អន្តរជាតិ ៖ កងយោធាសហរដ្ឋអាមេរិកបានធ្វើការហោះហើរយន្តហោះទម្លាក់គ្រាប់បែក B-52 នៅក្នុងតំបន់ជុំវិញសមុទ្រចិនខាងត្បូងនៅសប្តាហ៍នេះ ចំពេលភាពតានតឹងកាន់តែខ្លាំងឡើងរវាងប្រទេសទាំងពីរ។ នេះបើយោងតាមការចុះផ្សាយរបស់សារព័ត៌មាន Reuters។
លោកវរសេនីយ៍ឯក Dave Eastburn អ្នកនាំពាក្យសេតវិមានបាននិយាយថាយន្តហោះទម្លាក់គ្រាប់បែក B-52 បានឆ្លងកាត់សមុទ្រចិនខាងត្បូងជាផ្នែកមួយនៃប្រតិបត្ដិការឲ្យទៀងទាត់ ដើម្បីពង្រឹងអន្តរប្រតិបត្តិការរបស់យើងជាមួយដៃគូ និងសម្ព័ន្ធមិត្តនានាក្នុងតំបន់”។
ការហោះហើរបែបនេះគឺជារឿងធម្មតាប៉ុន្តែបានធ្វើឱ្យក្រុងប៉េកាំងខឹងយ៉ាងខ្លាំង។គួរម្លឹកថា កាលពី ខែមិថុនា ឆ្នាំ២០១៨ ក្រសួងការបរទេសចិនបាននិយាយថាគ្មាននាវាយោធាឬយន្តហោះអាចបំភ័យចិន ចេញពីការដោះស្រាយ ដើម្បីការពារទឹកដីរបស់ខ្លួននោះទេ។
សហរដ្ឋអាមេរិកបានទទួលរងការរិះគន់ជាញឹកញយអំពីការធ្វើសមយុទ្ធយោធានៅសមុទ្រចិនខាងត្បូង ខណៈដែលចិនតៃវ៉ាន់ វៀតណាម ម៉ាឡេស៊ី ព្រុយណេនិងហ្វីលីពីនសុទ្ធតែមានការអះអាងស្របគ្នា។
គួរបញ្ជាក់ថា ចិន និងអាមេរិកកំពុងប្រឈមភាពតានតឹងដាក់គ្នាកាន់តែខ្លាំងលើបញ្ហាសង្គ្រាមពាណិជ្ជកម្មដែលផ្ទុះកាន់តែធំឡើង និងបន្ដគំរាមដំឡើងពន្ធដាក់គ្នាបន្ថែមទៀត និងបញ្ហាតៃវ៉ាន់ ដែលអាមេរិកបានយល់ព្រមលក់អាវុធដែលមានទឹកប្រាក់ ៣៣០លានដុល្លារឲ្យតៃវ៉ាន់ បង្កឲ្យក្រុងប៉េកាំងខកចិត្ត និងប្រឆាំងយ៉ាងខ្លាំង៕
