កោះកុង ៖ ប្រជាពលរដ្ឋនៅភូមិចំការក្រោម ឃុំស្រែអំបិល ស្រុកស្រែអំបិល ខេត្តកោះកុង បានឲ្យដឹងថា លោក សន សី ជាអនុប្រធានបរិស្ថានស្រុកស្រែអំបិល ខេត្តកោះកុង បានអនុញ្ញាត្តិឲ្យកាប់បំផ្លាញព្រៃកោងកាងដើម្បីឲ្យឈ្មួញយកទីកន្លែងដាក់ដីខ្សាច់។
ប្រជាពលរដ្ឋបានចោទប្រកាន់លោក សន សី ជាអនុប្រធានបរិស្ថានស្រុកស្រែអំបិលថា បានជួលប្រជាពលរដ្ឋ៤នាក់ឲ្យទៅកាប់ព្រៃកោងកាង និងព្រៃលិចទឹក នៅចំណុចកោះឡាយសំបូ ទល់មុខព្រែកព្រាំង ជាដីកោះ ក្នុងព្រែក ស្រែអំបិល ស្ថិតនៅក្នុងភូមិចំការក្រោម ឃុំស្រែអំបិល ស្រុកស្រែអំបិល ខេត្តកោះកុង។
តាមសម្ដីប្រជាពលរដ្ឋ ដែលបានស៊ីឈ្នួលកាប់ព្រៃកោងកាងនៅលើដីកោះនេះបាននិយាយថា គេជួលពួកគាត់កាប់ ព្រៃក្នុង១ហិកតាបានតំលៃ២០០ដុល្លា។ ពួកគាត់បន្តថា ការកាប់ព្រៃនេះឈ្មោះណុចជាមេការបូមខ្សាច់ជាអ្នក ធានារូបគាត់ឲ្យកាប់ព្រៃនេះ ហើយធានាខាងបរិស្ថានទៀត ទើបគាត់ហ៊ានមកកាប់ព្រៃនេះ។ ពលរដ្ឋដែលកាប់ព្រៃនេះក្នុងចំណោម៤នាក់ គាត់បាននិយាយថា លោក សន សី ជាមន្ត្រីបរិស្ថានឲ្យគាត់កាប់ ទើគាត់ហ៊ានមកកាប់ព្រៃនេះ។
តាមសម្ដីលោក ហែម ហ៊ុន មេភូមិចំការក្រោម បាននិយាយ អះអាងថា លោក សន សី ជាមន្ត្រីបរិស្ថានបានតេទូរសព្ទ័ ទៅប្រាប់គាត់ថា ដីព្រៃនេះគាត់(សនសី)ជាអ្នកឲ្យកាប់ដីព្រៃទាំងអស់នេះទុកដាក់ខ្សាច់ទេ នេះជាពាក្យសម្ដីរបស់លោក សន សី បា្រប់លោកមេភូមិចំការក្រោម។
លោក ហែម ហ៊ុន បានអះអាងបន្តថា គាត់មិនអស់ចិត្ត ក៍នាំសមាជិកភូមិនិងប្រជាពលរដ្ឋនៅក្នុងភូមិ ទៅសួរដល់កន្លែង ដែលគេកាប់ព្រៃនេះ ពេលទៅដល់ពួកតាត់សួរអ្នកកាប់ព្រៃទាំងអស់នោះបានប្រាប់គាត់ថា លោក សន សី ជាអ្នកឲ្យកាប់ ហើយធានាពួកគាត់ទៀតពីរឿងកាប់ព្រៃនេះ។
លោកមេភូមិ ហែម ហ៊ុន បានរាយការណ៍ប្រាប់លោកមេឃុំស្រែអំបិលឲ្យបានដឹងពីរឿងនេះដែរ តែស្ងាត់ឈឹង មិនឃើញមានចំណាត់ការអ្វីទេក្នុងរឿងកាប់បំផ្លាញព្រៃកោងកាងនេះ គេនៅតែកាប់ដដែល។
ពាក់ពន្ធ័ក្នុងរឿងកាប់ព្រៃកោងកាង និងព្រៃលិចទឹកនេះ អ្នកសារព័ត៍មានបានទូរសព្វ័មកលោក សន សី អនុប្រធានបរិស្ថានស្រុកស្រែអំបិលសុំការបំភ្លឺ ពេលលោក សន សី លើកទូរសព្វ័លឺឈ្មោះអ្នកសារព័ត៍មាន លោក សន សី បានបឹតទូរសព្វ័បាត់មិនអាចទំនាក់ទំនងបានទេ។
អ្នកសារព័ត៍មានបានទូរសព្វ័ទៅលោក ម៉េង តិច ប្រធានបរិស្ថានស្រុកស្រែអំបិល សុំការបំភ្លឺរឿងកាប់ព្រៃកោងកាងនេះ លោក ម៉េង តិច ឆ្លើយថា អាហ្អែងតេមកអញ់ធ្វើអី បើអាហ្អែងដឹងគេកាប់ព្រៃ ម៉ិចមិនទៅចាប់គេទៅ ហើយបឹតទូរសព្ទ័បាត់។
