ខេត្តព្រៃវែង ៖ ក្រោយការបោះឆ្នោតត្រូវបានបញ្ចប់ដោយជោគជ័យ ហើយគណបក្សប្រជាជនកម្ពុជាទទួលបានជ័យជម្នះយ៉ាងភ្លូកទឹកភ្លូកដីនោះ មន្ដ្រីជានខ្ពស់គណបក្សប្រជាជនកម្ពុជា ចុះជួយឃុំរំលេច ស្រុកស៊ីធរកណ្តាល ខេត្តព្រៃវែង បានធ្វើការថ្លែងអំណរគុណដល់ពលរដ្ឋម្ចាស់ឆ្នោត និងក្ដាប់យកបញ្ហាប្រឈមនានាទៅដោះស្រាយជូនភ្លាមៗ។
ជាក់ស្ដែង ឯកឧត្តមបណ្ឌិត ញឹម វណ្ណដា ទេសរដ្ឋមន្រ្តីទទួលបន្ទុកអនុប្រធានគណកម្មាធិការជាតិគ្រប់គ្រងគ្រោះមហន្តរាយ និងជាអនុប្រធានក្រុមការងារចុះជួយមូលដ្ឋានខេត្តព្រៃវែង ព្រមទាំងក្រុមការងារ នៅថ្ងៃទី២៦ ខែសីហា ឆ្នាំ២០១៨ បានអញ្ជើញចូលរួមអបអរសាទរ និងថ្លែងអំណរគុណ ជូនចំពោះសមាជិកក្រុមការងារ និងប្រជាពលរដ្ឋក្នុងឃុំរំលេច ស្រុកស៊ីធរកណ្តាល ដែលបានខិតខំប្រឹងប្រែង និងលះបង់គ្រប់បែបយ៉ាងទាំងមុនពេល និងអំឡុងពេលយុទ្ធនាការឃោសនាបោះឆ្នោត ធ្វើឲ្យសម្រេចទទួលបានលទ្ធផលជោគជ័យល្អប្រសើរ។ ក្នុងពិធីនោះមានវត្តមានឯកឧត្តម ស្បោង សារ៉ាត់ ប្រធានក្រុមប្រឹក្សាខេត្តព្រៃវែងចូលរួមផងដែរ។
ឧត្តមបណ្ឌិត ញឹម វណ្ណដា បានពាំនាំនូវការថ្លែងអំណរគុណរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ជូនចំពោះប្រជាពលរដ្ឋទាំងអស់ ដែលបានបោះឆ្នោតគាំទ្រគណបក្សប្រជាជន លើសពីនេះ សម្តេចសូមជូនពរប្រជាពលរដ្ឋឲ្យជួបតែសេចក្តីសុខនិងសំណាងល្អគ្រប់ៗគ្នា។
ជាមួយគ្នានេះឯកឧត្តម បានសំណូមពរដល់ប្រជាពលរដ្ឋ ត្រូវរួមគ្នាថែររក្សាសុខសន្តិភាព និងការអភិវឌ្ឍ រួមគ្នាថែររក្សានូវសមិទ្ធផលនានារបស់រាជរដ្ឋាភិបាលដែលបានផ្តល់ជូនឲ្យបានគង់វង្សសម្រាប់ទុកបន្តដល់កូនចៅជំនាន់ក្រោយៗទៀត ដោយឡែកមន្រ្តីរាជការ ត្រូវតែប្រព្រឹត្តអំពើល្អ និងបម្រើសេវាសាធារណៈ ឲ្យបានល្អប្រសើរជូនប្រជាពលរដ្ឋនៅក្នុងមូលដ្ឋានរួមគ្នា ការពារសន្តិសុខ សណ្តាប់ធ្នាប់សាធារណៈ ។
ឯកឧត្តមបណ្ឌិត ញឹម វណ្ណដា បានប្រគេនម៉ាស៊ីនភ្លើងមួយគ្រឿងជូនដល់វត្តចារ និងជួយដោះស្រាយរាល់សំណូមពររបស់ប្រជាពលរដ្ឋមូលដ្ឋាន។
ពិធីអបអរសាទរ នៃជ័យជំនះទទួលបានលទ្ធផលយ៉ាងត្រចះត្រចង់ និងរីករាយស្វាគមន៍យ៉ាងកក់ក្តៅក្នុងការចូលរួមទទួលទានបាយសាមគ្គី ក្រោមទិសស្លោក ប្រទេសជាតិមានការរីកចម្រើន និងការអភិវឌ្ឍន៍ដែលការចូលរួមពីសំណាក់លោកតា ងិន ព្រះគ្រូចៅអធិការវត្តចារ លោកតា លោកយាយ និងប្រជាពលរដ្ឋយ៉ាងច្រើនកុះករ ព្រមទាំងមានតន្ត្រីលេងកំដរទឿតផង ៕
