ភ្នំពេញ ៖ កាលថ្ងៃទី ២៦ ខែកញ្ញា ឆ្នាំនេះ សមាគមរោងចក្រកាត់ដេរកម្ពុជា ( GMAC ) បានស្នើសុំឲ្យរដ្ឋមន្ត្រីបរិស្ថានរៀបចំការជួបពិភាក្សាគ្នាត្រីភាគីរវាងក្រសួង បរិស្ថាន សមាគមរោងចក្រកាត់ដេរនៅកម្ពុជា និង ក្រុមហ៊ុនប្រមូលសំរាម Sarom Trading Co.,Ltd ដោយសមាគមរោងចក្របានអះអាងថា ក្រុមហ៊ុន Sarom Trading Co.,Ltd ប្រមូលសំរាមពុំមានប្រសិទ្ធភាពដូចការកំណត់ ដោយយឺតយ៉ាវទាំងការប្រមូលនិងប្រមូលមិនគ្រប់តាមការកំណត់ក្នុងមួយខែៗ។
ចំណែកមន្ត្រីអ្នកនាំពាក្យក្រសួងបរិស្ថានបានថ្លែងអះអាងថា ក្រសួងនឹងពិនិត្យលិខិតស្នើសុំរបស់ GMAC ជុំវិញករណីកាកសំណល់ឧស្សាហកម្ម ខណដែល GMAC ស្នើសុំជួបពិភាក្សាជាមួយក្រសួងដើម្បីរកដំណោះស្រាយលើការប្រមូលកាកសំណល់ឧស្សាហកម្មនៅតាមរោងចក្រនានា។
ពាក់ព័ន្ធលិខិតរបស់ GMAC នោះលោក នេត្រ ភក្ត្រា អ្នកនាំពាក្យក្រសួងបរិស្ថានបានថ្លែងប្រាប់អ្នកសារព័ត៌មានថា ក្រសួងបរិស្ថានបានទទួលលិខិត របស់សមាគមរោងចក្រកាត់ដេរនៅកម្ពុជានោះហើយ ដោយលោកថា ការស្នើសុំនេះជាដំណឹងដ៏រីករាយដែលក្រុមហ៊ុនឯកជន បានចូលរួមយ៉ាងសកម្មជាមួយក្រសួងបរិស្ថានក្នុង ការសម្អាតអនាម័យ បរិស្ថាន គ្រប់គ្រងសំណល់រឹង សំរាមនៅតាមទីតាំងរបស់ខ្លួនហើយក្រសួងបរិស្ថាននឹងពិនិត្យលើសំណើនេះ។ លោកថា ក្រសួងនឹងធ្វើការពិនិត្យពិភាក្សាលើសំណើក្នុងពេលវេលាសមស្រប ៕
