រាជធានីភ្នំពេញ ៖ តាមប្រភពព័ត៌មានទទួលបាននៅព្រឹកថ្ងៃសុក្រនេះថា តុលាការរាជធានីភ្នំពេញបានសម្រេចដោះលែងលោក គឹម សុខ អ្នកវិភាគនយោបាយ និងសង្គម ឲ្យមានសេរីភាព បន្ទាប់ពីអនុវត្តការជាប់ទោសដល់ថ្ងៃកំណត់។
សូមរំលឹកថា លោក គឹម សុខ អ្នកវិភាគសង្គមដ៏ល្បីល្បាញ និងបានការទទួលស្គាល់ជាទូទៅត្រូវបានតុលាការសម្រេចផ្ដន្ទាទោសដាក់ពន្ធនាគារចំនួន១៨ខែ និងពិន័យប្រាក់ចំនួន៨លានរៀល រួមនឹងប្រាក់សងជំងឺចិត្តដល់ដើមបណ្តឹង៨០០លានរៀល ក្រោមការចោទប្រកាន់ពីបទញុះញង់ឲ្យមានបទឧក្រិដ្ឋជាអាទិ៍។
ការផ្តន្ទាទោសនេះធ្វើឡើងបន្ទាប់ពីលោក គឹម សុខ បាននិយាយញុះញង់ និងបរិហារកេរ្តិ៍ គណបក្សប្រជាជនកម្ពុជាថា នៅពីក្រោយឃាតកម្មបណ្ឌិត កែម ឡី អ្នកវិភាគនយោបាយសេដ្ឋកិច្ចដ៏មានប្រជាប្រិយភាព ។
ទោះបីលោក គឹម សុខ ត្រូវបានដោះលែងនៅថ្ងៃទី១៧ ខែសីហា នេះក៏ដោយ តែសំណុំរឿងមួយករណីទៀត គឺ ចោទប្រកាន់ថា រាជរដ្ឋាភិបាលកម្ពុជា បានបង្កើតប្រព័ន្ធសម្លាប់មនុស្ស តែរកឃាតកមិនដែលឃើញនោះ គឺកំពុងស្ថិតក្រោមចំណាត់ការតុលាការដដែល ៕
