ខេត្តស្ទឹងត្រែង ៖ តាមសេចក្តីរាយការណ៍ពីប្រជាពលរដ្ឋបានឲ្យដឹងថា លោក ម៉ឹក សុផាណារ៉េត ហៅឧកញ៉ាជ័យកូនដៃឧកញ៉ា គិត ម៉េង ថៅកែក្រុមហ៊ុនរ៉ូយ៉ាល់គ្រុប ដែលទទួលបានសិទ្ធវិនិយោគវារីអគ្គិសនីសេសានក្រោម២ បានចាប់ផ្តើមសកម្មភាពដឹកជញ្ជូនឈើប្រណិតចេញពីទីតាំងខាងលើទៅស្រុកយួនទៀតហើយ។
សកម្មភាពកាប់បំផ្លាញព្រៃឈើខាងក្រៅតំបន់បាតអាងនៃទំនប់វារីអគ្គិសនីសេសានក្រោមពីរ បានចាប់កក្រើកឡើងវិញយ៉ាងគ្រឹកគគ្រេងសារជាថ្មីទៀតហើយ បន្ទាប់ពីរាជរដ្ឋាភិបាលកម្ពុជាចេញសេចក្តីសម្រេចអនុញ្ញាតឲ្យក្រុមហ៊ុនវិនិយោគសម្បទានដីសេដ្ឋកិច្ច បន្តឈូសឆាយសំអាតទីតាំងវិនិយោគ ព្រមទាំងប្រមូលនិងដឹកជញ្ជូនផល អនុផលព្រៃឈើ ដែលបានមកពីការឈូសឆាយបាតអាង កាលពីថ្ងៃទី៣០ ខែសីហា កន្លងទៅថ្មីៗនេះ។
គួរបញ្ជាក់ដែរថា កាលពីថ្ងៃទី៣០ ខែសីហា ឆ្នាំ២០១៨ កន្លងទៅថ្មីៗនេះ ទីស្តីការគណៈរដ្ឋមន្ត្រី បានចេញលិខិតមួយច្បាប់លេខ៩៥២ សជណ កស ជម្រាបជូនរដ្ឋមន្ត្រីក្រសួងបរិស្ថាន ក្រសួងកសិកម្មរុក្ខាប្រមាញ់និងនេសាទ ក្រសួងរ៉ែនិងថាមពល ថារាជរដ្ឋាភិបាលបានយល់ព្រមអនុញ្ញាត ឲ្យក្រុមហ៊ុនគម្រោងវិនិយោគសម្បទានដីសេដ្ឋកិច្ច បន្តឈូសឆាយសំអាតទីតាំងវិនិយោគ ព្រមទាំងប្រមូល និងដឹកជញ្ជូនផល អនុផលព្រៃឈើ ដែលបានមកពីការឈូសឆាយ ដោយក្រុមហ៊ុនត្រូវអនុវត្តឲ្យបានត្រឹមត្រូវតាមគោលការណ៍ និងនីតិវិធីដែលបានកំណត់។
ប្រជាសហគមន៍ក្នុងទីតាំងភូមិដាឡាត ឃុំស្រែសឺម៉ី ស្រុកសេសាន្ត ខេត្តស្ទឹងត្រែង បានរាយការណ៍ឲ្យដឹងថា មានទូក ខ្នាតតូច ធំ កប៉ាល់អូសឈើជាច្រើនគ្រឿងក្នុងមួយថ្ងៃៗ ដឹកឈើចេញពីតំបន់ក្រៅបាតអាងចូលទៅក្នុងតំបន់បាតអាង បន្លែងទៅជាឈើស្របច្បាប់ រួចទើបដឹកចេញពីតំបន់បាតអាង ទៅកាន់បណ្តាខេត្តនានា ពិសេសទៅស្រុកយួនតាមច្រកវ៉ាលឺយ៉ាងរលូន ដោយគ្មានសមត្ថកិច្ចណាអើពើនិងហ៊ានបង្រ្កាបនោះឡើយ ។
ករណីនេះកន្ទេលធំបន្លំដេកនេះ ត្រូវបានប្រជាពលរដ្ឋដាក់ការសង្ស័យថា អ្នកឧកញ៉ា គិត ម៉េងម្ចាស់ក្រុមហ៊ុនរ៉ូយ៉ាល់គ្រុបគឺជាអ្នកបើកដៃនិងធ្វើជាឆត្រ័ឲ្យកូនដៃរបស់ខ្លួន បន្តឲ្យមានការកាប់បំផ្លាញព្រៃឈើពីក្រៅតំបន់បាតអាងបែបនេះ។
