រាជធានីភ្នំពេញ ៖ ក្រោយការដោះលែងចេញពីពន្ធនាគារភ្លាមៗ លោក គឹម សុខ អ្នកវិភាគនយោបាយនិងសង្គមមិនសំចៃមាត់ បានទៅអុជធូបគោរពវិញ្ញាណក្ខន្ធ័នៅកន្លែងដែលលោក កែម ឡី ត្រូវគេបាញ់សម្លាប់នៅហាងសាំងក្បែរស្តុបបូកគោ ។
តាមរយះហ្វេសប៊ុកដែលមានឈ្មោះថា មូលនិធិមនុស្សធម៌ លោក គឹម សុខ បានសរសរថា ទោះបីជាគាត់នៅជាប់ពន្ធនាគារ ក៏មិនភ្លេចអ្នកវិភាគជើងចាស់ម្នាក់ដែលត្រូវឃាតករបាញ់សម្លាប់គឺលោកគ្រូ កែម ឡី ហើយព្រឹកនេះតុលាការក្រុងភ្នំពេញបានដោះលែងគាត់ឲ្យមានសេរីភាពវិញ ហើយគាត់ក៏បានចូលដុតធូបនូវទីកន្លែងដែលឃាតករបានបាញ់សម្លាប់លោកគ្រូ កែម ឡី ផងដែរ ។
គួរម្លឹកថា លោក គឹម សុខ ត្រូវបានតុលាការសម្រេចដោះលែងកាលពីព្រឹកថ្ងៃសុក្រនេះ បន្ទាប់ពីបានអនុវត្តទោសរួចរាល់រយះពេល១៨ខែ ក្រោមការចោទប្រកាន់ពីបទញុះញង់ឲ្យមានឧក្រិដ្ឋកម្មជាអាទិ៍ ។ ទន្ទឹមនោះលោកក៏ត្រូវតុលាការសម្រេចពិន័យជាប្រាក់៨លានរៀល រួមទាំងសងប្រាក់ជំងឺចិត្តដល់ដើមបណ្តឹងចំនួន៨០០លានរៀលថែមទៀត។
ទោះបីលោក គឹម សុខ ត្រូវបានដោះលែងនៅថ្ងៃទី១៧ ខែសីហា នេះក៏ដោយ តែសំណុំរឿងមួយករណីទៀត គឺចោទប្រកាន់ថា រាជរដ្ឋាភិបាលកម្ពុជា បានបង្កើតប្រព័ន្ធសម្លាប់មនុស្សតែរកឃាតកមិនដែលឃើញនោះ គឺកំពុងស្ថិតក្រោមចំណាត់ការតុលាការដដែល ៕