ចំណែកលោក កែវ សុខ មេឃុំស្រែអំបឹល បានប្រាប់តាមទូរសព្ទ័ថា គាត់បានដឹងហើយ តាមរយ: មេភូមិរាយការណ៍មក ចាំគាត់ចុះទៅមើល។ លោកមេឃុំបន្តថា ពេលដឹងហើយ គាត់ប្រាប់ទៅបរិស្ថានហើយ ហើយគាត់ក៏បានរាយការណ៍ទៅលោកអភិបាលស្រុកដែររឿងនេះ។
ពាក់ពន្ទ័ក្នុងរឿងកាប់ព្រៃនេះ អ្នកសារព័ត៍មានបានសុំការភ្លឺពីលោក ទួន សីលា អភិបាលស្រុកស្រែអំបិល លោកនិយាយថា លោកនិងចាត់វិធានការចំពោះផ្លូវច្បាប់លើអ្នកដែលកាប់ព្រៃនេះ។ លោកបន្តថា លោកនិង ប្រាប់ទៅមេឃុំឲ្យចុះត្រួតពិនិត្យឲ្យបានច្បាស់តើអ្នកណានៅពីក្រោយខ្នងរឿងកាប់ព្រៃនេះ។
លោកអភិបាលស្រុកស្រែអំបិល បាននិយាយបន្តទៀតថា កន្លងមកលោកបានប្រជុំនិយាយ សង្កត់ធ្ងន់ពីរឿងការកាប់ទន្ទ្រានព្រៃកោងកាង និងព្រៃលិចទឹក ដីភ្នំ មិនឲ្យកើតមានឡើងទេ មន្រ្តីទាំងអស់ត្រូវជួយទប់ស្កាត់ទាំងអស់គ្នា។ លោកអភិបាលស្រុកក៏បាននិយាយទៅខាងមន្រ្តីបរិស្ថានគឺលោក ម៉េង តិច ជាប្រធានបរិស្ថានស្រុកស្រែអំបិល ឲ្យចេះសហការគ្នាក្នុងមូលដ្ឋាន ក៍ប៉ុន្តែខាងមន្រ្តីបរិស្ថាន មិនសូវយកចិត្តទុកដាក់ទេពីការងារដែលពាក់ពន្ធ័និងបរិស្ថាននេះ។ លោកអភិបាលស្រុកបន្តថា នៅក្នុងស្រុកគាត់ជួបការលំបាកដែរ ជួនកាលប្រាប់គេ គេមិនស្ដាប់ផង។
ប្រជាពលរដ្ឋរិះគន់ថាការឃុបឃិតគ្នារវាងមន្រ្តីបរិស្ថាននិងអ្នកមានលុយអ្នកមានអំណាច កាប់ទន្ទ្រានយកដីព្រៃកោងកាង និងដីព្រៃលិចទឹកនៅគ្រប់ទីកន្លែង នៅក្នុងស្រុកស្រែអំបិលនិងស្រុកបូទុមសាគរ ដោយសារមន្រ្តីបរិស្ថាន ដែលបើកភ្លើងខៀវពីលោក ម៉េង តិច ដែលកាន់កាប់តំបន់ហៅថា តំបន់ប្រើប្រាស់ច្រើនយ៉ាងដងពែង។
សូមលោកជំទាវ មិថុនា ភូថង អភិបាលខេត្តកោះកុង ជួយទប់ស្កាត់ការកាប់ទន្ទ្រានយកដីព្រៃកោងកាង និង ដីព្រៃលិចទឹកនៅតំបន់ខាងលើនេះផង ហើយត្រូវតែហ៊ានវះកាត់សាច់ស្អុយចេញចំពោះមន្រ្តីបរិស្ថាន មួយចំនួនតូចដែលប្រព្រឹត្តអំពើពុករលួយយកតួនាទីទៅកាងកាប់បំផ្លាញព្រៃកោងកាងទៅវិញ។
ប្រជាពលរដ្ឋក៏បានសំណូមពរ សូមឲ្យឯកឧត្តម សាយ សំអាល រដ្ឋមន្រ្តីក្រសួងបរិស្ថានបញ្ជូនមន្ត្រីក្រសួងចុះត្រួតពិនិត្យនិងទប់ស្កាត់ការកាប់បំផ្លាញព្រៃកោងកាង នៅព្រែកស្រែអំបិលដែលធ្វើឲ្យប៉ះពាល់ដល់បរិស្ថាននិងដីព្រៃរបស់រដ្ឋ។
កន្លងមក សម្ដេចតេជោ ហ៊ុន សែន មានប្រសាសន៍ថា មន្រ្តីដែលមិនបំរើការងារ និងមន្រ្តីពុករលួយ ត្រូវតែវះកាត់ចេញជា បន្ទាន់មិនអាចទុកបានទេមន្រ្តីរបៀបនេះ៕ ដោយ យួន ឈីវ
