ខេត្តកំពង់ឆ្នាំង ៖ ប្រជានេសាទបានរាយការណ៏មកថា នៅស្រុកជលគិរី ខេត្តកំពង់ឆ្នាំង បច្ចុប្បន្នកើតមានបទល្មើសនេសាទយ៉ាងអាណាធិបតេយ្យ ចំណែកមន្ត្រីសមត្ថកិច្ចរដ្ឋបាលជលផលប្រចាំនៅតំបន់នោះ គឺលោក សុង សារឿន កំពុងកាក់កបនិងធ្វើជាដេកលក់ដាស់មិនភ្ញាក់ បណ្តោយឲ្យបទល្មើសនេសាទកើតឡើងព្រោងព្រាត។
សេចក្តីរាយការណ៍ពីប្រជានេសាទក្នុងស្រុកជលគិរី ក៍ដូចជាប្រជាពលរដ្ឋដែលធ្វើដំណើរតាមផ្លូវទឹក បានអោយដឹងទៀតថា បច្ចុប្បន្ននេះទោះបីក្នុងរដូវបិទនេសាទ តែសកម្មភាពបទល្មើសនេសាទបានកើតឡើងយ៉ាងអាណាធិបតេយ្យ ។ ប្រជានេសាទបានលើកឡើងទៀតថា បើទោះជាដាក់លោក សុង សារឿន អោយទទួលបន្ទុកនៅតំបន់នោះ
យ៉ាងណាក៍ដោយ ក៍សកម្មភាពបទល្មើសនេសាទកើតឡើងបន្តយ៉ាងរដឹកពីតិចទៅច្រើន ហើយក៍ជាឱកាសមួយដ៍ល្អវិសេសវិសាលសម្រាប់អោយលោក សុង សារឿន ទទួលបានលាភសក្ការៈពីសកម្មភាពបទល្មើសនេសាទក្នុងទឹកដីរបស់ខ្លួនគ្រប់គ្រងយ៉ាងរលូន។
ការលើកឡើងបែបនេះដោយសារតែសកម្មភាពនេសាទល្មើស ច្បាប់ដូចជាការដាក់របាំងស្បៃមុងបានបញ្ចេញសកម្មភាពយ៉ាងក្តៅគគុកគ្រប់ទិសទីក្នុងស្រុកជលគិរី ដូចជានៅចំណុច បឹងអន្លង់អក បឹងខ្វែងឆ្លុះ កប់សេះ ពាមឆ្កោក ក្បាលកន្លង់ កោះធំ និងចំនុចជាច្រើនទៀត។
ផលត្រីដែលបានពីបទល្មើសនេសាទខាងលើនេះ បើយោងតាមប្រភពពីប្រជាពលរដ្ឋបានអោយដឹងថា ត្រូវបានមេឈ្មួញទូកឌុកជនជាតិវៀតណាមឈ្មោះ បូ ជាអ្នកប្រមូលទិញ ដឹកតាមទូកឌុកលើសបរិមាណចំនួនកំណត់ស្តីពីច្បាប់ជលផលក្នុងរដូវបិទនេសាទ តែជំនាញរដ្ឋបាលជលផលមិនអើពើឡើយ។
ប្រជាពលរដ្ឋក្នុងស្រុកជលគិរីក៍ដូចជាប្រជានេសាទមានការងឿងឆ្ងល់ថា តើជនជាតិវៀតណាមឈ្មោះ បូ រូបនេះមានឥទ្ធិពលយ៉ាងណា បានជាសមត្ថកិច្ចរដ្ឋបាលជលផលមិនហ៊ានបង្ក្រាប និងបណ្តែតបណ្តោយអោយកើតមានជារៀងរាល់ឆ្នាំ។ បើយោងតាមប្រភពព័ត៌មានមួយផ្សេងទៀតពីស្រុកជលគិរីបានអោយដឹងថា ជនជាតិវៀតណាមឈ្មោះបូ នេះមិនត្រឹមតែទិញត្រីពីការនេសាទដោយឧបករណ៍ល្មើសច្បាប់ប៉ុណ្ណោះទេ គឺទិញទាំងត្រីដែលបានពីសកម្មភាពបទល្មើសឆក់ទៀតផង ។
