ភ្នំពេញ ៖ ក្រសួងអប់រំ យុវជន និងកីឡា បានបញ្ជាក់ថា នៅក្នុងដំណើការប្រឡងសញ្ញាបត្រមធ្យមសិក្សាទុតិយភូមិចំណេះទូទៅនិងបំពេញវិជ្ជា ( បាក់ឌុប ) សម្រាប់ថ្ងៃទីមួយ ថ្ងៃទី២០ ខែសីហា ២០១៨នេះ មានបេក្ខជនប្រឡងនៅតាមមណ្ឌលមួយចំនួនមានបញ្ហាសុខភាព ។
ក្រសួងអប់រំ យុវជន និងកីឡា បញ្ជាក់ថាភាគច្រើននៃសិស្សដែលមានបញ្ហាសុខភាព គឺមានអាការៈវិលមុខ ខ្យល់គរ ក្អួត ជាដើម ហើយក្នុងនោះបេក្ខជនខ្លះ បានបន្តការប្រឡងឡើងវិញ បន្ទាប់ពីការទទួលបានជំនួយសង្គ្រោះបឋម ពីក្រុមគ្រូពេទ្យប្រចាំការនៅតាមមណ្ឌលនោះ ៕
សូមរំលឹកថា ប្រឡងបាក់ឌុបឆ្នាំ២០១៨នេះ មានបេក្ខជនបានដាក់ពាក្យចំនួន១១៧,០៦១នាក់ ចែកចេញជាពីរក្រុម គឺថ្នាក់វិទ្យាសាស្ត្រចំនួន៥១,៧ភាគរយ និងថ្នាក់វិទ្យាសាស្ត្រសង្គមចំនួន ៤៨,៣ភាគរយ។ មានមណ្ឌលប្រឡងចំនួន១៩៥មណ្ឌល ក្នុងនោះមណ្ឌលប្រឡង ថ្នាក់វិទ្យាសាស្ត្រមានចំនួន៩៩មណ្ឌល និងថ្នាក់វិទ្យាសាស្ត្រសង្គមមានចំនួន៩៦មណ្ឌល ព្រមទាំង៤,៧១៦បន្ទប់ ។
មានគណៈមេប្រយោគចំនួន៣១,១០៨នាក់ ចែកចេញពីរផ្នែក គឺដំណាក់សំណេរចំនួន១៥៨០០នាក់ និងដំណាក់កាលអត្រាកំណែ១៤៤០០នាក់ ។ ឆ្នាំនេះដែរ ក៏មានការចូលរួមពីអ្នកសង្កេតការណ៍មកពីអង្គភាពប្រឆាំងអំពើពុករលួយជាង៦ពាន់នាក់ដែរ។
ថ្លែងប្រាប់ក្រុមអ្នកសារព័ត៌មានក្នុងពិធីកាត់វិញ្ញាសារប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅនិងបំពេញវិជ្ជា ឬហៅថាបាក់ឌុបឆ្នាំ២០១៨ នៅថ្ងៃទី២០ ខែសីហា ឆ្នាំ២០១៨ លោក ហង់ ជួនណារ៉ុន រដ្ឋមន្ត្រីក្រសួងអប់រំ បានឲ្យដឹងថា ការធ្វើកំណែទម្រង់ក្នុងវិស័យអប់រំ ដាក់ចេញដោយសម្ដេចតេជោ ដូច្នេះក្រសួងអប់រំ ក៏ដាក់បានចេញនូវវិធានការដើម្បីឲ្យការប្រឡងទទួលបានជោគជ័យ “អ្នកចេះ គឺជាប់-មិនចេះ គឺធ្លាក់” ៕
លោកបញ្ជាក់ថា បញ្ហាកំណែទម្រង់ជាលទ្ធផលពីមួយឆ្នាំទៅមួយឆ្នាំ សម្រេចបានលើសពីអ្វីដែលក្រសួងបានរំពឹងទុក។ “ខ្ញុំនៅរង់ចាំការបង្កើតរាជរដ្ឋាភិបាលថ្មី ដែលសម្ដេចតេជោ លោកនឹងប្រកាសនៅថ្ងៃទី៦ ខែកញ្ញា ខាងមុខនេះ ហើយនឹងការប្រជុំគណៈរដ្ឋមន្ដ្រី សម្រាប់នីតិកាលទី៦ ដែលសម្ដេចតេជោ លោកនឹងដាក់ចេញនូវវិធានការបន្ថែមទៀត ក្នុងការធ្វើកំណែទម្រង់ ហើយបន្ទាប់មកក្រសួងអប់រំ យុវជន និងកីឡា នឹងពិចារណានៅលើវិធានការបន្ដទៀត តើក្រោយនីតិកាលទី៥ទៅ នៅមានស្អីទៀត ដូច្នេះ យើងមិនទាន់បើកវាំងនននៅឡើយទេ” ។
រដ្ឋមន្ត្រីក្រសួងអប់រំ ក៏បានធានាថា ការប្រឡងបាក់ឌុបឆ្នាំនេះ នឹងប្រព្រឹត្តិទៅឈរលើគោលការណ៍ចំនួន៤ រួមមាន៖ ទី១-គោលការណ៍ច្បាប់, ទី២-គោលការណ៍តម្លាភាព, ទី៣-ទទួលបានភាពយុត្តិធម៌ អ្នកចេះគឺជាប់ និងទី៤-លទ្ធផលអាចទទួលយកបាន។ ដូច្នេះ ពីមួយឆ្នាំទៅឆ្នាំមួយ ការប្រឡងកាន់តែល្អប្រសើរឡើង ដោយសារតែភាគីពាក់ព័ន្ធប្រជុំគ្នា ដើម្បីចែករំលែកបទពិសោធន៍គ្នាទៅវិញទៅមក ។លោក ហង់ ជួនណារ៉ុន បានអះអាងថា តាមផែនការលទ្ធផលនឹងចេញនៅថ្ងៃទី១១-១២ កញ្ញា ៕
