ខេត្តស្វាយរៀង ៖ តាមប្រភពពត័មានដែលបានចុះផ្សាយតាមបញ្តាញពត័មានក្នុងស្រុកឲ្យដឹងថា លោក ខៀវ សារឿន ប្រធានសាខាគយនិងរដ្ឋាករខេត្តស្វាយរៀងដែលជិតចូលនិវត្តន៍ បានគៀបសង្កត់ឈ្មួញ បង្ខំឲ្យបង់ប្រាក់សម្រាប់ក្បាលរថយន្តដឹកទំនិញឆ្លងកាត់ខេត្ត ដោយមិនគិតពី ទំនិញបង់ពន្ធនាំចូលស្របច្បាប់ ទំនិញបង់ពន្ធនាំចូលមិនគ្រប់ ទំនិញលោតឆ័ត្រជាដើមនោះឡើយ ។ ក្នុងនោះសូម្បីតែទំនិញវិនិយោគពន្ធអាករជាបន្ទុករបស់រដ្ឋក៏ដោយ ក៏លោក ខៀវ សារឿន តម្រូវឲ្យបង់លុយ និងធ្វើបាបអាជីវករ ដែលដឹកផ្លែឈើគ្រាន់រកស៊ីរកអង្ករច្រកឆ្នាំងក៏តម្រូវឲ្យបង់លុយមិនប្រណីដៃដែរ។
តាមរយៈអំពើពុករលួយនេះ លោក ខៀវ សារឿន ហ៊ានទាំងប្រព្រឹត្តបំពានច្បាប់ផ្ទុយពីការណែនាំរបស់លោកបណ្ឌិត គុណ ញឹម អគ្គនាយក នៃអគ្គនាយកដ្ឋានគយនិងរដ្ឋាករកម្ពុជា ។
ប្រភពពីក្រុមឈ្មួញបានបញ្ជាក់ថា លោក ខៀវ សារឿន តម្រូវឲ្យរថយន្តដឹកទំនិញធំៗដោយមិនគិតបង់ពន្ធនាំចូលគ្រប់ ឬមិនគ្រប់ បង្កប់ទំនិញនាំចូលបង់ពន្ធខ្ពស់ក៏មិនគិត ទំនិញរសើបលោតឆ័ត្រមិនបង់ពន្ធទាំងអស់ក៏មិនគិត សំខាន់ត្រូវបង់ក្បាលរថយន្ត ក្នុង១រថយន្តចំនួន២៥០ដុល្លារទៅ៣០០ដុល្លារ និងមិនគិតពីការបង់ប្រាក់ប្រចាំខែ សម្រាប់ឈ្មួញ ឬក្រុមហ៊ុនមួយចំនួនទៀត ដែលដឹកទំនិញឆ្លងកាត់ខេត្តស្វាយរៀង ។ ដោយឡែកចំពោះរថយន្តដឹកទំនិញវិនិយោគ ដែលពន្ធអាករជាបន្ទុករបស់រដ្ឋ ក៏លោក ខៀវ សារឿន បានកំណត់ឲ្យបង់ក្នុង១រថយន្ត២ម៉ឺនរៀលសម្រាប់ថ្លៃបាយ ក្នុងនោះមានមួយថ្ងៃៗរាប់រយគ្រឿង ។ បើនិយាយអំពីរថយន្តទេសចរណ៍ រថយន្តក្រុងដឹកអ្នកដំណើរ គ្រប់ក្រុមហ៊ុនគឺបង្កប់ទំនិញគេចពន្ធ ដោយមិនអាចប្រកែកបានយ៉ាងពិតប្រាកដគឺ១០០ភាគរយ ។ ដូច្នេះ រាល់រថយន្តក្រុងដឹកអ្នកដំណើរបង្កប់ទំនិញគេចពន្ធនេះ ក៏ត្រូវបង់ក្បាលរថយន្តជូនលោក ខៀវ សារឿន តាមការទាមទារដែរ ។ ប៉ុន្តែគេពុំដឹងថា ក្នុង១រថយន្តតម្លៃប៉ុន្មាន? គ្រាន់តែក្រុមហ៊ុនដឹកទំនិញខ្លះលួចបង្ហើបថា គ្រាន់តែរថយន្តក្រុង១គ្រឿងក៏១ខែត្រូវបង់ប្រាក់សម្រាប់សមត្ថកិច្ចគ្រប់ស្ថាប័នសរុបជាង១ម៉ឺនដុល្លារ ។ ខណះរថយន្តក្រុងទាំងរបស់ខ្មែរ និងរថយន្តក្រុងរបស់វៀតណាម សុទ្ធតែបានលួចបង្កប់ដឹកទំនិញគេចពន្ធ និងជាប្រភេទទំនិញបង់ពន្ធនាំចូលខ្ពស់។ នេះមិនទាន់គិតពីទំនិញអេឡិចត្រូនិច ទំនិញបង់ពន្ធនាំចូលខ្ពស់ តែបង់ពន្ធជាទំនិញផ្សេង និងមិនគ្រប់ចំនួនជាដើមផង។
