ខេត្តបាត់ដំបង ៖ កាលពីចុងសប្តាហ៍មុននេះ អាជ្ញាធរថៃបានចាប់បុរសជាជនជាតិខ្មែរ២នាក់ បញ្ជូនមកឲ្យអាជ្ញាធរខ្មែរនៅខេត្តបាត់ដំបង ដែលជាប់សង្ស័យថាបានបាញ់សម្លាប់មនុស្សកាលពីដើមខែ ហើយគេចចេញពីស្រុកខ្មែរទៅលាក់ខ្លួននៅប្រទេសថៃ។ ជនសង្ស័យត្រូវបាននគរបាលស្រុកសំពៅលូន និងសមត្ថកិច្ចថៃទើបចាប់ខ្លួនបាននៅក្នុងទឹកដីថៃ កាលពីថ្ងៃទី១៨ ខែសីហា ឆ្នាំ២០១៨។
មន្ត្រីនគបាលខេត្តបាត់ដំបងឲ្យដឹងថា៖ ករណីឃាតកម្មនេះបានផ្តើមចេញពីរឿងស្នេហាត្រីកោណ។ជនរងគ្រោះឈ្មោះ ពេជ្រ ភិសា ភេទប្រុស អាយុ២៥ឆ្នាំ មុខរបរបើកឡានដឹកទឹកកក រីឯជនសង្ស័យគឺជានិស្សិតពេទ្យឈ្មោះ៖ទី១-ប៊ុន ពន្លក ភេទប្រុស អាយុ២២ឆ្នាំ ជាជនដៃដល់ និងទី២-ឈ្មោះ ហួន វាសនា ភេទប្រុស អាយុ២៣ឆ្នាំ ជាអ្នករួមគំនិត អ្នកទាំងពីរមានស្រុកកំណើតនៅខេត្តព្រៃវែង។
សូមបញ្ជាក់ដែរថា ពេលកើតហេតុសមត្ថកិច្ចបានឲ្យដឹងថា ជនដៃដល់មានបក្សពួក២នាក់ ជិះរថយន្តម៉ាកហាយឡិនឌ័រ ធ្វើដំណើរស្របទិសគ្នាពីបាត់ដំបងទៅកាន់កំពីងពួយ ហើយបានបើករថយន្តដេញតាមរថយន្តជនរងគ្រោះ ពេលទាន់បានមកឈប់ពាំងពីមុខ។ ពេលនោះ ជនមិនស្គាល់មុខ២នាក់បានចុះពីរថយន្តសួរនាំជនរងគ្រោះថា «ហេតុអ្វីបានបើករថយន្តប៉ះរថយន្តអញហើយមិនឈប់?»។
បើតាមអ្នករួមដំណើជាមួយប្រាប់ថា អ្នកបើករថយន្តដឹកទឹកកកឆ្លើយតបថា «ខ្លួនមិនបានដឹងទេ…»។ ភ្លាមនោះ ជនម្នាក់បានដកកាំភ្លើងខ្លីបាញ់១គ្រាប់ចំក្បាល រួចខ្មាន់កាំភ្លើងទាំង២នាក់ឡើងរថយន្តបើកត្រឡប់មកក្រោយវិញបាត់ស្រមោលទាំងយប់ភ្លាមៗដែរ។ ជនរងគ្រោះត្រូវបានបញ្ជូនទៅកាន់មន្ទីរពេទ្យភ្លាមៗដែរតែមិនអាចសង្គ្រោះបាន ។
សមត្ថកិច្ចបានរកឃើញគ្រាប់កាំភ្លើងខ្លី២គ្រាប់នៅកន្លែងកើតហេតុ ដែលមិនទាន់បាញ់និងសំបកគ្រាប់១គ្រាប់ ជាគ្រាប់កាំភ្លើងខ្លីម៉ាក «ប៉េអាម៉ាប់»។ គេបានបង្ហើបថា ព្រោះសមត្ថកិច្ចហាក់មានតម្រុយខ្លះៗហើយថាអ្នកណា?។
ជនរងគ្រោះឈ្មោះ ពេជ្រ ភីសា ភេទប្រុស អាយុ ២៥ ឆ្នាំ ។
លោក ជេត វណ្ណនី ស្នងការខេត្តបានបញ្ជាក់ថា ជនសង្ស័យកំពុងស្ថិតនៅក្នុងការសាកសួរនៅឡើយ ដោយសាររឿងឃាតកម្មនេះផ្តើមចេញពីរឿងស្នេហាត្រីកោណ ។ លោកថា ពួកគេបានបាញ់សម្លាប់ជនរងគ្រោះហើយគេចខ្លួនទៅខេត្តចាន់បូរីនៃប្រទេសថៃ ហើយយើងបានទំនាក់ទំនងឲ្យគេបញ្ជូនមកឲ្យយើងវិញនៅម៉ោង ៧យប់ ថ្ងៃទី១៨ សីហាកន្លងទៅនេះ ៕