មជ្ដ្ឋានទូទៅបានលើកឡើងថា សកម្មភាពអាជីវកម្មទិញត្រីដឹកតាមទូកឌុករបស់ជនជាតិវៀតណាមឈ្មោះ បូ នេះជាបច្ច័យមួយ និងជាចលករមួយបង្កបង្កើតអោយមានសកម្មភាពបទល្មើសនេសាទកាន់តែខ្លាំងឡើងៗ ។ ចំណែកសមត្ថកិច្ចរដ្ឋបាលជលផលដែលទទួលបន្ទុកនៅទីនោះអសកម្មងាប់ត្រគាកស្តូក មិនមានការត្រួតពិនិត្យ ទប់ស្កាត់ និងបង្ក្រាបអោយមានប្រសិទ្ធិភាពឡើយ ហើយភ្លេចថាខ្លួនមានតួនាទីអនុវត្តន៏ច្បាប់និងមានតួនាទីអ្នកបំរើរាស្រ្ត។
ចំណែកខាងមន្ត្រីជំនាញនៅខណ្ឌរដ្ឋបាលជលផលវិញ មិនទាន់ឃើញចាត់វិធាន ការណ៍ណាមួយក្នុងការបង្ក្រាបអោយអស់បទល្មើស និងទប់ស្កាត់កុំអោយបទល្មើសកើតឡើងនោះឡើយ ធ្វើអោយប្រជានេសាទក៍ដូចជាមជ្ឈដ្ឋានទូទៅកំពុងទន្ទឹងមើលសកម្មភាពនិងប្រសិទ្ធិភាពនៃការចុះបង្ក្រាបរបស់មន្ត្រីជំនាញ និងសមត្ថកិច្ចពាក់ព័ន្ធ។ ការបណ្តែតបណ្តោយអោយមានសកម្មភាពបទល្មើសនេសាទកើតឡើង ហើយសមត្ថកិច្ចជំនាញមិនបានចាត់វិថានការបង្ក្រាបនេះ ជាហេតុនាំអោយគេសង្ស័័យថាមន្ត្រីជំនាញ បានទទួលលាភសក្ការៈយ៉ាងពេញចិត្តពីក្រុមជនល្មើសទាំងនោះហើយមើលទៅ ដោយរាប់ចាប់ពីមន្ត្រីនៃសមត្ថកិច្ចថ្នាក់ក្រោម រហូតដល់ថ្នាក់លើប្រទាក់ក្រឡាគ្នាជាប្រព័ន្ធ ។ ម្យ៉ាងវិញទៀតមជ្ឈដ្ឋានទូទៅបានលើកឡើងទៀតថា ប្រសិនបើមានការចុះបង្ក្រាបវិញ គឺបង្ក្រាបតែកន្លែងណាដែលមិនបានចរចារទទួលផលប្រយោជន៍ពីអ្នកប្រព្រឹត្តតែប៉ុណ្ណោះ ឬបង្ក្រាបតែបន្តិចបន្តួចអោយគេថតចុះផ្សាយយកស្នាដៃអោយថ្នាក់លើមើលឃើញ ដើម្បីបិទបាំងពីភាពអសកម្មដែលបណ្តែតបណ្តោយអោយមានបទល្មើសកើតឡើងគគោក។
ការលើកយកនូវបទល្មើសនេសាទខាងលើមកចុះផ្សាយនេះ ក្នុងគោលបំណងជាសេចក្តីរាយការណ៍និងជូនដំណឹងដល់សមត្ថកិច្ចជំនាញនិងអាជ្ញាធរពាក់ព័ន្ធ ជាពិសេសអាជ្ញាធរខេត្តកំពង់ឆ្នាំង ចាត់វិធានការណ៍បង្ក្រាបនិងទប់ស្កាត់ឲ្យទាន់ពេលវេលា។
យើងពុំអាចសុំការបំភ្លឺពីលោក សុង សារឿន បានទេ ព្រោះពុំមានលេខទូរសព្ទ័តែស្វាគមន៏រាល់ការបំភ្លឺពីភាគីពាក់ពន្ធ័៕
