បាត់ដំបង ៖ បុរសម្នាក់ស្រវឹងស្រឿងៗតភ្លើងដើម្បីផឹកស៊ីបន្ត ពេលភ្លៀងឆ្លងចរន្តឆក់អគ្គិសនីស្លាប់ កាលពីវេលាម៉ោង ១៨ និង៤៥នាទី ថ្ងៃទី៩ ខែតុលា ឆ្នាំ២០១៤ នៅក្រុមទី៩ ភូមិសំប៉ង់លិច ឃុំកន្ទឺ ២ ស្រុកបាណន់ ខេត្តបាត់ដំបង ។
លោក ថោង ធិន អធិការរងស្រុកបាណន់បានអោយដឹងថា បុរសងគ្រោះស្លាប់មានឈ្មោះ ឌុយ ណាន អាយុ៣៨ឆ្នាំ និងមានប្រពន្ធឈ្មោះ ឱក កុសល អាយុ៣១ឆ្នាំ មានកូនប្រុសស្រី២នាក់អាយុជាង១០ឆ្នាំ មានទីលំនៅក្នុងភូមិកើតហេតុ ។
តាមប្រភពសាក្សីបានអោយដឹងថា មុនពេលកើតហេតុជនរងគ្រោះបានផឹកស៊ីនៅក្រោយផ្ទះ ជាមួយមិត្តភ័ក្ត មួយសន្ទុះក្រោយមកមេឃភ្លៀងមានផ្គរបានដាច់ភ្លើង ពេលនោះ ជនរងគ្រោះជាម្ចាស់ផ្ទះស្រវឹងស្រឿងៗផង នោះបានងើបទៅយកខ្សែភ្លើង (អត់មានឌុយទាំងសងខាង) ទៅតភ្ជាប់ខ្សែភ្លើងមានចរន្តបានឆ្លងឆក់ជនរងគ្រោះដួលបោក ក្បាល និងសសរបណ្តាលអោយដាច់ខ្យល់ស្លាប់ ។ ភ្លាមនោះ មិត្តភ័ក្តនៅទីនោះ ជួយរឹតធ្វើចលនា អោយដកដង្ហើមដែរតែជួយមិនបាន រីឯសាច់ញាតិស្ទាបខ្លួនប្រាណជនរងគ្រោះនៅមានកំដៅ ក៏សម្រេចចិត្តដឹកយកមកមន្ទីរពេទ្យធ្វើការសង្គ្រោះអោយអស់ចិត្តតែពេលមកដល់ មន្ទីពេទ្យក្រុមគ្រូពេទ្យថាជនរងគ្រោះស្លាប់ហើយ។
លោកអធិការងបានបញ្ជាក់ថា ក្រោយពីពិនិត្យកន្លែងកើតហេតុនិងសាកសួរស្រាវជ្រាវមិនបានរកឃើញអ្វីក្រៅពីខ្សែភ្លើងនោះទេ ដូច្នេះសន្និដ្ឋានថា ជនរងគ្រោះពិតជាឆក់ខ្សែភ្លើងស្លាប់មែន ។ ហើយសពបានប្រគល់អោយក្រុមគ្រួសារទទួលយកទៅធ្វើបុណ្យតាមប្រពៃណី ៕
