត៕
