ខេត្តកំពង់ឆ្នាំង ៖ ខណ្ឌរដ្ឋបាលជលផលកំពង់ឆ្នាំងកំពុងចាត់វិធានការក្តៅគគុក ក្នុងការចុះទប់ស្កាត់បង្រ្កាបបទល្មើស នេសាទ ក្នុងរដូវបិទនេសាទអោយបានទាន់ពេលវេលា ក្រោមការដឹកនាំរបស់លោក អ៊ឹង ជឺប៉ោ នាយរងខណ្ឌរដ្ឋបាលជលផលខេត្តកំពង់ឆ្នាំង កាលពីថ្ងៃទី១៧ ខែសីហា ឆ្នាំ២០១៨ ស្ថិតនៅក្នុងភូមិសាស្រ្ត បឹងទន្លេសាបក្នុងស្រុកកំពង់ត្រឡាច និងមានកិច្ចប្រតិ្តបត្តិការយ៉ាងល្អ ក្រោមបទបញ្ជាផ្ទាល់របស់ឯកឧត្តម ឈួរ ច័ន្ទឌឿន អភិបាលនៃគណៈអភិបាលខេត្តកំពង់ឆ្នាំង សរុបចំនួន១៥នាក់ ។
កិច្ចសហការបង្រ្កាបបទល្មើសនេសាទក្នុងភូមិសាស្ត្រខាងលើ ត្រូវបានកម្លាំងសមត្ថកិច្ចចម្រុះ បង្រ្កាបនៅចំនុចអំពិលទឹក សរុបជាលទ្ធផល បានរបាំងស្បៃមុងចំនួន១៥កន្លែង=១៥០០ម លូស្បៃមុងចំនួន១៥មាត់ បង្គោលចំនួន៤០០ដើម ព្រមទាំងបានព្រលែងកូនត្រីចូលបឹងធម្មជាតិវិញចំនួន៧០គីឡូក្រាម វត្ថុតាងដែលសមត្ថកិច្ចចម្រុះចាប់ឃាត់បាន ត្រូវបានដឹកយកមករក្សាទុកនៅផ្នែករដ្ឋបាលជលផលកំពង់ត្រឡាចដើម្បីចាត់ការបន្ត។
លោក អ៊ឹង ជឺប៉ោ នាយរងខណ្ឌរដ្ឋបាលជលផលកំពង់ឆ្នាំង បានឲ្យដឹងថា កិច្ចសហប្រតិបត្តិការបង្រ្កាប បទល្មើសជលផល ដែលក្រុមអ្នកនេសាទបានលបលួចប្រើប្រាស់នូវឧបករណ៍នេសាទខុសច្បាប់ ត្រូវបានធ្វើ សកម្មភាពចុះបង្រ្កាបដូចភ្លៀងរលឹម នៅតាមបណ្តាផ្នែកនិងសង្កាត់ ជាប់តាមដងទន្លេសាប ដោយមានការ ណែនាំពីឯកឧត្តម វេង សុខុន រដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទ ព្រមទាំងទទួលបានពីការចង្អុលបង្ហាញពី ឯកឧត្តម អេង ជាសាន្ត ប្រតិភូរាជរដ្ឋាភិបាល និងជាប្រធានរដ្ឋបាលជលផល ឲ្យកំលាំងរដ្ឋបាលជលផល កំពង់ឆ្នាំងសហការជាមួយស្ថាប័នពាក់ព័ន្ឋ ចុះបង្រ្កាបបទល្មើសនេសាទក្នុងរដូវបិទនេសាទ ដើម្បីផ្តល់ ឳកាសឲ្យមឆ្ឆាជាតិពងកូន ដោយសារនៅក្នុងរដូវបិទនេសាទនេះ គឺជាពេលវេលាដែលត្រីបន្តពូជ ក្នុងនោះដែរលោក អ៊ឹង ជឺប៉ោ នាយរងខណ្ឌរដ្ឋបាលជលផលកំពង់ឆ្នាំង បានសំណូមពរឲ្យបងប្អូនប្រជាពលរដ្ឋ ចូលរួមថែរក្សាមឆ្ឆាជាតិ ប្រើប្រាស់ឧបករណ៍នេសាទណា ដែលមិនមានការប៉ះពាល់ដល់ការបន្តពូជរបស់មឆ្ឆា ដើម្បីបង្កើននូវភោគផលស្បៀងអាហារនៅក្នុងប្រទេស៕
