ខេត្តស្ទឹងត្រែង ៖ រថយន្តយីឌុប៣គ្រឿង ដឹកជញ្ជូនឈើម៉ៃសាក់របស់ក្រុមហ៊ុនកែវ វុទ្ធី ត្រូវបានកម្លាំងសមត្ថកិច្ចខេត្តស្ទឹងត្រែងចុះឃាត់ ដើម្បីពិនិត្យលិខិតអនុញ្ញាតរកមើលពីភាពត្រឹមត្រូវតាមផ្លូវច្បាប់ ចេញដោយមន្ត្រីជំនាញព្រៃឈើមូលដ្ឋាន និងរដ្ឋបាលព្រៃឈើថ្នាក់កណ្តាល នៃក្រសួងកសិកម្ម រុក្ខាប្រមាញ់ និងនេសាទ។
រថយន្តខ្នាតយក្សដឹកឈើម៉ៃសាក់ទាំង៣គ្រឿងនោះ បានរងការឃាត់កាលពីម៉ោង១ និង៣០នាទីរសៀលថ្ងៃទី២៥ កញ្ញា ម្សិលមិញ នៅលើកំណាត់ផ្លូវជាតិលេខ៧ ជិតផ្លូវបំបែកចូលភូមិអូរស្វាយ ជាប់នឹងស្នាក់ការរដ្ឋបាលព្រៃឈើដុងក្រឡ ស្ថិតនៅក្នុងសង្កាត់សាមគ្គី ក្រុងស្ទឹងត្រែង។
ប្រតិបត្តិការចុះឃាត់រថយន្តនោះទៀតត្រូវគេដឹងថា បានធ្វើឡើងដោយកម្លាំងការិយាល័យ នគរបាលប្រឆាំងបទល្មើសខេត្ត ក្រោមការដឹកនាំបញ្ជាពីព្រះរាជអាជ្ញារង អមសាលាដំបូងខេត្តស្ទឹងត្រែង លោក គឹម ហុងសាន ។
ព្រះរាជអាជ្ញារង អមសាលាដំបូង ខេត្តស្ទឹងត្រែង លោក គឹម ហុងសាន ត្រូវបានប្រភពដកស្រង់សម្តីលោក ថ្លែងប្រាប់អ្នកសារព័ត៌មានថា ក្រោយពីទទួលបានការរាយការណ៍ ពីរថយន្តដឹកឈើចំនួន៣គ្រឿង តាមរយះសមត្ថកិច្ចនោះមក ទើបមន្ត្រីសាលាដំបូងខេត្ត ចុះទៅពិនិត្យមើលជាក់ស្តែង ដើម្បីរកឯកសារនានាដែលពាក់ព័ន្ធនឹងផ្លូវច្បាប់។ លោកថា ដល់ពេលសាកសួរទៅ ឃើញថា អ្នកបើកបររថយន្តទាំងអស់នោះ ពុំទាន់មានច្បាប់ដឹកជញ្ជូន ពីជំនាញរដ្ឋបាលព្រៃឈើនៅឡើយទេ។ ក្រោយការឃាត់នោះរួច រថយន្តទាំង៣គ្រឿងនោះ ត្រូវបានកម្លាំងនគរបាលប្រឆាំងបទល្មើស នាំយកកាន់ស្នងការដ្ឋាន នគរបាលខេត្តស្ទឹងត្រែង កាលពីព្រលប់ថ្ងៃទី២៥កញ្ញាម្សិលមិញនេះ។