សហគមន៍ជនជាតិដើមភាគតិចនៅឃុំស្ដៅ ស្រុកសេសាន ខេត្តស្ទឹងត្រែង ក៏បានរាយការណ៍ឲ្យដឹងថា រយៈ ពេលកន្លងមកហើយ ពួកគាត់បានឃើញសកម្មភាពដឹកជញ្ជូនឈើតាមទូកតាមទឹក និងបន្តដឹកតាមរថយន្តបាកុង ចូលក្នុងទីតាំងរោងម៉ាស៊ីនអារឈើក្បែរទំនប់វារីអគ្គិសនីដែលបានចាប់ផ្តើមដំណើរការគគ្រឹកគគ្រេងឡើងវិញ ហើយ ថាឈើទាំងនោះគេកាប់ចេញពីព្រៃឧទ្យានជាតិវីរៈជ័យ ដែលស្ថិតនៅជាប់ព្រំដែនឡាវក្នុងស្រុកសៀមប៉ាង ខេត្តស្ទឹងត្រែង។
ប្រភពពីមន្ត្រីអង្គការសង្គមស៊ីវិលដែលឃ្លាំមើលបទល្មើសបំផ្លាញព្រៃឈើក្នុងខេត្តស្ទឹងត្រែង បានឲ្យដឹងថា នៅក្នុងផ្ទៃអាងទំនប់វារីអគ្គិសនីសេសានក្រោម២ ទំហុំ៣៦០០០ហិកតា គ្មាននៅសល់ឈើប្រណីតឬឈើប្រភេទលេខ១សម្រាប់កាប់ធ្វើអាជីវកម្មទៀតឡើយ។ ដូច្នេះឈើដែលលោកឧកញ៉ា ជ័យ ដឹកជញ្ជូនចេញគឺជាឈើនៅខាងក្រៅផ្ទៃអាងទំនប់វារីអគ្គិសនី ។
ផ្ទៃអាងទំនប់វារីអគ្គិសនីសេសានក្រោមពីរ មានទំហុំ ៣៦.០០០ ហិកតា ឋិតក្នុងស្រុកសេសាន ខេត្តស្ទឹងត្រែង ដែលមានក្រុមហ៊ុនឈ្មោះ អាំង អែន អាសូស៊ីអែត ឡយ័រ ( Ang & Associates Lawyer Co ., Ltd ) របស់ឧកញ៉ា គិត ម៉េង ទទួលសិទ្ធិសម្អាតបាតអាងតាំងពីឆ្នាំ២០១២។ ក៏ប៉ុន្តែពលរដ្ឋនិងមន្ត្រីសង្គមស៊ីវិលរកឃើញថា ក្រុមហ៊ុនបានដឹកឈើពីខាងក្រៅចូលផ្ទៃអាងជាលេសថា សំអាតបាតអាងនិងដើម្បីបម្លែងជាឈើស្របច្បាប់ កើតមានច្រើនឆ្នាំណាស់មកហើយ ដោយឃុបឃិតជាមួយអាជ្ញាធរពាក់ព័ន្ធនៅខេត្តស្ទឹងត្រែង រហូតដល់ថ្នាក់ជាតិ។ សកម្មជនបរិស្ថានរកឃើញថា ក្រុមហ៊ុននេះបានដឹកឈើមូលធំៗ ចេញពីតំបន់ឧទ្យានជាតិវីរៈជ័យ នៅស្រុកសៀមប៉ាង ខេត្តស្ទឹងត្រែង និងស្រុកវើនសៃ ខេត្តរតនគិរី ជាប់ព្រំដែនឡាវ ចូលក្នុងបាតអាង ដើម្បីបម្លែងជាឈើស្របច្បាប់ រួចដឹកទៅលក់នៅព្រំដែនប្រទេសវៀតណាម។
យើងពុំអាចសុំការបំភ្លឺណាមួយពីអ្នកឧកញ៉ា គិត ម៉េង និងលោកឧកញ៉ា ជ័យ បានទេ តែព្យាយាមសុំការពន្យល់និងស្វាគមន៏ចុះផ្សាយរាល់ការបំភ្លឺពីគ្រប់ភាគីពាក់ពន្ធ័៕
