ខេត្តកំពង់ធំ ៖ មន្ទីរបរិស្ថានខេត្តកំពង់ធំ សហការជាមួយក្រសួងបរិស្ថាន នៅព្រឹកថ្ងៃទី២៥ ដល់២៦ ខែកញ្ញា ឆ្នាំ២០១៨ បានរៀបចំវគ្គបណ្តុះបណ្តាលតម្រង់ទិស ស្តីពីការពង្រឹងប្រសិទ្ធភាពនៃការអនុវត្តច្បាប់ និងការកសាងសំណុំរឿងបទល្មើសធនធានធម្មជាតិ ក្រោមអធិបតីលោក សុខ លូ អភិបាលខេត្តកំពង់ធំ ដោយមានការអញ្ជើញចូលរួមពីលោក អាង ច័ន្ទធឿន អនុប្រធាននាយកដ្ឋានអធិការកិច្ច និងពង្រឹងការអនុវត្តច្បាប់ នៃអគ្គនាយកដ្ឋានរដ្ឋបាលការពារ និងអភិរក្សធម្មជាតិ និងសហការី នាយក នាយករង និងមន្ត្រីឧទ្យានុរក្សនៃតំបន់ការពារធម្មជាតិទាំង០៦ នៅក្នុងភូមិសាស្រ្តខេត្តកំពង់ធំ សរុបប្រមាណជិត១០០នាក់។
លោក តុប កក្កដា ប្រធានមន្ទីរបរិស្ថានខេត្តកំពង់ធំ មានមតិស្វាគមន៍លើកឡើងថា នៅក្នុងខេត្តកំពង់ធំ មានតំបន់ការពារធម្មជាតិចំនួន០៦កន្លែង ដែលមានវិសាលភាពធំទូលាយ តែមានមន្រ្តី ឧទ្យានុរក្ស តែ ចំនួន ៨៥នាក់ ការគ្រប់គ្រងតំបន់ការពារធម្មជាតិមានការចន្លោះប្រហោងច្រើន ដែលទាមទារអោយ មាន ការបង្កើនចំនួនមន្រ្តីឧទ្យានុរក្ស និងបង្កើនជំនាញ និងចំណេះដឹងរបស់ពួកគាត់ បន្ថែមពីលើអ្វី ដែល ពួកគាត់មាន។
ក្នុងឱកាសនោះដែរ លោក សុខ លូ បានថ្លែងអំណគុណដល់ លោក សាយ សំអាល់ រដ្ឋមន្ត្រីក្រសួង បរិស្ថាន ដែលកន្លងមកឯកឧត្តមរដ្ឋមន្ត្រី មានការយកចិត្តទុកដាក់ ចុះពិនិត្យទីតំាង ជាក់ស្តែងនៅ តាម តំបន់ការពារធម្មជាតិទាំង ០៦កន្លែងសម្រាប់ខេត្តកំពង់ធំ និងថ្លែងអំណរគុណ ដល់លោក អនុប្រធាន និងសហការី នៃនាយកដ្ឋានអធិការកិច្ច និងពង្រឹងការអនុវត្តច្បាប់ នៃអង្គនាយកដ្ឋានរដ្ឋបាលការពារ និងអភិរក្សធម្មជាតិ ដែលបានចំណាយកម្លាំងកាយ កម្លាំងចិត្ត និងពេលវេលា ដ៏មានតម្លៃក្នុង ការផ្តល់ ជំនាញចំណេះដឹងដ៏សំខាន់ ដើម្បីបង្កើនសមត្ថភាពនៃការពង្រឹងប្រសិទ្ធភាពនៃការអនុវត្តច្បាប់ និងការ កសាងសំណុំរឿងបទល្មើសធនធានធម្មជាតិ របស់មន្ត្រីបរិស្ថានខេត្តកំពង់ធំ ។
ឯកឧត្តមបានបញ្ចាក់ថា វគ្គបណ្តុះបណ្តាលនេះនឹងជួយសិក្ខាកាមទាំងអស់ ទទួលបាននូវចំណេះ ដឹងថ្មីៗ បន្ថែមទៀត ជាពិសេសពាក់ព័ន្ធនឹងកសាងសំណុំរឿងបទល្មើសធនធានធម្មជាតិ និងចូលរួមទប់ស្កាត់ បង្រ្កាបបទល្មើសធនធានធម្មជាតិ ប្រកបដោយប្រសិទ្ធភាព ដែលកំពុងកើតមាន គ្រប់ទីកន្លែងនៅ ក្នុង តំបន់ការពារធម្មជាតិ រួមទាំងនៅក្នុងសហគមន៍ផងដែរ។ លើសពីនេះទៀត លោក ណែនាំដល់ មន្រ្តី ទ្យានុរក្សទាំងអស់ ត្រូវគោរពនូវតួនាទី សិទ្ធិ និងកាតព្វកិច្ចរបស់ខ្លួនឲ្យបានត្រឹមត្រូវ ស្របទៅតាមច្បាប់ និងគោលការណ៍ណែនាំ របស់ក្រសួងបរិស្ថាន កុំអោយមានពាក្យបណ្តឹងពីប្រជាពលរដ្ឋ ថាអ្នកដែល កាន់ ច្បាប់គឺជាអ្នករំលោភច្បាប់ ។
ចុងក្រោយ ឯកឧត្តម បានផ្តាំផ្ញើដល់ លោកនាយក នាយករង និងមន្ត្រីទ្យានុរក្សទាំងអស់ សូមយកចិត្ត ទុកដាក់ស្តាប់ រៀនសូត្រ សាកសួរសំនួរដែលពាក់ព័ន្ធ នឹងភាពស្រពិចស្រពិល របស់ខ្លួនដែលមានពី មុនមក ដើម្បីបំបាត់ភាពចម្ងល់ និងយកទៅអនុវត្តភារកិច្ចរបស់ខ្លួនបានដោយជោគជ័យ៕
