រាជធានីភ្នំពេញ ៖ ក្នុងឱកាសជួបសំណេះសំណាល និងនាំយកអំណោយ១ចំនួនរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ទៅផ្តល់ជូនប្រជាពលរដ្ឋ រងគ្រោះដោយទឹកភ្លៀងធ្លាក់ជោកជាំ បណ្តាលឲ្យលិចផ្លូវទឹកចូលផ្ទះចំនួន៧២១គ្រួសារ ក្នុងសង្កាត់គោករការ ខណ្ឌព្រែកព្នៅ នាព្រឹកថ្ងៃទី១៥ ខែកញ្ញា ឆ្នាំ២០១៨ លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានក្រុមការងារគណបក្សប្រជាជនកម្ពុជា រាជធានីភ្នំពេញ ចុះជួយខណ្ឌព្រែកព្នៅ បានបង្ហាញពីការខិតខំយកចិត្តទុកដាក់របស់អាជ្ញាធរសង្កាត់ ខណ្ឌ និងរាជធានីភ្នំពេញ ក៏ដូចមន្ទីរជំនាញ ដើម្បីបើកមុខទឹករំដោះជំនន់ទឹកភ្លៀងនេះចេញពីភូមិដ្ឋានរបស់ប្រជាពលរដ្ឋ។
តាមសេចក្តីរាយការណ៍ពីលោក សុខ សម្បត្តិ អភិបាលខណ្ឌព្រែកព្នៅ បានឲ្យដឹងដែរថា ពេលនេះក្នុងខណ្ឌព្រែកព្នៅ មានសង្កាត់ចំនួន២ ដែលរងគ្រោះដោយទឹកភ្លៀងលិចភូមិ គឺសង្កាត់សំរោង មាន២៨គ្រួសារ សង្កាត់គោករកា ដែលលិចខ្លាំងមានរហូតដល់៧២១គ្រួសារ ក្នុងនោះក៏មានភូមិអណ្តូង៤ និងអណ្តូង៦ផងដែរ។
លោក ឃួង ស្រេង បានសំដែងការសោកស្តាយនិងសុំការយោគយល់ពីបងប្អូនប្រជាពលរដ្ឋ ដែលរងគ្រោះដោយសារជំនន់ទឹកភ្លៀង ក្នុងរយៈពេលប៉ុន្មានថ្ងៃមកនេះ ដែលក្នុងភូមិសាស្ត្ររាជធានីភ្នំពេញ ទទួលរងបរិមាណទឹកភ្លៀងរហូតដល់៩៣,៦៤mm ដែលជាបរិមាណ១ដ៏សំបើម នៅពេលរាជធានីភ្នំពេញអាចធានាបានតែប្រមាណ៤០mm តែប៉ុណ្ណោះ។
លោកថា ប៉ុន្តែការងារនេះនៅតែមិនទាន់បានឆ្លើយតបបានទាន់ពេលវេលានៅឡើយ ដោយសារតែទឹកហូរធ្លាក់មកពីប៉ែកខាងកំពង់ស្ពឺយ៉ាងគំហុក ចាក់មកភូមិសាស្ត្ររាជធានីភ្នំពេញ។ តែទោះបីយ៉ាងណា អាជ្ញាធរមិនបានព្រងើយកន្តើយក្នុងការចាត់វិធានការដោះស្រាយសំរាប់ប្រជាពលរដ្ឋយើងឡើយ ជាពិសេសការគិតគូរខ្ពស់ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ចំពោះសុខទុក្ខ ប្រជាពលរដ្ឋដែលរងគ្រោះនៅគ្រប់ទីកន្លែង។
ចំពោះអំណោយដែលត្រូវផ្តល់ជូនប្រជាពលរដ្ឋរងគ្រោះទាំង៧២១គ្រួសារ ក្នុង១គ្រួសារទទួលបានអង្ករ២៥គីឡូក្រាម មី១កេស ទឹកសុទ្ធ១កេស ទឹកត្រី៦ដប និងថវិកា៥ម៉ឺនរៀល៕