លោក ខៀវ សារឿន ក្រៅពីធ្វើកិច្ចការក្នុងតួនាទីភារកិច្ចគៀបសង្កត់ឈ្មួញ លោកក៏មានចេតនាទុច្ចរិត បំបាត់ពន្ធរដ្ឋ ដើម្បីបំពេញតម្រូវការផលប្រយោជន៍ឆ្នាំងបាយបុគ្គលខ្លួនឯង និងបក្ខពួកក៏ដូចជារកចំណូលក្រោមតុ ដោយអំពើគៀបសង្កត់ឈ្មួញសម្រាប់តម្រូវការថ្នាក់លើផងដែរ ។ ក្នុងនោះគេទទួលស្គាល់ថា ក្នុង១ខែៗលោក ខៀវ សារឿន រកចំណូលដោយអំពើពុករលួយរបៀបប្រើទម្លាប់ខុសពីច្បាប់គយបានរាប់ម៉ឺន រាប់សែនដុល្លារ ។ អ្វីដែលឈ្មួញតូចតាចកំពុងតឹងទ្រូងនោះ ត្រង់ថាលោក ខៀវ សារឿន បានពង្រាយមនុស្សឲ្យចាំយកលុយពីប្រជាពលរដ្ឋដឹកទំនិញបន្តិច បន្តួច សម្រាប់ដោះស្រាយជីវភាពផ្ទាល់ខ្លួន តាមច្រកទ្វេភាគី ច្រករបៀង ដោយខ្វះមន្ត្រីគយ លោក ខៀវ សារឿន បានឲ្យកូនអ្នកស្រុកដែលពួកខ្លួនទុកចិត្តបន្លំស្លៀកឯកសណ្ឋានជាគយ តាមច្រករបៀងដើម្បីយកលុយពី ប្រជាពលរដ្ឋដឹកឥវ៉ាន់ ។ កន្លងទៅត្រូវបានគេរាយការណ៍មកថា លោក ខៀវ សារឿន បានឲ្យជនស៊ីវិលស្លៀកឯកសណ្ឋានគយយកលុយពីប្រជាពលរដ្ឋដឹកទំនិញ មានដូចជានៅច្រករបៀងខ្សែដែក ច្រកដូង ច្រកថ្នាធ្នង់ ច្រកតាំងយូ ច្រកតាអី និងច្រកជាង១០កន្លែងទៀត។ ក្នុងនោះជាក់ស្តែងនៅច្រកទ្វេរភាគីបុសមន គឺតាលីន មេគយច្រកបុសមន បានប្រើឈ្មោះផល ជាជនស៊ីវិល ត្រូវជាកូនខ្មោចតាម៉ៅ រស់នៅភូមិស្រម៉ ឃុំបុសមន ស្រុករំដួល ខេត្តស្វាយរៀង អោយស្លៀកឯកសណ្ឋានគយ របៀបជាខោគយ ហើយយកអាវធំពណ៍ខ្មៅពាក់ពីលើអាវគយបន្លំៗ ជាមន្ត្រីគយ ចាំយកលុយពីច្រករបៀងតាអី ច្រកថ្នាធ្នង់ ច្រកបុសតូច ច្រកបុសមន ច្រកដូង ហើយនៅច្រកបុសមន ក៏មានជនស៊ីវិល២នាក់ផ្សេងទៀតធ្វើការរបៀបនេះឋិតក្រោមការបញ្ជាផ្ទាល់ពីតាលីន ចាំយកលុយពីឈ្មួញ ប្រជាជនដឹកទំនិញ។ មានន័យថា បើមន្ត្រីគយរបស់លោក ខៀវ សារឿន បីទៅបួននាក់ គឺគាត់បានពង្រាយយកជនស៊ីវិល ទៅបន្លំឲ្យស្លៀកឯកសណ្ឋានគយ ចាំយកលុយបានជាង១០ ច្រករបៀង ។
បញ្ហាមិនប្រក្រតីខាងលើ មជ្ឈដ្ឋានសាធារណបានរិះគន់ទៅលើចន្លោះប្រហោងរបស់លោកបណ្ឌិត គុណ ញឹម អគ្គនាយក អគ្គនាយកដ្ឋានគយនិងរដ្ឋាករកម្ពុជា ទើបលោក ខៀវ សារឿន ហ៊ានប្រព្រឹត្តអំពើពុករលួយ ហ៊ានដឹកនាំការងារអនុវត្តផ្ទុយពីគោលការណ៍ថ្នាក់លើ ដូចជាទទួលសំណូកពីទំនិញក្លែងភេទ ឃុបឃិតគ្នាជាមួយឈ្មួញ ជាមួយក្រុមហ៊ុន អោយទំនិញបង់ពន្ធនាំចូលខ្ពស់ មកបង់ពន្ធទាបជាប្រភេទទំនិញខុសពីប្រតិវេទន៍គយ ហើយបង់ពន្ធមិនគ្រប់ចំនួនទៀត។
ពាក់ព័ន្ធករណីរិះគន់ខាងលើនេះ អង្គភាពមិនអាចទាក់ទងសុំការបំភ្លឺបានទេពីលោក ខៀវ សារឿន ប្រធានសាខាគយនិងរដ្ឋាករខេត្តស្វាយរៀង តែរង់ចាំស្វាគមន៏នូវការបំភ្លឺជានិច្ច៕
