ភ្នំពេញ ៖ ទន្ទឹមនឹងការទាមទារឲ្យអាជ្ញាធរកម្ពុជាបង្ហាញភស្តុតាងចំពោះការចាប់ឃុំខ្លួនលោក កឹម សុខា អតីតប្រធានគណបក្សសង្គ្រោះជាតិ និងការរំលាយគណបក្សសង្គ្រោះជាតិ កាលពីចុងឆ្នាំ២០១៧ សហភាពអន្តរសភា IPU បានទាមទារជាថ្មី ដល់អាជ្ញាធរកម្ពុជា ឲ្យដោះលែងលោក កឹម សុខា អតីតប្រធានគណបក្សសង្គ្រោះជាតិ ឲ្យមានសេរីភាពពេញលេញឡើងវិញ ដោយថាការចាប់ខ្លួនអតីតមេដឹកនាំគណបក្សប្រឆាំងរូបនេះ មិនមានភស្តុតាងគ្រប់គ្រាន់ទេ។
យោងតាមការសម្រេចរបស់ IPU បានលើកឡើងថា ការចាប់ឃុំខ្លួនលោក កឹម សុខា នោះ មិនមានភស្តុតាងត្រឹមត្រូវទេ ហើយជំរុញដល់អាជ្ញាធរកម្ពុជា ឲ្យដោះលែងលោក និងអនុញ្ញាតឲ្យគណបក្សសង្គ្រោះជាតិអាចដំណើរការវិញផងដែរ ។
ប៉ុន្តែគណប្រតិភូរដ្ឋសភាកម្ពុជាដែលបានទៅចូលរួមប្រជុំនៅ IPU បានបង្ហាញការខកចិត្តយ៉ាងខ្លាំង ចំពោះសេចក្តីសម្រេចរបស់ IPU ដោយបានចាត់ទុកថា ជាការលាបពណ៌ប្រទេសកម្ពុជាឲ្យខ្មៅងងឹត ដោយមានភាពលម្អៀងទៅរកអតីតតំណាងរាស្ត្រដែលត្រូវបានតុលាការកាត់ទោស ព្រោះទង្វើក្បត់ជាតិរបស់ពួកគេ ៕
