ខេត្តព្រះសីហនុ ៖ តាមពត័មានឲ្យដឹងថា ឯកឧត្ដម យន្ត មីន អភិបាលខេត្តព្រះសីហនុ នៅព្រឹកថ្ងៃអាទិត្យ ទី១៩ ខែសីហា ឆ្នាំ២០១៨នេះ បានធ្វើដំណើរតាមរថយន្តដើម្បីចុះទៅពិនិត្យស្ថានភាពជំនន់ទឹកភ្លៀង នៅស្ពានស្ទឹងសំរោងក្នុងស្រុកកំពង់សីលា ខេត្តព្រះសីហនុ ដែលមានទឹកជំនន់លិចលង់ហូរកាត់ផ្តាច់ផ្លូវជាតិលេខ៤។
គិតដល់ពេលនេះ ព្រឹកថ្ងៃទី១៩ ខែសីហា ឆ្នាំ២០១៨ ស្ថានភាពកំពស់ទឹកនៅតែបន្តឡើង នីវ៉ូទឹកមានកម្ពស់៦,៤០ម៉ែត្រ ទឹកលិចលើផ្លូវជាតិលេខ៤មានកម្ពស់៨តឹក មានបណ្ដោយប្រវែង ៤០០ម៉ែត្រ ។ សមត្ថកិច្ចកងរាជអាវុធហត្ថបានឲ្យដឹងថា ករណីជំនន់ទឹកភ្លៀងជន់លិចនៅផ្លូវជាតិលេខ៤ គិតត្រឹមម៉ោងជាង៦ព្រឹក ថ្ងៃអាទិត្យ ទី១៩ ខែសីហា ឆ្នាំ២០១៨ គឺស្ថានភាពទឹកនៅស្ពានស្ទឹងសំរោង ទឹកបានហូរលើផ្លូវជាតិមានកំពស់០៨តឹក និងហូរកាត់តាមបណ្ដោយផ្លូវជាតិប្រហែលជាង៤០០ម៉ែត្រ។ មន្ត្រីកងរាជអាវុធហត្ថស្រុកកំពង់សីលា ខេត្តព្រះសីហនុ បានឲ្យដឹងបន្តទៀតថា បច្ចុប្បន្ននេះទឹកនៅតែបន្តឡើងព្រោះអាកាសធាតុមេឃកំពុងភ្លៀង។
តាមការសន្និដ្ឋានទឹកនៅតែបន្តឡើង ព្រោះអាកាសធាតុមេឃកំពុងភ្លៀង។ ចំពោះការធ្វើចរាចរណ៍ត្រូវផ្អាកដំណើរការទាំងស្រុងទាំងរថយន្តតូច និងធំ៕
