ខេត្តក្រចេះ ៖ ប្រភពពត័មានពីខេត្តក្រចេះបានឲ្យដឹងថា កាលពីយប់ថ្ងៃទី៣១ ខែសីហា ឆ្នាំ២០១៨ ឈ្មួញឈ្មោះ ចែមុំ បានដឹកឈើតាមរថយន្តសាំយ៉ុងចំនួន១៥គ្រឿង ចេញពីស្រុកចិត្របុរី និងចេញពីតំបន់អូរគ្រៀង ខេត្តក្រចេះ ចេញទៅស្រុកយួនតាមច្រកព្រំដែនក្នុងស្រុកស្នួល ខេត្តក្រចេះ និងស្រុកមេមត់ ខេត្តត្បូងឃ្មុំ។ ឈើចំនួន៩រថយន្តសាំយ៉ុងជាប្រភេទឈើសុក្រំ ដឹកចេញទៅស្រុកយួន តាមច្រកក្បែរបន្ទាយយោធាវរការពារព្រំដែនលេខ២០៤ និងជាកន្លែងការដ្ឋានចិញ្ចឹមគោរបស់លោកឧកញ៉ា គង់ ក្រឹង ដែលជាឧត្តមសេនីយ៍យោធា និងជាឧកញ៉ាល្បីល្បាញខាងដឹកជញ្ជូនឈើចេញទៅស្រុកយួនដុះស្លែយូរឆ្នាំមកហើយ។ ចំណែកឈើសុក្រំចំនួន៦រថយន្តទៀតត្រូវឈ្មួញឈ្មោះ ចែមុំ ដឹកជញ្ជូនចេញទៅស្រុកយួនតាមច្រកព្រំដែនជាច្រើនកន្លែងក្នុងស្រុកមេមត់ ខេត្តត្បូងឃ្មុំ ដោយសារមានការឃុបឃិតបើកដៃពីសំណាក់មន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធជាច្រើនស្ថាប័ន។
បើតាមប្រភពដែលស្និទ្ធនឹងឈ្មួញឈ្មោះ ចែមុំ បានឲ្យដឹងថា ការដែលចែមុំអាចបន្តសកម្មភាពដឹកជញ្ជូនឈើចេញទៅស្រុកយួនយ៉ាងគគ្រឹកគគ្រេងដូចព្យុះ គឺដោយសារមានការឃុបឃិតបើកដៃពីសំណាក់មន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធក្នុងខេត្តក្រចេះ ក៏ដូចជាមន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធក្នុងខេត្តត្បូងឃ្មុំ។ ក្នុងនោះលោក ទ្រី សុភ័ក្ត្រ នាយខណ្ឌរដ្ឋបាលព្រៃឈើខេត្តក្រចេះ ត្រូវបានគេរិះគន់ថាជាខ្នងបង្អែកយ៉ាងរឹងមាំរបស់ឈ្មួញឈ្មោះ ចែមុំ ហើយបណ្ដោយឲ្យឈ្មួញរូបនេះធ្វើអ្វីៗតាមតែអំពើចិត្ត។ ប្រសិនបើគ្មានការឃុបឃិតបើកដៃពីសំណាក់លោក ទ្រី សុភ័ក្ត្រ មេរដ្ឋបាលព្រៃឈើខេត្តក្រចេះ ព្រមទាំងមន្ត្រីក្រោមឱវាទនៅក្នុងស្រុកចិត្របុរី ក្រុងក្រចេះ និងស្រុកស្នួល ទេនោះ គឺឈ្មួញរកស៊ីឈ់ខុសច្បាប់ឈ្មោះ ចែមុំ មិនអាចបន្តសកម្មភាពដឹកជញ្ជូនឈើចេញទៅស្រុកយួនយ៉ាងរលូនដូចសព្វថ្ងៃនេះទេ។
ប្រភពបានឲ្យដឹងទៀតថា នៅមុនពេលបោះឆ្នោតជ្រើសតាំងតំណាងរាស្ត្រអាណតិ្តទី៦ ឈ្មួញឈ្មោះ ចែមុំ បានផ្អាកសកម្មភាពដឹកជញ្ជូនឈើចេញទៅស្រុកយួនមួយរយៈ ហើយប៉ុន្មានថ្ងៃចុងក្រោយនេះឈ្មួញឈ្មោះ ចែមុំ បានធ្វើសកម្មភាពដឹកជញ្ជូនឈើចេញទៅស្រុកយួនយ៉ាងពេញបន្ទុកឡើងវិញ ដោយមានការសម្របសម្រួលពីមន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធផងដែរ។ ច្រករបៀងក្នុងឃុំ២ធ្នូ ស្រុកស្នួល ខេត្តក្រចេះ ដែលគ្រប់គ្រងដោយអង្គភាពយោធាវរការពារព្រំដែនលេខ២០៤ គឺជាគោលដៅដែលឈ្មួញឈ្មោះ ចែមុំ ដឹកជញ្ជូនឈើចេញទៅស្រុកយួនដោយគ្មានឧបសគ្គ។ រីឯច្រកព្រំដែនជាច្រើនកន្លែងក្នុងស្រុកមេមត់ ខេត្តត្បូងឃ្មុំ ក៏ជាកូនចៅដែលឈ្មួញឈ្មោះ ចែមុំ អាចដឹកជញ្ជូនឈើចេញទៅស្រុកយួនយ៉ាងរលូនផងដែរ ព្រោះមន្ត្រីរដ្ឋបាលព្រៃឈើក្នុងខេត្តត្បូងឃ្មុំ និងសមត្ថកិច្ចតាមច្រកព្រំដែនក្នុងស្រុកមេមត់ ខេត្តត្បូងឃ្មុំ បានចាត់ទុកឈ្មួញឈ្មោះ ចែមុំ គឺជាប្រភពចំណូលដ៏សំខាន់របស់ពួកគេជាយូរមកហើយ។
យើងពុំអាចសុំការពន្យល់បានឡើយ ព្រោះពុំមានលេខទូរសព្ទ័ តែស្វាគមន៏រាល់ការបំភ្លឺពីភាគីពាក់ពន្ធ័ជានិច្ច៕
