រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងនាយករដ្ឋមន្ត្រីឡាវ លោក ថងលូង ស៊ីសូលីត បានឯកភាពគ្នា ដាក់តំបន់អូរតាង៉ាវ ជាតំបន់គ្មានកងទ័ព តំបន់គ្មានប្រជាជនរស់នៅ និងធ្វើអាជីវកម្ម និងបង្កើតឲ្យមានការល្បាតរួមគ្នារវាងកងទ័ពនៃប្រទេសទាំងពីរនៅតំបន់នោះផងដែរ។
ការឯកភាពរវាងប្រមុខរដ្ឋាភិបាលទាំងពីរបានធ្វើឡើងនៅក្រុងហាណូយ ប្រទេសវៀតណាម កាលពីថ្ងៃទី១៣ ខែកញ្ញា ២០១៨ ក្នុងជំនួបពិភាក្សាអំឡុងពេលមេដឹកនាំទាំងពីរចូលរួមវេទិកាសេដ្ឋកិច្ចពិភពលោកស្ដីពីអាស៊ាន។
សម្ដេចតេជោ ហ៊ុន សែន បញ្ជាក់ថា សរុបមកតំបន់អូរតាង៉ាវដែលតភ្ជាប់ពីអូរអាឡៃ ទៅដល់ព្រំដែន គឺជាតំបន់ដែលមិនទាន់ដោះស្រាយហើយ ដែលភ្ជាប់ដោយលក្ខខណ្ឌបីយ៉ាងដែលបានបញ្ជាក់ខាងលើ។ សម្ដេចបញ្ជាក់ទៀតថា “កិច្ចការបន្ទាន់នៅពេលនេះរបស់យើងគឺថា កងទ័ពនៃប្រទេសទាំងពីរ ថ្នាក់ភូមិភាគ ថ្នាក់កងពល និងថ្នាក់ខេត្ត អាចទាក់ទងគ្នាភ្លាម ដើម្បីបង្កើតស្ថានភាពល្បាតរួមគ្នា។ ការល្បាតរួមរបស់យើងគឺចាំបាច់ត្រូវតែធ្វើព្រោះយើងមិនចង់ឲ្យតំបន់ដែលមិនទាន់បានដោះស្រាយដាច់ស្រេចនេះ ក្លាយជាជម្រករបស់ពួកចោរព្រៃ ពួករត់ពន្ធគ្រឿងញៀន និងពួកកាប់បំផ្លាញព្រៃឈើ។
សម្តេចបន្តថា មិនមែនមានន័យថា កម្ពុជា មិនទុកចិត្តឡាវ ឬ ឡាវមិនទុកចិត្តកម្ពុជានោះទេ ប៉ុន្តែយើងមិនទុកចិត្តពួកចោរព្រៃដែលជាបាតដៃទី៣”។
សូមជម្រាបថា មេបញ្ជាការកងយោធភូមិភាគទី១ខេត្តស្ទឹងត្រែង បានបញ្ជាក់ថា កងទ័ពកម្ពុជាត្រូវបានដកចេញពីតំបន់អូរតាង៉ាវអស់ហើយតាំងពីម៉ោង១២ថ្ងៃត្រង់ ថ្ងៃទី១៤ ខែកញ្ញានេះ តាមបញ្ជាសម្តេចតេជោ ហ៊ុន សែន ។ មេបញ្ជាការកងយោធភូមិភាគទី១ខេត្តស្ទឹងត្រែងឱ្យដឹងថា ថ្ងៃកំណត់ដកទ័ពកម្ពុជា គឺត្រូវដកឱ្យអស់ត្រឹមម៉ោង៥ល្ងាច ថ្ងៃទី១៤ ខែកញ្ញា នេះ៕