ប្រធានការិយាល័យនគរបាលប្រឆាំងបទល្មើសខេត្ត លោកវរៈសេនីយ៍ឯក វ៉ា សុផាន់ បានប្រាប់ឲ្យដឹងថា ក្រោយការបញ្ជូនរថយន្តដឹកឈើម៉ៃសាក់ទាំង៣គ្រឿងនេះ មកដល់ស្នងការរួចនោះ រហូតមកទល់នឹងពេលនេះ កម្លាំងនគរបាលជំនាញ និងមន្ត្រីព្រៃឈើខេត្ត កំពង់រង់ចាំបញ្ជារបស់ថ្នាក់លើ ដើម្បីពិនិត្យរកភាពត្រឹមត្រូវតាមផ្លូវច្បាប់ ដូចជា លិខិតកាប់ និងវាស់«ចេញPC»ឈើម៉ៃសាក់ រួមជាមួយលិខិតដឹកជញ្ជូនឈើ ហើយក៏រង់ចាំពីខាងភាគីតំណាងក្រុមហ៊ុន ចូលខ្លួនមកធ្វើការដោះស្រាយតាមផ្លូវច្បាប់ ផងនោះដែរ។
ប្រភពពីអ្នកបើកបររថយន្តនោះ បានបង្ហើបឲ្យដឹងថា រថយន្តដឹកឈើម៉ៃសាក់ទាំង៣គ្រឿង របស់ក្រុមហ៊ុនកែវ វុទ្ធីនេះ ១គ្រឿងគេមានបំណងនាំយកទៅប្រើប្រាស់ក្នុងស្រុក និងពីរគ្រឿងទៀត គេនឹងនាំឆ្លងដែន យកទៅលក់ចូលទៅប្រទេសវៀតណាម។
សូមជម្រាបថា ក្រុមហ៊ុនកែវ វុទ្ធី គឺជាក្រុមមួយ ទទួលបានការអនុញ្ញាតពី រាជរដ្ឋាភិបាល វិនិយោគដាំដំណាំដំឡូងមី លើទំហំផ្ទៃដីសរុប ៧ពាន់ ៤០០ហិចតា នៅប្របនឹងដងផ្លូវជាតិលេខ៧ ត្រង់ផ្លូវបំបែកចូលទៅភូមិអូរស្វាយ ស្ថិតក្នុងសង្កាត់សាមគ្គី ក្រុងស្ទឹងត្រែង។
មន្ត្រីក្រុងស្ទឹងត្រែងមួយរូប បានបង្ហើបឲ្យដឹងថា ក្រុមហ៊ុនកែវ វុទ្ធី ទទួលបានសិទ្ធិវិនិយោគលើដំណាំដំឡូងមី ចាប់តាំងពីឆ្នាំ១៩៩៩នោះមក ក្រោយមកទៀត គេក៏បានឃើញក្រុមហ៊ុននេះ ដាំដើមម៉ៃសាក់នៅលើផ្ទៃដីនោះជាអន្លើរៗ។ លោកថា ក្រោយមកទៀត ក្រុមហ៊ុនកែវ វុទ្ធី បានចាប់ដៃគូវិនិយោគជាមួយក្រុមហ៊ុន របស់វៀតណាមមួយ សំរាប់បន្តដាំដំណាំកសិកម្មដំឡូងមី។ ប៉ុន្តែ ជាច្រើនឆ្នាំកន្លងមកនេះ ដំណាំដំឡូងមីគេមិនសូវឃើញដាំនោះទេ ក្រៅពីការដាំដើមម៉ៃសាក់ នៅដាច់ដោយឡែកពីគ្នាជាច្រើនកន្លែង នៅលើផ្ទៃដីវិនិយោគរបស់ក្រុមហ៊ុននោះ។ លោកបង្ហើបទៀតថា ស្រាប់តែនៅពេលនេះ គេបានឃើញក្រុមហ៊ុនមួយនេះ បានកាប់ដើមម៉ៃសាក់នោះដឹកតាមរថយន្តធំៗ ហើយសមត្ថកិច្ចបានសង្ស័យ ក៏ចុះទៅឃាត់ ដើម្បីពិនិត្យរក« PC » និងលិខិតដឹកជញ្ជូន។ លោកថា បើតាមដឹង ការដឹកជញ្ជូនឈើម៉ៃសាក់នេះ ក្រុមហ៊ុនមិនមានទាំង « PC » និងលិខិតដឹកជញ្ជូននោះឡើយ ដូច្នេះហើយទើបសមត្ថកិច្ចចុះទៅឃាត់ រកច្បាប់អនុញ្ញាត៕
